ಸೋಷಿಯಲ್ ಮೀಡಿಯಾವು ನಟರಿಗೆ ಮತ್ತು ಕಂಟೆಂಟ್ ಕ್ರಿಯೇಟರ್‌ಗಳಿಗೆ ಜನರನ್ನು ನೇರವಾಗಿ ತಲುಪಲು ಹಾಗೂ ಹೆಚ್ಚಿನ ಜನಪ್ರಿಯತೆ ಗಳಿಸಲು ಉತ್ತಮ ಅವಕಾಶಗಳನ್ನು ನೀಡುತ್ತದೆ ಎಂಬುದನ್ನು ಐಶ್ವರ್ಯಾ ಲಕ್ಷ್ಮೀ ಈ ಸಂದರ್ಭದಲ್ಲಿ ಮುಕ್ತವಾಗಿ ಒಪ್ಪಿಕೊಂಡಿದ್ದಾರೆ. ಇತ್ತೀಚಿನ ಬ್ಲಾಕ್‌ಬಸ್ಟರ್ ಹಿಟ್ ಸಿನಿಮಾ 'ವಾಳ 2' (Vazha 2) ಸಿನಿಮಾದ ನಾಯಕ ಹಶೀರ್ ಅವರು ಒಬ್ಬ ಪ್ರಭಾವಶಾಲಿ ಇನ್ಫ್ಲುಯೆನ್ಸರ್ ಆಗಿರುವುದನ್ನು ಉದಾಹರಿಸಿದ ಐಶ್ವರ್ಯಾ, ಜಾಲತಾಣಗಳ ಈ ರೀತಿಯ ಸಕಾರಾತ್ಮಕ ಅವಕಾಶಗಳ ಬಗ್ಗೆ ನನಗೆ ಸಂಪೂರ್ಣವಾಗಿ ತಿಳಿದಿದೆ ಎಂದಿದ್ದಾರೆ.
ಅಂದಹಾಗೆ, ನಟಿ ಐಶ್ವರ್ಯಾ ಲಕ್ಷ್ಮೀ ಅವರು 2025ರ ಸೆಪ್ಟೆಂಬರ್‌ನಲ್ಲಿ ಸಾಮಾಜಿಕ ಜಾಲತಾಣಗಳಿಂದ ವಿರಾಮ ಪಡೆದುಕೊಂಡರು. ಅಂದಿನಿಂದ ಅವರ ಸೋಷಿಯಲ್ ಮೀಡಿಯಾ ಬ್ಯಾನ್ ಮುಂದುವರಿದಿದೆ. ಘೋಷಣೆ ಮಾಡಿದ ಆ ಸಂದರ್ಭದಲ್ಲಿ ತಮ್ಮ ಇನ್ಸ್ಟಾಗ್ರಾಂನಲ್ಲಿ ಐಶ್ವರ್ಯಾ ಅವರು ಒಂದು ಪೋಸ್ಟ್ ಹಂಚಿಕೊಂಡಿದ್ದರು. ಅದರಲ್ಲಿ ಅವರು, ವೃತ್ತಿಪರ ನಟಿಯಾಗಿ ಮುಂದುವರಿಯಲು ಜಾಲತಾಣ ಅತ್ಯಗತ್ಯ ಎಂದೇ ದೀರ್ಘಕಾಲದವರೆಗೆ ನಂಬಿದ್ದೆ. ಕಾಲಕ್ಕೆ ತಕ್ಕಂತೆ ಬದಲಾಗಲು ಈ ಆನ್‌ಲೈನ್ ವೇದಿಕೆಗಳ ಬಳಕೆ ಅನಿವಾರ್ಯ ಎಂಬ ಭಾವನೆಯಲ್ಲಿದ್ದೆ. ಆದರೆ, ಕಾಲಾನಂತರದಲ್ಲಿ ಕೆಲಸದ ಮೇಲೆ ಗಮನಹರಿಸಬೇಕಿದ್ದ ನನ್ನನ್ನು ಸೋಷಿಯಲ್ ಮೀಡಿಯಾವೇ ಸಂಪೂರ್ಣವಾಗಿ ನಿಯಂತ್ರಿಸಲು ಆರಂಭಿಸಿತು ಎಂದು ಐಶ್ವರ್ಯಾ ಬೇಸರ ವ್ಯಕ್ತಪಡಿಸಿದರು.
ಅಲ್ಲದೆ, ಜಾಲತಾಣಗಳ ಬಳಕೆ ನನ್ನ ಸ್ವತಂತ್ರ ಆಲೋಚನಾ ಶಕ್ತಿಯ ಮೇಲೆ ನೆಗೆಟಿವ್ ಪ್ರಭಾವ ಬೀರುತ್ತಿರುವುದಲ್ಲದೆ, ನನ್ನ ಭಾಷೆ ಹಾಗೂ ಸಂವಹನ ಶೈಲಿಯನ್ನು ಸಹ ಬದಲಾಯಿಸುತ್ತಿದೆ ಎಂಬುದನ್ನು ಅರಿತುಕೊಂಡೆ. ಸಾಮಾನ್ಯ ಜೀವನದ ಸಣ್ಣಪುಟ್ಟ ಖುಷಿಗಳನ್ನು ಅನುಭವಿಸುವ ಸ್ವಾತಂತ್ರ್ಯವನ್ನೂ ಜಾಲತಾಣ ಕಸಿದುಕೊಳ್ಳುತ್ತಿದೆ ಎಂಬ ಭಾವನೆ ನನ್ನಲ್ಲಿ ಮೂಡಿತು. ಈ ಕಾರಣಕ್ಕೆ ನಾನು ಜಾಲತಾಣಗಳಿಂದ ದೂರ ಉಳಿಯುತ್ತಿದ್ದೇನೆ ಎಂದು ಐಶ್ವರ್ಯಾ ಅವರು ತಿಳಿಸಿದ್ದರು.
