ನಾಲ್ಕನೇ ಹಂತದ ನಿವೇಶನ ಹರಾಜಿನಲ್ಲಿ ಬಿಡಿಎಗೆ ಬಂಪರ್​ ಆದಾಯ

ಬೆಂಗಳೂರು: ಬಿಡಿಎ ಬಡಾವಣೆಗಳಲ್ಲಿನ ಮೂಲೆ ನಿವೇಶನಗಳ ನಾಲ್ಕನೇ ಹಂತದ ಇ ಹರಾಜು ಪ್ರಕ್ರಿಯೆ ಮುಕ್ತಾಯಗೊಂಡಿದ್ದು, 445 ನಿವೇಶನಗಳ ಪೈಕಿ 332 ನಿವೇಶನಗಳು ಹರಾಜಾಗಿವೆ.

ಬಿಡಿಎ ಬಡಾವಣೆಗಳಲ್ಲಿನ ಖಾಲಿ ನಿವೇಶನಗಳಲ್ಲಿ ಇ ಹರಾಜಿನ ಮೂಲಕ ಮಾರಾಟ ಮಾಡಲಾಗುತ್ತಿದೆ. ಅದರಂತೆ ಅ. 12ರಿಂದ ಆರಂಭವಾಗಿದ್ದ ನಾಲ್ಕನೇ ಹಂತದ ಹರಾಜು ಪ್ರಕ್ರಿಯೆಯ ಬಿಡ್ಡಿಂಗ್​ ಸೋಮವಾರ ಮುಕ್ತಾಯಗೊಂಡಿದೆ. ಈ ಪ್ರಕ್ರಿಯೆಯಲ್ಲಿ ಬನಶಂಕರಿ, ಸರ್​ ಎಂ.ವಿಶ್ವೇಶ್ವರಯ್ಯ, ಜೆ.ಪಿ.ನಗರ, ಅರ್ಕಾವತಿ ಬಡಾವಣೆ, ಬಿಟಿಎಂ ಬಡಾವಣೆಗಳಲ್ಲಿನ 448 ನಿವೇಶನಗಳು ಹರಾಜಿಗೊಳಪಟ್ಟಿದ್ದವು. ಅದರಲ್ಲಿ 448 ನಿವೇಶನಗಳನ್ನು ಹರಾಜು ಪ್ರಕ್ರಿಯೆಗೆ ಒಳಪಡಿಸಲಾಗಿತ್ತು. ಅದರಲ್ಲಿ 3 ನಿವೇಶನಗಳನ್ನು ಆರಂಭದಲ್ಲಿಯೇ ಹಿಂಪಡೆಯಲಾಗಿತ್ತು. ಅಂತಿಮವಾಗಿ 445 ನಿವೇಶನಗಳ ಹರಾಜು ಮಾಡಲಾಗಿದ್ದು, 99 ನಿವೇಶನಗಳಿಗೆ ಯಾವುದೇ ಬಿಡ್​ ಸಲ್ಲಿಕೆಯಾಗಿಲ್ಲ. ಉಳಿದ 332 ನಿವೇಶನಗಳು ಹರಾಜಾಗಿವೆ.

109 ಕೋಟಿ ರೂ. ಆದಾಯ: 4ನೇ ಹಂತದ ಇ ಹರಾಜು ಪ್ರಕ್ರಿಯೆಯಲ್ಲಿ ಬಿಡಿಎ ಭರ್ಜರಿ ಆದಾಯಗಳಿಸಿದೆ. ಹಾರಾಜು ಪ್ರಕ್ರಿಯೆಯಲ್ಲಿ 1,790 ಬಿಡ್ಡುದಾರರು ಭಾಗವಹಿಸಿ ನಿವೇಶನಗಳಲ್ಲಿ ಖರೀದಿಸಿದ್ದಾರೆ. ಮಾರಾಟವಾದ ನಿವೇಶಗಳ ಮೂಲಬೆಲೆಯನ್ನು 171.95 ಕೋಟಿ ರೂ.ಗೆ ನಿಗದಿ ಮಾಡಲಾಗಿತ್ತು. ಆದರೆ, ಬಿಡ್ಡುದಾರರು 281.32 ಕೋಟಿ ರೂ. ಬಿಡ್​ ಸಲ್ಲಿಸಿ, ನಿವೇಶನಗಳನ್ನು ಪಡೆದಿದ್ದಾರೆ. ಒಟ್ಟಾರೆ 109.37 ಕೋಟಿ ರೂ. ಹೆಚ್ಚುವರಿ ಆದಾಯ ಬಂದಂತಾಗಿದೆ.