ವರುಣನ ಅವಕೃಪೆಗೆ ತೊಗರಿ ಕಣಜ ತಲ್ಲಣ

ಜಯತೀರ್ಥ ಪಾಟೀಲ

ಕಲಬುರಗಿ: ವರುಣ ಅವಕೃಪೆ ಹಿನ್ನೆಲೆಯಲ್ಲಿ ಜಿಲ್ಲೆಯ 11 ತಾಲೂಕುಗಳು ಬರಪೀಡಿತ ಎಂದು ರಾಜ್ಯ ಸರ್ಕಾರ ಘೋಷಿಸಿದೆ. ಈ ಪೈಕಿ ಆರು ತಾಲೂಕುಗಳಲ್ಲಿ ಕೃಷಿ ಇಲಾಖೆ ಜಂಟಿ ಸಮೀಕ್ಷೆ ಕೈಗೊಂಡಿದ್ದು, 3,19,586 ಹೆಕ್ಟೇರ್​ ಪ್ರದೇಶದಲ್ಲಿ ಬೆಳೆ ಹಾನಿಗೊಳಗಾಗಿರುವ ಆಘಾತಕಾರಿ ಅಂಶ ಪತ್ತೆಯಾಗಿದೆ.

ಕೃಷಿ ಅಧಿಕಾರಿಗಳು ನಡೆಸಿದ ಸಮೀಕ್ಷೆ ಕಾಲಕ್ಕೆ ಅಫಜಲಪುರದಲ್ಲಿ 76,330, ಆಳಂದ 80,639, ಚಿತ್ತಾಪುರ 47,765, ಕಲಬುರಗಿ 62,306, ಶಹಾಬಾದ್​ 14,188 ಮತ್ತು ಯಡ್ರಾಮಿ ತಾಲೂಕಿನಲ್ಲಿ 38,198 ಹೆಕ್ಟೇರ್​ ಪ್ರದೇಶದ ಬೆಳೆ ಹಾನಿಗೊಳಗಾಗಿದೆ ಎಂದು ಗುರುತಿಸಿ ಜಿಲ್ಲಾಡಳಿತಕ್ಕೆ ವರದಿ ಸಲ್ಲಿಸಿದೆ.

ಮುಂಗಾರಿನಲ್ಲಿ 8.90 ಲಕ್ಷ ಹೆಕ್ಟೇರ್​ ಬಿತ್ತನೆ ಗುರಿ ಹೊಂದಿದ್ದು, ಸುಮಾರು 8 ಲಕ್ಷ ಹೆಕ್ಟೇರ್​ ಪ್ರದೇಶದಲ್ಲಿ ಬಿತ್ತನೆಯಾಗಿತ್ತು. ಐದು ತಾಲೂಕುಗಳ ಸಮೀಕ್ಷೆ ಕಾರ್ಯ ಪ್ರಗತಿ ಹಂತದಲ್ಲಿದೆ ಎಂದು ಮೂಲಗಳು ವಿಜಯವಾಣಿಗೆ ತಿಳಿಸಿವೆ. ಕೃಷಿ, ತೋಟಗಾರಿಕೆ ಮತ್ತು ಕಂದಾಯ ಇಲಾಖೆಗಳನ್ನೊಳಗೊಂಡ ಜಂಟಿ ಸಮೀಕ್ಷೆ ಆಗುವುದು ಬಾಕಿ ಇದೆ. ಎನ್​ಡಿಆರ್​ಎಫ್​ ನಿಯಮಾವಳಿ ಪ್ರಕಾರ ಮಳೆಯಾಶ್ರಿತ ಪ್ರತಿ ಹೆಕ್ಟೇರ್​ ಬೆಳೆಗೆ 8500 ರೂ. ಮತ್ತು ನೀರಾವರಿ ಆಶ್ರಿತ ಪ್ರತಿ ಹೆಕ್ಟೇರ್​ ಬೆಳೆಗೆ 17,000 ರೂ. ಪರಿಹಾರ ನೀಡಲಾಗುತ್ತದೆ.

