ಆರತಿ ಬೆಳಗುವಾಗ ಸಲ್ಮಾನ್​ ಖಾನ್​ ಎಡವಟ್ಟು: ಪೂಜಾ ಕ್ರಮ ತಿಳಿಸಿದ ತಂಗಿ ಅರ್ಪಿತಾ; ಭಾಯ್​ಜಾನ್​ ವಿಡಿಯೋ ವೈರಲ್! Salman Khan

ಮುಂಬೈ: ಬಾಲಿವುಡ್‌ನ 'ಭಾಯ್‌ಜಾನ್' ಎಂದೇ ಖ್ಯಾತರಾಗಿರುವ ಸಲ್ಮಾನ್ ಖಾನ್ (Salman Khan) ತೆರೆಮೇಲೆ ವಿಲನ್‌ಗಳನ್ನು ಮನಬಂದಂತೆ ಥಳಿಸುವ ನಟನಾಗಿದ್ದಾರೆ. ಆದರೆ ನಿಜ ಜೀವನದಲ್ಲಿ ಎಷ್ಟು ಸರಳ ಹಾಗೂ ತಮಾಷೆಯ ಸ್ವಭಾವದವರು ಎನ್ನುವುದು ಈಗ ಮತ್ತೊಮ್ಮೆ ಸಾಬೀತಾಗಿದೆ.

ಸಲ್ಮಾನ್ ಖಾನ್ ತಮ್ಮ ಕುಟುಂಬದೊಂದಿಗೆ ಗಣಪತಿ ವಿಸರ್ಜನಾ ಸಂಭ್ರಮದಲ್ಲಿ ಪಾಲ್ಗೊಂಡಿದ್ದಾಗ ನಡೆದ ಒಂದು ಘಟನೆ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಸಕತ್ ವೈರಲ್ ಆಗುತ್ತಿದೆ. ಮಂಗಳವಾರ (ಸೆ.15) ರಾತ್ರಿ ಸಲ್ಮಾನ್​ ಸಹೋದರ ಸೊಹೈಲ್ ಖಾನ್ ನಿವಾಸದಲ್ಲಿ ನಡೆದ ಗಣಪತಿ ವಿಸರ್ಜನಾ ಕಾರ್ಯಕ್ರಮದಲ್ಲಿ ಖಾನ್ ಕುಟುಂಬ ಒಟ್ಟಿಗೆ ಸೇರಿ ಸಂಭ್ರಮಿಸಿತು. ಈ ವೇಳೆ ನಡೆದ ಒಂದು ಸನ್ನಿವೇಶ ಎಲ್ಲರ ಗಮನ ಸೆಳೆದಿದೆ.

ಗಣೇಶನಿಗೆ ಪೂಜೆ ಸಲ್ಲಿಸುವ ವೇಳೆ ಸಲ್ಮಾನ್ ಖಾನ್ ಭಕ್ತಿಯಿಂದ ಆರತಿ ತಟ್ಟೆಯನ್ನು ಹಿಡಿದಿದ್ದರು. ಆದರೆ, ಅವರು ತಟ್ಟೆಯನ್ನು ತಿರುಗಿಸುತ್ತಿದ್ದ ದಿಕ್ಕು ತಪ್ಪಾಗಿತ್ತು! ಅಪ್ರದಕ್ಷಿಣಾಕಾರವಾಗಿ ಆರತಿ ಮಾಡುತ್ತಿದ್ದ ಸಲ್ಮಾನ್ ಅವರ ತಪ್ಪು ಕಣ್ಣಿಗೆ ಬೀಳುತ್ತಿದ್ದಂತೆ ಹತ್ತಿರದಲ್ಲೇ ಇದ್ದ ತಂಗಿ ಅರ್ಪಿತಾ ಖಾನ್ ಶರ್ಮಾ ತಕ್ಷಣವೇ ಎಚ್ಚೆತ್ತುಕೊಂಡಿದ್ದಾರೆ.

ಅಣ್ಣ ಸಲ್ಮಾನ್​ನಿಗೆ ಕೈಯಲ್ಲಿರುವ ತಟ್ಟೆಯನ್ನು ಸರಿಯಾದ ದಿಕ್ಕಿಗೆ ತಿರುಗಿಸುವಂತೆ ಹೇಳಿದ ಅರ್ಪಿತಾ, ಪೂಜೆ ಮಾಡುವ ಸರಿಯಾದ ವಿಧಾನವನ್ನು ತಿಳಿಸಿಕೊಟ್ಟಿದ್ದಾರೆ. ತಮ್ಮ ತಪ್ಪನ್ನು ತಕ್ಷಣವೇ ಅರಿತುಕೊಂಡ ಸಲ್ಮಾನ್ ಖಾನ್, ಯಾವುದೇ ಮುಜುಗರವಿಲ್ಲದೆ ನಗುತ್ತಲೇ ತಂಗಿಯ ಮಾತನ್ನು ಒಪ್ಪಿಕೊಂಡು ಪೂಜೆ ಮುಂದುವರಿಸಿದ್ದಾರೆ. ಈ ಅಣ್ಣ-ತಂಗಿಯ ಬಾಂಧವ್ಯದ ಮುದ್ದಾದ ಕ್ಷಣ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ಅಭಿಮಾನಿಗಳ ಹೃದಯ ಗೆದ್ದಿದೆ.

