ಇಷ್ಟಕ್ಕೂ ಈ ಗೊಂದಲ ಯಾಕೆ? ಚಿತ್ರತಂಡದವರು ಯಾವ ವಿಭಾಗಕ್ಕೆ ಪ್ರಶಸ್ತಿ ಬರಬೇಕು ಎಂದು ಅರ್ಜಿ ಹಾಕಿದ್ದರು? ಎಂಬ ಪ್ರಶ್ನೆ ಬರುವುದು ಸಹಜ. ಆದರೆ, ಈ ವಿಷಯವಾಗಿ ಚಿತ್ರತಂಡದವರು ಸಹ ಸ್ಪಷ್ಟೀಕರಣಕ್ಕಾಗಿ ಕಾಯುತ್ತಿರುವುದಾಗಿ ‘ಡೊಳ್ಳು’ ಚಿತ್ರದ ನಿರ್ದೇಶಕ ಸಾಗರ್ ಪುರಾಣಿಕ್ ಹೇಳುತ್ತಾರೆ. ಈ ಕುರಿತು ವಿಜಯವಾಣಿ ಜತೆಗೆ ಮಾತನಾಡಿದವ ಅವರು, ‘ನಾವು ರಾಷ್ಟ್ರ ಪ್ರಶಸ್ತಿಗೆ ಅರ್ಜಿ ಸಲ್ಲಿಸುವಾಗ, ಅಲ್ಲೆಲ್ಲೂ ಸಿಂಕ್ ಸೌಂಡ್ನ ಉಲ್ಲೇಖವೇ ಇರಲಿಲ್ಲ. ಆಡಿಯೋಗ್ರಫಿ ಎಂಬ ವಿಭಾಗ ಮಾತ್ರ ಇತ್ತು. ನಮ್ಮ ಚಿತ್ರದ ಸೌಂಡಿಂಗ್ ಚೆನ್ನಾಗಿದ್ದರಿಂದ, ಆ ವಿಭಾಗಕ್ಕೆ ನಾವು ಟಿಕ್ ಮಾಡಿದ್ದೆವು. ಈಗ ಪ್ರಶಸ್ತಿ ಪಟ್ಟಿಯಲ್ಲಿ ಆಡಿಯೋಗ್ರಫಿ ವಿಭಾಗದಲ್ಲಿ ಬ್ರಾಕೆಟ್ನಲ್ಲಿ ಸಿಂಕ್ ಸೌಂಡ್ ಅಂತ ನಮೂದಿಸಲಾಗಿದೆ. ಈ ತರಹದ ವರ್ಗೀಕರಣ ಬೇರೆ ಯಾವ ಪ್ರಶಸ್ತಿಗೂ ಇಲ್ಲ. ಬರೀ ಇದೊಂದು ಪ್ರಶಸ್ತಿಗೆ ಏಕೆ ಹಾಕಿದ್ದಾರೋ ಗೊತ್ತಾಗುತ್ತಿಲ್ಲ. ಅರ್ಜಿಯಲ್ಲೇ ಫಾರ್ ಸಿಂಕ್ ಸೌಂಡ್ ಅಂತ ಬ್ರಾಕೆಟ್ನಲ್ಲಿ ಹಾಕಿದ್ದರೆ, ನಾವು ಟಿಕ್ ಮಾಡುತ್ತಿರಲಿಲ್ಲ. ನಾವೆಲ್ಲೂ ಇದು ಸಿಂಕ್ ಸೌಂಡ್ ಅಂತ ಹೇಳಿಲ್ಲ. ಏಕೆಂದರೆ, ಲೊಕೇಶನ್ನಲ್ಲಿ ನೇರವಾಗಿ ಲೈವ್ ರೆಕಾರ್ಡಿಂಗ್ ಮಾಡಿಲ್ಲ. ಕೆಲವು ಭಾಗಗಳು ಮಾತ್ರ ಲೈವ್ ಆಗಿ ರೆಕಾರ್ಡ್ ಮಾಡಲಾಗಿದೆಯೇ ಹೊರತು, ಮಿಕ್ಕಂತೆ ಆ ನಂತರ ಡಬ್ ಮಾಡಿಸಿ ಅಳವಡಿಸಿದ್ದೇವೆ. ಡೊಳ್ಳು ಕುಣಿತವಾದ್ದರಿಂದ, ಆಯ್ಕೆ ಸಮಿತಿಯವರು ನೇರವಾಗಿ ಲೊಕೇಶನ್ನಲ್ಲೇ ರೆಕಾರ್ಡ್ ಮಾಡಿರಬಹುದು ಅಂತ ಅಂದುಕೊಂಡಿರಬಹುದು. ಏಕೆಂದರೆ, ಡೊಳ್ಳು ಧ್ವನಿಯನ್ನು ಮರುಸೃಷ್ಟಿ ಮಾಡುವುದು ಅಷ್ಟು ಸುಲಭವಲ್ಲ. ಅದನ್ನು ಗಮನಿಸಿ ವಿಶೇಷವಾಗಿ ಪ್ರಶಸ್ತಿ ಕೊಟ್ಟಿರಬಹುದೇನೋ? ಹಾಗಾಗಿ, ಈ ಬಗ್ಗೆ ನನಗೆ ಗೊತ್ತಿಲ್ಲ. ನಾನು ಸಹ ಆಯ್ಕೆ ಸಮಿತಿಯಿಂದ ಸ್ಪಷ್ಟೀಕರಣಕ್ಕೆ ಕಾಯುತ್ತಿದ್ದೇನೆ’ ಎನ್ನುತ್ತಾರೆ.
