ರಾಸಾಯನಿಕ ಮುಕ್ತ ಕೃಷಿ ಇಳುವರಿ ಸಮೃದ್ಧಿ

ಶ್ಯಾನಾಡ್ರಹಳ್ಳಿ ಗ್ರಾಮದ ಮಧು ಎಂಎ ಬಿಇಡಿ ಶಿಕ್ಷಣ ಪಡೆದ ನಂತರ ಉನ್ನತ ಉದ್ಯೋಗಾವಕಾಶಗಳು ಸಿಕ್ಕಿದ್ದರೂ ಕೃಷಿಯ ಮೇಲಿನ ಪ್ರೀತಿಯಿಂದ ಊರಿಗೆ ಹಿಂದುರುಗಿದರು. ತಮ್ಮ ಪೂರ್ವಜರಿಂದ ಬಂದ 10 ಎಕರೆ ಜಮೀನಿನಲ್ಲಿ ಬಾಳೆ, ಅರಿಶಿಣ, ತೆಂಗು ಮುಂತಾದ ವಾರ್ಷಿಕ ಬೆಳೆಗಳು ಹಾಗೂ ನೆಲಗಡಲೆ ಬೆಳೆಯುತ್ತ ಲಾಭಗಳಿಸುತ್ತಿದ್ದಾರೆ.

ಆರಂಭದಲ್ಲಿ ಮೂರು ತಿಂಗಳ ಬೆಳೆಗಳಾದ ತರಕಾರಿಗಳನ್ನು ಬೆಳೆಯುವಾಗ ರಸಗೊಬ್ಬರ ವ್ಯಾಪಾರಿಗಳು ಅನಗತ್ಯವಾಗಿ ಗೊಬ್ಬರ ಹಾಗೂ ಕ್ರಿಮಿನಾಶಕಗಳನ್ನು ರೈತರಿಗೆ ಮಾರಾಟ ಮಾಡುತ್ತಿರುವುದು ಅರಿವಿಗೆ ಬಂದ ಕೂಡಲೇ ಅವುಗಳನ್ನು ಕೈಬಿಟ್ಟು ವಾರ್ಷಿಕ ಬೆಳೆಗಳತ್ತ ಗಮನಹರಿಸಿದರು. ತಮ್ಮ ಬೆಳೆಗಳಿಗೆ ಯಾವುದೇ ರೋಗಬಾಧೆ ಕಂಡುಬಂದಲ್ಲಿ ಕೃಷಿ ವಿಶ್ವವಿದ್ಯಾಲಯದ ವಿಜ್ಞಾನಿಗಳ ಸಲಹೆ ಮೇರೆಗೆ ಮಣ್ಣಿಗೆ ಅಗತ್ಯವಾದ ಪೋಷಕಾಂಶಗಳು ಹಾಗೂ ಸ್ವಲ್ಪ ಪ್ರಮಾಣದಲ್ಲಿ ರಾಸಾಯನಿಕ ಗೊಬ್ಬರ ಹಾಕುವುದನ್ನು ಅರಿತುಕೊಂಡಿದ್ದರಿಂದ ಅನಗತ್ಯ ರಾಸಾಯನಿಕ ಬಳಕೆಯನ್ನು ಕೈಬಿಟ್ಟಿದ್ದಾರೆ.

