ಮಡಿಕೇರಿ: ಅಂತರ ರಾಷ್ಟ್ರೀಯ ಜನಾಂಗೀಯ ತಾರತಮ್ಯ ನಿರ್ಮೂಲನಾ ದಿನಾಚರಣೆ ಅಂಗವಾಗಿ ಕೊಡವ ನ್ಯಾಷನಲ್ ಸಂಘಟನೆ ಕೊಡವ ಲ್ಯಾಂಡ್‌ಗಾಗಿ ಹಕ್ಕೊತ್ತಾಯ ಮಂಡಿಸಿತು.
ಮೂರ್ನಾಡು ಬಲ್‌ಂಬೇರಿ ರಸ್ತೆಯಲ್ಲಿರುವ ಕಾಫಿ ಕ್ಯಾಸ್ಟಲ್ ಕೂರ್ಗ್‌ನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ವಿಚಾರ ಮಂಡಿಸಿದ ಸಿಎನ್‌ಸಿ ಅಧ್ಯಕ್ಷ ಎನ್.ಯು.ನಾಚಪ್ಪರವರು ಲೋಕಸಭಾ ಚುನಾವಣೆಯಲ್ಲಿ ಕೊಡವ ವಿರೋಧಿಗಳಿಗೆ ಮತ ಹಾಕಬಾರದು. ಕೊಡವ ಲ್ಯಾಂಡ್ ಸೇರಿದಂತೆ ೯ ಸಾಂವಿಧಾನಿಕ ಬೇಡಿಕೆಗಳು ಮತ್ತು ಕೊಡವ ಜನಾಂಗದ ಗೌರವಾನ್ವಿತ ಗುರಿಗಳನ್ನು ಪರಿಗಣನೆಗೆ ತೆಗೆದುಕೊಳ್ಳುವ ಅಭ್ಯರ್ಥಿಯನ್ನು ಬೆಂಬಲಿಸುವಂತೆ ತಿಳಿಸಿದರು.
ಆದಿಮ ಸಂಜಾತ ಕೊಡವ ಬುಡಕಟ್ಟು ಜನಾಂಗದ ವಿರುದ್ಧದ ಎಲ್ಲಾ ರೀತಿಯ ತಾರತಮ್ಯವನ್ನು ತೊಡೆದು ಹಾಕಬೇಕು. ಕೊಡವ ನೀತಿ, ಸ್ವಾಭಿಮಾನ ಮತ್ತು ಹಕ್ಕುಗಳನ್ನು ನುಂಗಲು ಹವಣಿಸುವ ಹಾಗೂ ಕೊಡವ ಜನಾಂಗೀಯ ಗುರುತು ಮತ್ತು ಅಸ್ತಿತ್ವವನ್ನು ಅಮಾನ್ಯಗೊಳಿಸುವ ಮೂಲಕ ಕೊಡವ ಅಸ್ತಿತ್ವ ಮರೆಮಾಚಿ ಆಶ್ರಯ ಪಡೆಯಲು ನಡೆಸುವ ಪ್ರಚೋದನೆಯನ್ನು ನಿಲ್ಲಿಸಬೇಕು ಎಂದು ಒತ್ತಾಯಿಸಿದರು.
ಮೀಸಲಾತಿ ಶೇ.೫೦ಕ್ಕಿಂತ ಹೆಚ್ಚು ಮೀರಬಾರದು ಎಂದು ಸುಪ್ರೀಂ ಕೋರ್ಟ್ ತನ್ನ ತೀರ್ಪನ್ನು ಸ್ಪಷ್ಟವಾಗಿ ಅಂಗೀಕರಿಸಿದೆ. ಈ ತೀರ್ಪಿನ ಹೊರತಾಗಿಯೂ ರಾಜ್ಯ ಸರ್ಕಾರ ಜನಸಂಖ್ಯಾಶಾಸ್ತ್ರೀಯವಾಗಿ ಭಾರವಾದ ಸಮುದಾಯವನ್ನು ತೃಪ್ತಿಪಡಿಸಲು, ಶೇ.೫೦ ಕ್ಕಿಂತ ಹೆಚ್ಚು ಮತ್ತು ಅಸಹಜ ಅಸಮರ್ಪಕ ಮೀಸಲಾತಿಯನ್ನು ಒದಗಿಸಿದೆ. ವಿಪರ್ಯಾಸವೆಂದರೆ, ಸಂವಿಧಾನದ ೭ನೇ ತಿದ್ದುಪಡಿಯಲ್ಲಿ ಕಲ್ಪಿಸಲಾದ ರಾಜ್ಯ ಮರುಸಂಘಟನೆ ಕಾಯ್ದೆ ೧೯೫೬ ರ ಪ್ರಕಾರ ಮೈಕ್ರೋ ಕೊಡವರನ್ನು ಎಸ್ಟಿ ಟ್ಯಾಗ್ ಅಡಿಯಲ್ಲಿ ಶಾಸನಬದ್ಧ ಗ್ಯಾರಂಟಿಯ ಮೂಲಕ ರಕ್ಷಿಸುವ ಮತ್ತು ಸಬಲೀಕರಣ ನೀಡುವ ಬದಲು ನಮ್ಮ ಹಕ್ಕನ್ನು ನಿಗ್ರಹಿಸುವ ಮತ್ತು ರದ್ದುಗೊಳಿಸುವ ಮೂಲಕ ಇದು ವ್ಯವಸ್ಥಿತವಾಗಿ ಸಾಂವಿಧಾನಿಕ ಉಲ್ಲಂಘನೆಯನ್ನು ನಡೆಸಿದೆ. ಇದು ಮೈನಸ್ಕ್ಯೂಲ್ ಮೈಕ್ರೋ ಕೊಡವರ ವಿರುದ್ಧದ ತಾರತಮ್ಯವಾಗಿದೆ ಎಂದು ನಾಚಪ್ಪ ಟೀಕಿಸಿದರು.
