ಬೆಂಗಳೂರು: ರಾಷ್ಟ್ರಪ್ರಶಸ್ತಿ ವಿಜೇತ ನಿರ್ದೇಶಕ ಮನೋಜ್ ಕುಮಾರ್ ಆ್ಯಕ್ಷನ್-ಕಟ್ ಹೇಳಿರುವ ‘ಪ್ರೇಮದ ಊರಲಿ’ ಚಿತ್ರಕ್ಕೆ ದೊಡ್ಡಮಟ್ಟದ ಸಕ್ಸಸ್ ದೊರೆತಿದೆ. ಬಾಕ್ಸಾಫೀಸ್ ಕಲೆಕ್ಷನ್ ಮತ್ತು ಆನ್‌ಲೈನ್ ಟಿಕೆಟ್ ಮಾರಾಟದಲ್ಲೂ ಸಿನಿಮಾ ದಾಖಲೆ ಬರೆಯುತ್ತಿದೆ. ಕಳೆದ ಸೆ. 25ರಂದು ರಿಲೀಸ್ ಆಗಿತ್ತು. ಈ ಚಿತ್ರ ತೆಲುಗಿಗೆ ‘ಪ್ರೇಮನೆ ಊರಿಲೊ’ ಎಂಬ ಟೈಟಲ್‌ನಲ್ಲಿ ಡಬ್ ಆಗಿ ಇದೇ 2ರಂದು ರಿಲೀಸ್ ಆಗಿದೆ. ಇನ್ನು ಸಣ್ಣ ಬಜೆಟ್‌ನಲ್ಲಿ ನಿರ್ಮಾಣವಾಗಿದ್ದ ಈ ಚಿತ್ರವು ಈಗಾಗಲೇ 15 ಕೋಟಿಗೂ ಅಧಿಕ ಗಳಿಕೆ ಮಾಡಿದೆ ಎಂದು ಬಾಕ್ಸಾಫೀಸ್ ಮೂಲಗಳು ವರದಿ ಮಾಡಿವೆ. ಕಲಾವಿದರಾದ ಶ್ರೀರಾಮ್, ರಂಗಾಯಣ ರಘು, ತಪಸ್ವಿನಿ ಪೂಣಚ್ಚ, ರಮಿಕಾ ಶಿವು ಅಭಿನಯಕ್ಕೆ ಮೆಚ್ಚುಗೆ ವ್ಯಕ್ತವಾಗಿದೆ. ಈ ಯಶಸ್ಸಿನ ಬೆನ್ನಲ್ಲೇ ಚಿತ್ರತಂಡವು ನಾಡಿನ ಪ್ರೇಕ್ಷಕರಿಗೆ ಧನ್ಯವಾದ ಅರ್ಪಿಸಿತು. ನಟ ಶ್ರೀರಾಮ್ ಮಾತನಾಡಿ, ‘ಈ ಸ್ಕ್ರಿಪ್ಟ್ ಮತ್ತು ತಂಡದ ಕೆಲಸಕ್ಕೆ ಮೂರು ವರ್ಷ ಸಮಯ ನೀಡಬೇಕಿತ್ತು. ಅದನ್ನೇ ಕೆಲವರು ಹಂಗಿಸಿದ್ದರು. ಆ ಮೂರು ವರ್ಷದ ಶ್ರಮಕ್ಕೆ ಇಂದು ಉತ್ತರ ದೊರೆತಿದೆ. ಇದು ನಿರ್ದೇಶಕರ 18 ವರ್ಷಗಳ ತಪಸ್ಸಿನ ಲ. ಕೆಲಸಗಳನ್ನು ನಂಬಿದಾಗ ಗೆಲುವು ನಮ್ಮದಾಗುತ್ತದೆ. ಆನ್‌ಲೈನ್ ಬುಕಿಂಗ್ ನೋಡಿದಾಗ ಕನಸೋ, ನನಸೋ ಅನಿಸುತ್ತದೆ. ಆ ಕನಸು, ನನಸಾಗಿರುವುದು ಪ್ರೇಕಕ್ಷರಿಂದ ಹಾಗಾಗಿ, ಈ ಗೆಲುವು ನಾಡಿನ ಜನತೆಗೆ ಅರ್ಪಣೆ’ ಎಂದರು. ರಂಗಾಯಣ ರಘು, ‘ಕೆಲ ವರ್ಷಗಳ ಹಿಂದೆ ಜನತೆ ಕತ್ತಲಿನ ಸಿನಿಮಾ ಗೆಲ್ಲಿಸಿದ್ದರು, ಇದೀಗ ಬೆಳಕಿನ ಚಿತ್ರವನ್ನು ಗೆಲ್ಲಿಸಿದ್ದಾರೆ. ಹೊಸಬರ, ಸಣ್ಣ ಬಜೆಟ್‌ಗಳಿಗೆ ‘ಪ್ರೇಮದ ಊರಲಿ’ ದೊಡ್ಡ ಮಾದರಿಯಾಗಲಿದೆ’ ಎಂದು ಖುಷಿಹಂಚಿಕೊಂಡರು.