ಪ್ರತಿವರ್ಷವೂ ಪ್ರತಿ ಎಕರೆಗೆ 9-10 ಲೋಡ್‌ಗಳಷ್ಟು ಜಾನುವಾರು ಗೊಬ್ಬರ ಹಾಕಿ ಕನಿಷ್ಠ 12 ಬಾರಿ ಉಳುಮೆ ಮಾಡುವ ಮೂಲಕ ಮಣ್ಣನ್ನು ಹದಗೊಳಿಸುತ್ತಿದ್ದಾರೆ. ತಮ್ಮ ಜಮೀನಿನ ಮೂರನೇ ಒಂದರಷ್ಟು ಭೂಮಿಯಲ್ಲಿ ಒಂದು ವರ್ಷ ಯಾವುದೇ ಬೆಳೆ ಬೆಳೆಯದೆ ಕೇವಲ ಉಳುಮೆ ಮಾಡಿಸುವ ಮೂಲಕ ಮುಂದಿನ ವರ್ಷದ ಬೆಳೆಗೆ ಸಿದ್ಧಗೊಳಿಸುತ್ತಾರೆ. ಇದರಿಂದ ಮಣ್ಣಿನಲ್ಲಿ ಪೋಷಕಾಂಶಗಳು ಹಾಗೂ ಎರೆಹುಳಗಳು ಸಮೃದ್ಧವಾಗಿ ದೊರಕುವಂತಾಗಿದೆ. ಆಯಾ ಬೆಳೆಗಳಿಗೆ ಅತ್ಯಗತ್ಯವಾದ ರಾಸಾಯನಿಕ ಗೊಬ್ಬರವನ್ನು ಅತ್ಯಂತ ಕಡಿಮೆ ಪ್ರಮಾಣದಲ್ಲಿ ಹಾಕಿ ಅತ್ಯಧಿಕ ಇಳುವರಿ ಪಡೆಯುತ್ತಿದ್ದಾರೆ.

ಅರಿಶಿಣಕ್ಕೆ 10ರಿಂದ 15 ರೀತಿಯ ಗೊಬ್ಬರವನ್ನು ಮಿಶ್ರಣ ಮಾಡಿ ಪಾರು ಎಳೆಯುವುದರಿಂದ ಮಣ್ಣಿನಲ್ಲಿ ಸಮೃದ್ಧ ಪೋಷಕಾಂಶಗಳು ದೊರಕಿ ಬೆಳೆ ಚೆನ್ನಾಗಿ ಬೆಳೆಯುತ್ತದೆ. ಅರಿಶಿಣಕ್ಕೆ ಸಮರ್ಪಕ ಪ್ರಮಾಣದ ನೀರು, ಅಗತ್ಯ ಪೋಷಕಾಂಶಗಳನ್ನು ನೀಡುವುದರಿಂದ ಕಳೆದ ವರ್ಷ ಎರಡೂವರೆ ಎಕರೆ ಭೂಮಿಯಲ್ಲಿ 125 ಕ್ವಿಂಟಾಲ್ ಇಳುವರಿ ಪಡೆದು ದಾಖಲೆ ನಿರ್ಮಿಸಿದ್ದಾರೆ.

ಬಾಳೆಗೆ ಹೆಚ್ಚಿನ ಗಮನಹರಿಸುವುದರಿಂದ ಇಳುವರಿ ಚೆನ್ನಾಗಿ ಬರುತ್ತಿದೆ. ಪ್ರತಿ ಗಿಡಕ್ಕೆ ಪ್ರತಿ ದಿನ 30 ಲೀಟರ್ ನೀರಿನ ಅಗತ್ಯವಿದ್ದು ಇದನ್ನು ಸರಿಯಾಗಿ ಕಾಲಕಾಲಕ್ಕೆ ನೀಡಲಾಗುತ್ತದೆ. ಬಾಳೆಯ ಎಲೆಯ ಬಣ್ಣವನ್ನು ನೋಡಿದ ಕೂಡಲೇ ಅದಕ್ಕೆ ಏನು ರೋಗ ಬಂದಿದೆ, ಯಾವ ಪೋಷಕಾಂಶ ನೀಡಿದರೆ ಸರಿಯಾಗುತ್ತದೆ ಎಂಬುದನ್ನು ತಾವೇ ತಿಳಿದುಕೊಂಡು ಸೂಕ್ತ ಪೋಷಕಾಂಶ ನೀಡುವುದರಿಂದ ಗಿಡದ ರೋಗ ನಿರೋಧಕ ಶಕ್ತಿ ಹೆಚ್ಚಾಗುತ್ತಿದೆ. ಪ್ರತಿ 15 ದಿನಕ್ಕೊಮ್ಮೆಯಂತೆ 8 ತಿಂಗಳವರೆಗೂ ಜಿಂಕ್, ಪೊಟ್ಯಾಷ್, ಮೆಗ್ನಿಷಿಯಂ ಸಲ್ಫೇಟ್‌ಗಳ ಮಿಶ್ರಣವನ್ನು ಪ್ರತಿ ಸಸಿಯ ಬುಡಕ್ಕೆ 600 ಮಿ.ಲೀ.ಹಾಕುವ ಮೂಲಕ ಟ್ರಂಚಿಂಗ್ ಮಾಡುವುದರಿಂದ ರೋಗಮುಕ್ತವಾಗಿ ಬೆಳೆಯುತ್ತಿದ್ದಾರೆ. ಇದರಿಂದ ಪ್ರತಿ ಗೊನೆ 18 ರಿಂದ 21 ಕೆಜಿ ಇಳುವರಿ ಬರಲು ಸಾಧ್ಯವಾಗಿದೆ.

