ಬೆಂಗಳೂರು: ವಿಧಾನಸೌಧಕ್ಕೆ ಬಾಂಬ್ ಇಟ್ಟು ಸ್ಫೋಟಿಸುತ್ತೇನೆ ಎಂಬ ರೀತಿಯಲ್ಲಿ ಎಐ ವಿಡಿಯೋ ಕ್ರಿಯೇಟ್ ಮಾಡಿ, ಇನ್ಸ್ಟಾಗ್ರಾಮ್ನಲ್ಲಿ ವಿಡಿಯೋ ಹಂಚಿಕೊಂಡಿದ್ದ ಬಿಹಾರ ಮೂಲದ ಯುವಕನನ್ನು ಬೆಂಗಳೂರು ನಗರ ಪೊಲೀಸರು ಬಂಧಿಸಿದ್ದಾರೆ.
ಬಿಹಾರದ ಅರಾರಿಯಾ ಜಿಲ್ಲೆಯ ಹಜರತ್ ಅಲಿ (25) ಬಂಧಿತ ಆರೋಪಿ. ಬೆಂಗಳೂರಿನಲ್ಲಿ ದಿನಗೂಲಿ ಪೈಪ್‌ಫಿಟರ್ ಆಗಿ ಕೆಲಸ ಮಾಡುತ್ತಿದ್ದ ಎನ್ನುವುದನ್ನು ಪೊಲೀಸರು ತಿಳಿಸಿದ್ದಾರೆ.
ಎಐ ವಿಡಿಯೋದಲ್ಲಿ ಏನಿತ್ತು?
ಹಜರತ್ ಅಲಿ ಕೆಲವು ದಿನದ ಹಿಂದೆ jnx_king_h_g ಇನ್ಸ್ಟಾಗ್ರಾಮ್ ಖಾತೆಯಿಂದ ವಿಡಿಯೋ ಹಂಚಿಕೊಂಡಿದ್ದ. ಅದೇ ವಿಡಿಯೋ ಈಗ ಜೈಲು ಮೆಟ್ಟಲೇರಲು ಕಾರಣವಾಗಿದೆ. ವಿಧಾನಸೌಧ ಮಂಭಾಗ ಬಂದಾಗ ಶಕ್ತಿಸೌಧವನ್ನು ಸ್ಫೋಟಿಸಿದಂತೆ ರೀಲ್ಸ್ ಮಾಡಿ, 'ಉಡಾ ದಿಯಾ ಬಾಂಬ್ ಸೆ' (ಬಾಂಬ್‌ನಿಂದ ಸ್ಫೋಟಿಸಿಬಿಟ್ಟೆ) ಎಂಬುದಾಗಿ ಬರೆದು ಪೋಸ್ ನೀಡಿದ್ದ.
ವಿಧಾನಸೌಧ ಠಾಣೆ ಇನ್‌ಸ್ಪೆಕ್ಟರ್ ಎಸ್.ಪಿ. ಕುಮಾರ್ ದಿನನಿತ್ಯ ಡಿಜಿಟಲ್ ಕಣ್ಗಾವಲು ನಡೆಸುತ್ತಿದ್ದಾಗ ಈ ಘಟನೆ ಬೆಳಕಿಗೆ ಬಂದಿತು. ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿ, ಆರೋಪಿ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ ಸೆಕ್ಷನ್ 353(1)(B) ಮತ್ತು 353(2)ರಡಿಯಲ್ಲಿ ಪ್ರಕರಣ ದಾಖಲಿಸಿಕೊಂಡಿದ್ದರು.
ವಿಡಿಯೋ ಹಂಚಿಕೊಳ್ಳಲಾದ ಅಕೌಂಟ್ ಆಧರಿಸಿ ಹಜರತ್ ಅಲಿ ಹುಡುಕಾಟ ಶುರು ಮಾಡಿದ ಪೊಲೀಸರು, ಬೆಂಗಳೂರಿನಲ್ಲಿ ಆತನನ್ನು ಬಂಧಿಸಿದರು. ಕೃತ್ಯದ ಹಿಂದೆ ಹಜರತ್ ಅಲಿಗೆ ಇರುವ ಉದ್ದೇಶವೇನು? ವಿಡಿಯೋ ಹಂಚಿಕೊಳ್ಳುವ ವಿರುದ್ಧ ಯಾರದ್ದಾದ್ರೂ ಪಾತ್ರವಿದೆಯಾ ಎಂಬುದನ್ನು ತಿಳಿದುಕೊಳ್ಳುವ ಸಲುವಾಗಿ ತನಿಖೆ ಮುಂದುವರೆದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