ಕಳೆದ ವರ್ಷ 250 ಕೋಟಿ ರೂ.ಬೆಳೆಹಾನಿ ಪರಿಹಾರ, 248.73 ರಾಜ್ಯದ ವಿಶೇಷ ಪ್ಯಾಕೇಜ್​ ಮತ್ತು ಬೆಳೆವಿಮೆ ಪರಿಹಾರ 585 ಕೋಟಿ ರೂ. ಸೇರಿ ಒಟ್ಟು 1,083 ಕೋಟಿ ರೂ. ಪರಿಹಾರ ಜಿಲ್ಲೆಗೆ ದೊರೆತಿತ್ತು. ಈ ಒಟ್ಟೂ ಸೇರಿ ಕಳೆದ ಮೂರು ವರ್ಷದಲ್ಲಿ ಕಲಬುರಗಿ ಜಿಲ್ಲೆಗೆ 3024 ಕೋಟಿ ರೂ. ದೊರೆತಿದೆ.

4.53 ಲಕ್ಷ ರೈತರ ನೋಂದಣಿ

ಈ ವರ್ಷದ ಬೆಳೆವಿಮೆಗೆ 4.53 ಲಕ್ಷ ರೈತರು ನೋಂದಣಿ ಮಾಡಿಕೊಂಡಿದ್ದು, 5.36 ಲಕ್ಷ ಹೆಕ್ಟೇರ್​ ಬೆಳೆ ವಿಮೆಗೆ ಒಳಗಾಗಿದೆ. ಇದಕ್ಕಾಗಿ ರೈತರು 68 ಕೋಟಿ ರೂ. ವಿಮೆ ಪ್ರೀಮಿಯಂ ಭರಿಸಿದ್ದಾರೆ. ಹೆಸರು, ಉದ್ದು ಮತ್ತು ಸೋಯಾಬೀನ್​ ಬೆಳೆಹಾನಿಗೆ ಮಧ್ಯಂತರ ಪರಿಹಾರ ೂಷಿಸಲಾಗಿದೆ. 27,800 ಹೆಕ್ಟೇರ್​ ಬೆಳೆ, 37 ಸಾವಿರ ರೈತರಿಗೆ 16.50 ಕೋಟಿ ರೂ. ಪರಿಹಾರ ದೊರೆಯಲಿದೆ. ತೊಗರಿ, ಹತ್ತಿ, ಸಜ್ಜೆ ಸೇರಿ ಇತರೆ ಬೆಳೆಗೂ ಮಧ್ಯಂತರ ಪರಿಹಾರ ನೀಡಲು ಜಿಲ್ಲಾಡಳಿತ ನಿರ್ಧರಿಸಿದೆ. ಈ ನಿಟ್ಟಿನಲ್ಲಿ ಕೃಷಿ ಇಲಾಖೆ ಕ್ಷೇತ್ರ ಪರಿಶೀಲನೆ ಕಾರ್ಯ ಶುರು ಮಾಡಿದೆ.

