ಡ್ಯಾಶ್​ಬೋರ್ಡ್ ಮೂಲಕ ಕ್ಷಣಕ್ಷಣ ಮಾಹಿತಿ ವೈದ್ಯಕೀಯ ಶಿಕ್ಷಣ ಸಚಿವ ಸುಧಾಕರ್ ಚಾಲನೆ | ಬಿಬಿಎಂಪಿ ವಾರ್ ರೂಂನಲ್ಲಿ ವೆಬ್​ಸೈಟ್ ಕಾರ್ಯಾರಂಭ

ಬೆಂಗಳೂರು: ಸಾರ್ವಜನಿಕರು, ಆಸ್ಪತ್ರೆ ಸಿಬ್ಬಂದಿ ಕರೊನಾ ಸೋಂಕಿತರ ಬಗ್ಗೆ ಕ್ಷಣಕ್ಷಣದ ಮಾಹಿತಿ ತಿಳಿದುಕೊಳ್ಳಲು ಕೋವಿಡ್-19 ಡ್ಯಾಶ್​ಬೋರ್ಡ್ ವೆಬ್​ಸೈಟ್ ಆರಂಭಿಸಲಾಗಿದೆ ಎಂದು ವೈದ್ಯಕೀಯ ಶಿಕ್ಷಣ ಸಚಿವ ಡಾ. ಕೆ. ಸುಧಾಕರ್ ತಿಳಿಸಿದ್ದಾರೆ.

ಬಿಬಿಎಂಪಿ ಕೇಂದ್ರ ಕಚೇರಿಯ ಕರೊನಾ ವಾರ್ ರೂಂನಲ್ಲಿ ಮಂಗಳವಾರ ಡ್ಯಾಶ್​ಬೋರ್ಡ್ ವೆಬ್​ಸೈಟ್ ಲೋಕಾರ್ಪಣೆಗೊಳಿಸಿ ಮಾತನಾಡಿದರು. ರಾಜ್ಯದ ಯಾವುದೇ ಮೂಲೆಯಲ್ಲಿ ಕರೊನಾ ಸೋಂಕಿತರ ಪ್ರಮಾಣ ಎಷ್ಟಿದೆ ಎಂಬುದರ ಮಾಹಿತಿಯನ್ನು ಸಾರ್ವಜನಿಕರು ಕೋವಿಡ್-19 ಡ್ಯಾಶ್​ಬೋರ್ಡ್ ವೆಬ್​ಸೈಟ್ ಮೂಲಕ ಮಾಹಿತಿ ಪಡೆಯಬಹುದಾಗಿದೆ. ರಾಜ್ಯದ ಸೋಂಕಿತರು, ಶಂಕಿತರು ಹಾಗೂ ಕ್ವಾರಂಟೈನ್ ಮಾಡಲಾದ ಸಾರ್ವಜನಿಕರ ಬಗ್ಗೆ ಆ ಕ್ಷಣದ ಮಾಹಿತಿಯನ್ನು ಇದರಲ್ಲಿ ಅಪ್ಲೋಡ್ ಮಾಡಲಾಗುತ್ತದೆ ಎಂದರು.

ರಾಜ್ಯದ ಎಲ್ಲ ಹಳ್ಳಿಗಳು, ನಗರದ ಎಲ್ಲ ವಾರ್ಡ್ ಗಳ ಬಗ್ಗೆ ಮಾಹಿತಿ ಲಭ್ಯವಾಗುತ್ತದೆ. ಜತೆಗೆ ಕರೊನಾ ಸೋಂಕಿನ ಲಕ್ಷಣಗಳು ಕಂಡುಬಂದಲ್ಲಿ ಸಾರ್ವಜನಿಕರು ಆಸ್ಪತ್ರೆಗೆ ಹೋಗಿ ಚಿಕಿತ್ಸೆ ಪಡೆದುಕೊಳ್ಳುವುದು ಮುಖ್ಯವಾಗಿದೆ. ಈ ನಿಟ್ಟಿನಲ್ಲಿ ರಾಜ್ಯಾದ್ಯಂತ ಕರೊನಾ ಚಿಕಿತ್ಸೆಗೆ ಆರಂಭಿಸಲಾದ ಆಸ್ಪತ್ರೆಗಳು, ಹಾಸಿಗೆಗಳು ಹಾಗೂ ವೈದ್ಯರ ಲಭ್ಯತೆಯ ಬಗ್ಗೆ ತಿಳಿಯಲು ಡ್ಯಾಶ್​ಬೋರ್ಡ್ ಸಹಾಯಕಾರಿಯಾಗಿದೆ. ರಾಜ್ಯದಲ್ಲಿ ಕರೊನಾ ಕುರಿತು ಸ್ಪಷ್ಟ ಅಂಕಿ-ಅಂಶಗಳನ್ನು ಒದಗಿಸಲು ಹಾಗೂ ಸೋಂಕಿತರ ಮೇಲೆ ನಿಗಾವಹಿಸಲು ಡ್ಯಾಶ್​ಬೋರ್ಡ್ ನೆರವಾಗುತ್ತದೆ ಎಂದು ಮಾಹಿತಿ ನೀಡಿದರು. ಬಿಬಿಎಂಪಿ ಆಯುಕ್ತ ಬಿ.ಎಚ್. ಅನಿಲ್​ಕುಮಾರ್ ಮತ್ತಿತರ ಅಧಿಕಾರಿಗಳು ಉಪಸ್ಥಿತರಿದ್ದರು.

ಚಿಕಿತ್ಸಾ ಆ್ಯಪ್ ಸಂಪರ್ಕ: ಕರೊನಾ ಚಿಕಿತ್ಸೆಗಾಗಿ ಆರಂಭಿಸಿರುವ ಫೀವರ್ ಕ್ಲಿನಿಕ್​ಗಳ ಮಾಹಿತಿಗಳು, ಸಂಪರ್ಕ ಸೇತು ಆ್ಯಪ್, ವಲಸೆ ಕಾರ್ವಿುಕರ ಸಹಾಯವಾಣಿ ಆ್ಯಪ್, ಸಹಾಯವಾಣಿ ಕರೆಗಳು ಹಾಗೂ ದೂರುಗಳು, ಆಸ್ಪತ್ರೆಗಳಿಂದ ಲಭ್ಯವಾಗುವ ಎಲ್ಲ ಮಾಹಿತಿಗಳನ್ನು ಇಲ್ಲಿ 24 ಗಂಟೆಗಳ ಕಾಲವೂ ಪ್ರತಿ ಕ್ಷಣ ಅಪ್ಲೋಡ್ ಮಾಡಲಾಗುತ್ತದೆ ಎಂದು ಡಾ.ಕೆ. ಸುಧಾಕರ್ ತಿಳಿಸಿದ್ದಾರೆ.

https://www.vijayavani.net/golfer-arjun-bhati-gave-his-trophy-and-tournaments-to-help-pm-said-big-support/