ವಿರಿಜಾ ಉಪನಾಲೆ ಜಾಗ ಅತಿಕ್ರಮಣ

ತಾಲೂಕಿನ ಮೇಳಾಪುರ ಗ್ರಾಮ ಬಳಿ ನಿರ್ಮಾಣದ ಹಂತದಲ್ಲಿರುವ ಆಲ್ಫಾ ವೆಲ್‌ನೆಸ್ ರೆಸಾರ್ಟ್ ಬಳಿ ಬುಧವಾರ ಜಮಾಯಿಸಿದ ಗ್ರಾಮಸ್ಥರು ಹಾಗೂ ರೈತರು ಒತ್ತುವರಿ ಮಾಡಿರುವ ಖಾಸಗಿ ರೆಸಾರ್ಟ್ ಮಾಲೀಕ ಹಾಗೂ ಅಕ್ರಮಕ್ಕೆ ತಡೆಯೊಡ್ಡದ ಸಂಬಂಧಪಟ್ಟ ಇಲಾಖೆಗಳ ಅಧಿಕಾರಿಗಳ ವಿರುದ್ಧ ಘೋಷಣೆ ಕೂಗಿದರು.

ತಾಲೂಕಿನ ಮೇಳಾಪುರ ಗ್ರಾಮದ ಸರ್ವೇ ನಂ.182ರಲ್ಲಿ ವಿರಿಜಾ ನಾಲೆಯ ವಿತರಣಾ ಉಪನಾಲೆಯ ಏರಿ ಮತ್ತು ಒಂದೂವರೆ ಎಕರೆಯಷ್ಟು ಸರ್ಕಾರಿ ಖರಾಬು ಜಾಗವನ್ನು ಬೆಂಗಳೂರು ಮೂಲದ ವ್ಯಕ್ತಿ ಅತಿಕ್ರಮಿಸಿ ತಡೆಗೋಡೆ ಹಾಗೂ ತಂತಿಬೇಲಿ ನಿರ್ಮಿಸಿ ಜನರ ಸಂಚಾರ ರಸ್ತೆ ಕಬಳಿಸಿದ್ದಾರೆ. ಈ ಬಗ್ಗೆ ಪ್ರಶ್ನಿಸಲು ಮುಂದಾದ ರೈತರ ಮೇಲೆ ರೌಡಿಗಳನ್ನು ಮುಂದೆ ಬಿಟ್ಟು ಬೆದರಿಕೆ ಮತ್ತು ಧಮಕಿ ಹಾಕಿಸಿದ್ದಾರೆ ಎಂದು ಗ್ರಾಮಸ್ಥರು ಆರೋಪಿಸಿದರು.

ಬೆಂಗಳೂರು ಮೂಲದ ಡಾ.ರಿಜ್ವಾನ್ ಅಹ್ಮದ್ ಎಂಬ ವೈದ್ಯರೊಬ್ಬರು ಇಲ್ಲಿ ಜಮೀನು ಖರೀದಿಸಿದ್ದು, ಇವರ ಜಮೀನಿಗೆ ಸಂಪರ್ಕ ಕಲ್ಪಿಸುವ ಕೋಟ್ಯಂತರ ರೂ. ಬೆಲೆ ಬಾಳುವ ಸರ್ಕಾರಿ ಜಾಗವನ್ನು ಸಹ ಅತಿಕ್ರಮಿಸಿ ಆಲ್ಫಾ ವೆಲ್‌ನೆಸ್ ರೆಸಾರ್ಟ್ ನಿರ್ಮಿಸಲಾಗುತ್ತಿದೆ. ನಾಲೆ ಹಾಗೂ ನಾಲೆ ರಸ್ತೆ ಒಂದಿಂಚೂ ಸ್ಥಳ ಬಿಡದೆ ಒತ್ತುವರಿ ಮಾಡಿ ಸಿಮೆಂಟ್ ಮತ್ತು ಕಬ್ಬಿಣ ಬಳಸಿ ಗೋಡೆ ನಿರ್ಮಾಣ ಮಾಡಿದ್ದಾರೆ. ಈ ಬಗ್ಗೆ ನೀರಾವರಿ ಮತ್ತು ಕಂದಾಯ ಇಲಾಖೆ ಅಧಿಕಾರಿಗಳಿಗೆ ಹಲವು ದೂರು ನೀಡಿದ್ದರೂ ಯಾವ ಕ್ರಮವಹಿಸದೆ ಜಾಣ ಮೌನವಹಿಸಿದ್ದಾರೆ. ಆಲ್ಫಾ ವೆಲ್‌ನೆಸ್ ರೆಸಾರ್ಟ್ ಮೊದಲು ಆರ್ಯುವೇದಿಕ್ ಆಸ್ಪತ್ರೆ ಎನ್ನಲಾಗಿತ್ತು. ಆದರೆ ರೆಸಾರ್ಟ್ ಎಂದು ನಾಮಫಲಕದಲ್ಲಿ ಬರೆದುಕೊಳ್ಳಲಾಗಿದೆ. ಈ ನಾಮಫಲಕದಲ್ಲಿ ಕರ್ನಾಟಕ ರಾಜ್ಯ ಸರ್ಕಾರದ ಲೋಗೊವನ್ನು ಬಳಸಲಾಗಿದ್ದು, ಲೋಗೊವನ್ನು ದುರ್ಬಳಕೆ ಮಾಡಿಕೊಂಡಿರುವ ಅನುಮಾನವಿದೆ ಎಂದು ಆಪಾದಿಸಿದರು. 

ರೆಸಾರ್ಟ್ ನಿರ್ಮಾಣದ ಕುರಿತು ಮಾಹಿತಿ ಕೇಳಿ ಮೇಳಾಪುರ ಗ್ರಾಮ ಪಂಚಾಯಿತಿ 3 ದಿನಗಳ ಹಿಂದೆ ನೋಟಿಸ್ ನೀಡಿದ್ದು, ಅದನ್ನು ತಿರಸ್ಕರಿಸಿ ವಾಪಸ್ ಕಳುಹಿಸಿರುವುದಾಗಿ ತಿಳಿದುಬಂದಿದೆ. ಈ ಬಗ್ಗೆ ಜಿಲ್ಲಾಡಳಿತ ಉತ್ತರಿಸಬೇಕು ಎಂದು ರೈತರು ಆಗ್ರಹಿಸಿದರು.ರೈತರಾದ ಮಹೇಶ್, ಕುಮಾರ್, ಪ್ರದೀಪ್, ಮಧು, ರಮೇಶ್ ಗೌಡ, ಧನಂಜಯ್ಯ, ದಿನೇಶ್, ನಿತೀಶ್ ಕುಮಾರ್ ಇತರರು ಪ್ರತಿಭಟನೆಯಲ್ಲಿ ಭಾಗಿಯಾಗಿದ್ದರು.

"