ಈ ಹಬ್ಬದ ಸಂಭ್ರಮದಲ್ಲಿ ಸಲ್ಮಾನ್ ಖಾನ್ ಎಂದಿನಂತೆ ಬಹಳ ಸಿಂಪಲ್ ಆಗಿ ಕಾಣಿಸಿಕೊಂಡಿದ್ದು, ಕಪ್ಪು ಬಣ್ಣದ ಟಿ-ಶರ್ಟ್, ಪ್ರಿಂಟೆಡ್ ಜೀನ್ಸ್, ಅದಕ್ಕೆ ಮ್ಯಾಚ್ ಆಗುವ ಜಾಕೆಟ್ ಮತ್ತು ಹೇರ್‌ಸ್ಟೈಲ್‌ಗೆ ಒಪ್ಪುವಂತೆ ತಲೆಗೆ ಕಪ್ಪು ಬಣ್ಣದ ಟೋಪಿ ಧರಿಸಿ ಹ್ಯಾಂಡ್ಸಮ್ ಆಗಿ ಬಂದಿದ್ದರು.

ಇನ್ನು ತಂಗಿ ಅರ್ಪಿತಾ ಖಾನ್ ಹಸಿರು ಹಾಗೂ ಕಪ್ಪು ಬಣ್ಣದ ಸುಂದರವಾದ ಹೂವಿನ ವಿನ್ಯಾಸದ ಸಾಂಪ್ರದಾಯಿಕ ಉಡುಪಿನಲ್ಲಿ ಮಿಂಚಿದರು. ಇವರೊಂದಿಗೆ ಅಲ್ವಿರಾ ಖಾನ್ ಅಗ್ನಿಹೋತ್ರಿ, ಯುಲಿಯಾ ವಂತೂರ್, ಅರ್ಬಾಜ್ ಖಾನ್ ಪುತ್ರ ಅರ್ಹಾನ್ ಖಾನ್ ಹಾಗೂ ನಟ ವರುಣ್ ಶರ್ಮಾ ಸೇರಿದಂತೆ ಹಲವು ಆಪ್ತರು ಮತ್ತು ಕುಟುಂಬದವರು ಹಾಜರಿದ್ದು ಸಂಭ್ರಮವನ್ನು ಇಮ್ಮಡಿಗೊಳಿಸಿದರು.

ಸಲ್ಮಾನ್ ಖಾನ್ ಅವರ ಕುಟುಂಬದ ವಿಶೇಷತೆಯೇ ಅದು. ತಂದೆ ಸಲೀಂ ಖಾನ್ ಮುಸ್ಲಿಂ ಧರ್ಮದವರಾದರೆ, ತಾಯಿ ಸಲ್ಮಾ ಖಾನ್ (ಸುಶೀಲಾ ಚರಕ್) ಹಿಂದೂ ಧರ್ಮದ ಹಿನ್ನಲೆ ಹೊಂದಿದ್ದಾರೆ. ಹೀಗಾಗಿ ಖಾನ್ ಕುಟುಂಬದಲ್ಲಿ ಗಣೇಶೋತ್ಸವ, ಈದ್, ದೀಪಾವಳಿಯಂತಹ ಹಬ್ಬಗಳನ್ನು ಯಾವುದೇ ಭೇದಭಾವವಿಲ್ಲದೆ ಅತ್ಯಂತ ಸಡಗರದಿಂದ ಆಚರಿಸಲಾಗುತ್ತದೆ. ಸಲ್ಮಾನ್ ಖಾನ್ ಕಳೆದ ಹಲವು ವರ್ಷಗಳಿಂದ ತಪ್ಪದೆ ಗಣಪತಿ ಪೂಜೆ ಮತ್ತು ವಿಸರ್ಜನೆಯಲ್ಲಿ ಸಕ್ರಿಯವಾಗಿ ಭಾಗವಹಿಸುತ್ತಾ ಬಂದಿದ್ದಾರೆ, (ಏಜೆನ್ಸೀಸ್​).