ಎಸ್ಟಿ ಟ್ಯಾಗ್ ಬೇಡಿಕೆಯನ್ನು ಹಳಿ ತಪ್ಪಿಸಲಾಗುತ್ತಿದೆ. ಸ್ವತಂತ್ರ ಭಾರತ ಸರ್ಕಾರವು ನಮ್ಮ ದೇಶದ ೬೪೫ ಬುಡಕಟ್ಟುಗಳಲ್ಲಿ ಕೊಡವ ಜನಾಂಗವನ್ನು ಒಂದು ಎಂದು ಮೀಸಲಿಟ್ಟಿದೆ. ಸರ್ಕಾರ ಪರಿವಾರ, ತಳವಾರರನ್ನು ಎಸ್ಟಿ ಪಟ್ಟಿಗೆ ಸೇರಿಸಿದೆ. ಕೊಡವ ಜಿಯೋ ರಾಜಕೀಯ ಸ್ವಾಯತ್ತತೆ ಹಕ್ಕುಗಳಿಗಾಗಿ ಮತ್ತು ೮ನೇ ಶೆಡ್ಯೂಲ್‌ನಲ್ಲಿ ಕೊಡವ ತಕ್ಕ್ ಹಕ್ಕುಗಳ ಸೇರ್ಪಡೆಗಾಗಿ ಭಾರತದ ಸಂವಿಧಾನ ಪರಿಶೀಲನಾ ಆಯೋಗದ ಶಿಫಾರಸುಗಳನ್ನು ನಿರ್ಲಕ್ಷಿಸಲಾಗಿದೆ ಎಂದು ದೂರಿದರು.
ಸರ್ಕಾರಗಳು ಮತ್ತು ಅದರ ಔದ್ಯೋಗಿಕ ಶಕ್ತಿಗಳು ಕೊಡವ ಜನಾಂಗದ ಜನಸಂಖ್ಯೆಯನ್ನು ಕಡಿಮೆ ಮಾಡಲು ಮತ್ತು ಕೊಡವ ಜನಾಂಗದ ಸಂಸ್ಕೃತಿಯನ್ನು ಜನಸಂಖ್ಯಾ ಪಲ್ಲಟದ ಮೂಲಕ ಹತ್ತಿಕ್ಕುವ ಪ್ರಯತ್ನ ಮಾಡುತ್ತಿವೆ. ಇದು ವಿಶ್ವದಾದ್ಯಂತ ಜನಾಂಗೀಯ, ಜನಾಂಗ, ಅಲ್ಪಸಂಖ್ಯಾತ ಬುಡಕಟ್ಟು, ಆದಿಮಸಂಜಾತ ಜನಸಂಖ್ಯೆಯ ರಕ್ಷಣೆಗೆ ಸಂಬಂಧಿಸಿದಂತೆ ವಿಶ್ವರಾಷ್ಟ್ರ ಸಂಸ್ಥೆ ರೂಪಿಸಿರುವ ಅಂತರರಾಷ್ಟ್ರೀಯ ಕಾನೂನಿಗೆ ವಿರುದ್ಧವಾಗಿದೆ ಎಂದರು.
ಈ ಸಂದರ್ಭದಲ್ಲಿ ಪ್ರಮುಖರಾದ ಬೊಪ್ಪಂಡ ಬೊಳ್ಳಮ್ಮ ನಾಣಯ್ಯ, ಅರೆಯಡ ಸವಿತಾ ಗಿರೀಶ್, ಚೋಳಪಂಡ ಜ್ಯೋತಿ ನಾಣಯ್ಯ, ಬೊಟ್ಟಂಗಡ ಸವಿತಾ ಗಿರೀಶ್, ಅಳ್ಮಂಡ ಜೈ, ಕಾಂಡೇರ ಸುರೇಶ್, ಅಜ್ಜಿಕುಟ್ಟೀರ ಲೋಕೇಶ್, ಚಂಬಂಡ ಜನತ್ ಇತರರು ಪಾಲ್ಗೊಂಡು ಸಿಎನ್‌ಸಿ ಬೇಡಿಕೆಗಳ ಪರವಾಗಿ ಪ್ರತಿಜ್ಞಾ ವಿಧಿ ಸ್ವೀಕರಿಸಿದರು.