ತ್ಯಾಜ್ಯ ವಿಲೇವಾರಿ ಘಟಕಕ್ಕೆ ಬೆಂಕಿ

ಅಂಕೋಲಾ: ತಾಲೂಕಿನ ಬೊಗ್ರಿಬೈಲಿನ ಘನತ್ಯಾಜ್ಯ ಘಟಕದಲ್ಲಿ ಆಕಸ್ಮಿಕ ಬೆಂಕಿ ಕಾಣಿಸಿಕೊಂಡ ಪರಿಣಾಮ ತ್ಯಾಜ್ಯ ವಿಲೇವಾರಿ ಘಟಕದ ಕೆಲ ಬಿಡಿಭಾಗಗಳು ಹಾನಿಯಾದ ಘಟನೆ ಭಾನುವಾರ ಮಧ್ಯಾಹ್ನ ನಡೆದಿದೆ.

ಕಸ ವಿಂಗಡಣೆ ನಿರ್ಮಾಣ ಘಟಕದ ಟ್ರಾಮವೆಲ್ ಜೋಡಣೆ ಸಂದರ್ಭದಲ್ಲಿ ವೆಲ್ಡಿಂಗ್ ಮಾಡುವಾಗ ಬೆಂಕಿಯ ಕಿಡಿ ಹತ್ತಿರದಲ್ಲಿದ್ದ ಹುಲ್ಲುಗಳಿಗೆ ಹೊತ್ತಿಕೊಂಡು ಡಂಪಿಂಗ್ ಯಾರ್ಡ್​ಗೆ ಪಸರಿಸಿ, ಸುಟ್ಟು ಭಸ್ಮವಾಗಿದೆ. ವಿಷಯ ತಿಳಿದ ಅಗ್ನಿಶಾಮಕ ದಳದವರು ಆಗಮಿಸಿ ಬೆಂಕಿ ನಂದಿಸುವ ಕಾರ್ಯಾಚರಣೆ ಕೈಗೊಂಡರೂ ಸಂಪೂರ್ಣ ಬೆಂಕಿ ನಂದಿಸಲು ಸಾಧ್ಯವಾಗಲಿಲ್ಲ. ವ್ಯಾಪಕವಾಗಿ ಹೊತ್ತಿಕೊಂಡ ಬೆಂಕಿ ಸಮೀಪದ ನೂರಾರು ಮನೆ ಹಾಗೂ ಹತ್ತಿರಲ್ಲಿದ್ದ 110 ಕೆ.ವಿ. ವಿದ್ಯುತ್ ಘಟದ ಸ್ಥಾವರಕ್ಕೆ ತಗಲುವ ಅಪಾಯವಿತ್ತು. ಆದರೆ, ಅಗ್ನಿಶಾಮಕದವರ ಮುನ್ನೆಚ್ಚರಿಕೆ ಕ್ರಮದಿಂದಾಗಿ ದೊಡ್ಡ ಪ್ರಮಾಣದ ಅನಾಹುತ ತಪ್ಪಿದಂತಾಗಿದೆ.

ಅಗ್ನಿ ಶಾಮಕ ಸಿಬ್ಬಂದಿ ಜತೆ ಪುರಸಭೆ ಅಧ್ಯಕ್ಷ ಸೂರಜ ಎಂ. ನಾಯ್ಕ, ಮುಖ್ಯಾಧಿಕಾರಿ ಎಚ್. ಅಕ್ಷತಾ, ಸದಸ್ಯರಾದ ರೇಖಾ ಗಾಂವಕರ, ಕಾರ್ತಿಕ ನಾಯ್ಕ ಮುಂತಾದವರು ಇದ್ದರು.