ಶೇ.80 ವರ್ಷಧಾರೆ ಕೊರತೆ

ಕಲಬುರಗಿ ಜಿಲ್ಲೆಯಲ್ಲಿ ಮಳೆರಾಯ ಮುನಿಸಿಕೊಂಡಿರುವ ಪರಿಣಾಮ ಬೆಳೆಹಾನಿ ಜತೆಗೆ ಜನ&ಜಾನುವಾರುಗಳಿಗೆ ಕುಡಿವ ನೀರು, ಮೇವು ಕೊರತೆ ಎದುರಾಗಿದೆ. ಮುಂಗಾರು ಆರಂಭದ ಜೂನ್​ನಲ್ಲಿ 107.3 ಮಿಮೀ ಸಾಮಾನ್ಯ ಮಳೆಗೆ ಕೇವಲ 69.2 ಮಿಮೀ ಮಳೆಯಾಗಿದೆ. ಜುಲೈನಲ್ಲಿ 138.4 ಮಿಮೀ ಬದಲಾಗಿ 90.4, ಆಗಸ್ಟ್​ನಲ್ಲಿ 155.6 ಮಿಮೀ ಬದಲು 63.9 ಸುರಿದಿದೆ. ಸೆ.22ರವರೆಗೆ 126.9 ಮಿ.ಮೀ ಮಳೆ ಪೈಕಿ ಕೇವಲ 36.5 ಮಿ.ಮೀ ಮಳೆಯಾಗಿದೆ. ಜೂನ್​ನಿಂದ ಸೆ.22ರವರೆಗೆ 528.2 ಮಿಮೀ ಮಳೆಗೆ ಕೇವಲ 260 ಮಿಮೀ ಮಳೆ ಬಂದಿದೆ. ಹೀಗಾಗಿ ಜಿಲ್ಲೆಯಲ್ಲಿ ಶೇ.80 ಮಳೆ ಕೊರತೆ ಎದುರಾಗಿದೆ. ಮುಂದಿನ ಹದಿನೈದು ದಿನಗಳವರೆಗೆ ಮಳೆಯಾಗುವ ಸಾಧ್ಯತೆ ಕಡಿಮೆ.

ಉದ್ದು, ಹೆಸರು ಢಮಾರ್​

ಕಲಬುರಗಿ ಎಪಿಎಂಸಿಗೆ ಕಳೆದ ನಾಲ್ಕು ವರ್ಷಗಳಲ್ಲಿ ಈ ಅವಧಿಯಲ್ಲಿ ಬಂದಿರುವ ಉದ್ದು, ಹೆಸರು ತುಲನಾತ್ಮಕವಾಗಿ ನೋಡಿದರೆ ಗಣನೀಯ ಏರಿಳಿಕೆ ಕಂಡುಬಂದಿದೆ. ಒಂದು ಬಾರಿ ಬರ, ಮತ್ತೊಂದು ಬಾರಿ ಅತೀವೃಷ್ಟಿ ಇದಕ್ಕೆ ಕಾರಣ ಎನ್ನಬಹುದಾಗಿದೆ. 2023&24ನೇ ಸಾಲಿನಲ್ಲಿ ಉದ್ದು 16,190 ಕ್ವಿಂಟಾಲ್​ ಆವಕವಾಗಿದೆ. 2024&25ನೇ ಸಾಲಿನಲ್ಲಿ 35,593 ಕ್ವಿಂಟಾಲ್​, 2025&26ರಲ್ಲಿ 1,04,115 ಕ್ವಿಂಟಾಲ್​ ಮತ್ತು 2026&27ನೇ ಸಾಲಿನ ಸೆಪ್ಟೆಂಬರ್​ 20ರವರೆಗೆ 50,739 ಕ್ವಿಂಟಾಲ್​ ಉದ್ದು ಎಪಿಎಂಸಿ ಮಾರುಕಟ್ಟೆಗೆ ಬಂದಿದೆ. ಹೆಸರು ಕಾಳು 2023&24ರಲ್ಲಿ 82,160, 2024&25ರಲ್ಲಿ 1,75,319, 2025&26ರಲ್ಲಿ 1,38, 932, 2026&27ರ ಸೆಪ್ಟೆಂಬರ್​ 20ರವರೆಗೆ 84,573.55 ಕ್ವಿಂಟಾಲ್​ ಆವಕ ಆಗಿದೆ. ಈ ಹೊತ್ತಿಗೆ ಆಳೆತ್ತರಕ್ಕೆ ಬೆಳೆದು ನಿಲ್ಲಬೇಕಿದ್ದ ತೊಗರಿ 1&2 ಅಡಿಯಷ್ಟು ಮಾತ್ರ ಬೆಳವಣಿಗೆ ಕಂಡಿದೆ. ಹಾಗೊಂದು ವೇಳೆ ಚೂರು&ಚಾರು ಬೆಳೆದರೂ ಇಳುವರಿ ಸಂಪೂರ್ಣ ಕುಂಠಿತಗೊಳ್ಳುವ ಸಾಧ್ಯತೆ ಇದೆ.