ಭೂಮಿಯ ಫಲವತ್ತತೆ, ಫೊಷಕಾಂಶ ಹೆಚ್ಚಿಸಲು ಒಂದು ಎಕರೆಯಲ್ಲಿ 17-18 ಕ್ವಿಂಟಾಲ್‌ನಷ್ಟು ನೆಲಗಡಲೆ ಬೆಳೆಯುತ್ತಿದ್ದಾರೆ. ಇದನ್ನು ಟ್ರ್ಯಾಕ್ಟರ್‌ನಲ್ಲಿ ಬೆಡ್ ಮಾಡಿಸಿ ಈರುಳ್ಳಿ ಬಿತ್ತನೆ ಮಾಡುವಂತೆ ಬೀಜವನ್ನು ನಾಟಿ ಮಾಡಲಾಗುತ್ತದೆ. ಇದಕ್ಕೆ ಬೇರೆ ಯಾವುದೇ ಗೊಬ್ಬರ ಹಾಕುವ ಅಗತ್ಯವಿಲ್ಲದ ಕಾರಣ ಶೂನ್ಯ ವೆಚ್ಚದಲ್ಲಿ ಬೆಳೆಯಬಹುದು. ಹುಲುಸಾಗಿ ಬೆಳೆಯುವ ಇದರ ಎಲೆಗಳು ಹಸುವಿಗೆ ಆಹಾರವಾದರೆ ಕಾಳುಗಳಿಂದ ಗೃಹಬಳಕೆಗೆ ಬೇಕಾದ ಅಡುಗೆ ಎಣ್ಣೆಗೆ ಬಳಕೆಯಾಗುತ್ತದೆ. ಕಟಾವು ಮಾಡುವುದನ್ನು ವಿಳಂಬ ಮಾಡದೆ ಕೈಗೊಳ್ಳುವುದರಿಂದ ಒಳ್ಳೆಯ ಇಳುವರಿ ದೊರಕುತ್ತಿದೆ. ಹೆಚ್ಚಿನ ಇಳುವರಿ ಬಂದರೆ ಬಿತ್ತನೆ ಬೀಜಗಳನ್ನು ಮಾರಾಟ ಮಾಡುವ ಮೂಲಕ ಲಾಭಗಳಿಸುತ್ತಿದ್ದಾರೆ.

ಹೆಚ್ಚು ಹಸುಗಳನ್ನು ಸಾಕಿದರೆ ಕೃಷಿ ಚಟುವಟಿಗೆಗೆ ಅಡ್ಡಿಯಾಗುತ್ತದೆ ಎಂಬ ಕಾರಣಕ್ಕೆ ಗೃಹಬಳಕೆಗೆ ಒಂದೇ ಒಂದು ಜರ್ಸಿ ಹಸುವನ್ನು ಇಟ್ಟುಕೊಂಡಿದ್ದಾರೆ. ಮುಂದಿನ ದಿನಗಳಲ್ಲಿ ಹೆಚ್ಚಿನ ಹಸುಗಳನ್ನು ಖರೀದಿಸಿ ಫಾರ್ಮ್ ಮಾಡುವ ಉದ್ದೇಶ ಹೊಂದಿದ್ದಾರೆ.