ಇವರಿಬ್ಬರು... ಆ ಮಾತಿಗೆ ಕೆರಳಿ ಮಾಜಿ ವಕ್ತಾರ ಶೆಹಜಾದ್​ಗೆ ಹೊಡೆದ 'ರೈಸ್​ ಅಂಡ್​ ಫಾಲ್'​ ಶೋ ಸಹ ಸ್ಪರ್ಧಿ | Shahzad Poonawala

ಮುಂಬೈ: ಮಾಜಿ ಬಿಜೆಪಿ ವಕ್ತಾರ ಶೆಹಜಾದ್ ಪೂನಾವಾಲಾ ಮತ್ತು ಹಿಂದಿ ನಟಿ ಸ್ವರಾ ಭಾಸ್ಕರ್ ನಡುವೆ 'ರೈಸ್ ಅಂಡ್ ಫಾಲ್' (Rise and Fall) ಸೀಸನ್​ 2 ಎಂಬ ಹಿಂದಿ ರಿಯಾಲಿಟಿ ಗೇಮ್​ ಶೋನಲ್ಲಿ ನಡೆದ ಜಗಳದಲ್ಲಿ ಪ್ರತಿಸ್ಪರ್ಧಿಯೊಬ್ಬ ಶೆಹಜಾದ್​ಗೆ ಥಳಿಸಿದ ಘಟನೆ ಇದೀಗ ವೀಕ್ಷಕರಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ಈ 2ನೇ ಸೀಸನ್​ನಲ್ಲಿ ಒಟ್ಟು 15 ಸ್ಪರ್ಧಿಗಳು ಮನೆಯೊಳಗೆ ಎಂಟ್ರಿಕೊಟ್ಟಿದ್ದು, ಇವರ ಪೈಕಿ ಶೆಹಜಾದ್ ಪೂನಾವಾಲಾ ಮತ್ತು ಸ್ವರಾ ನಡುವೆ ಮಾತಿನ ಚಕಮಕಿ ನಡೆದಿದ್ದು, ಸರಣಿ ಆರೋಪ ಎಸಗಿದ ಶೆಹಜಾದ್​, ಮನೆಯ ಮತ್ತೊಬ್ಬ ಪುರುಷ ಸ್ಪರ್ಧಿಯಾದ ಸಿವೆಟ್ ತೋಮರ್​ರನ್ನು ಉಲ್ಲೇಖಿಸಿ ಮಾತನಾಡಿದ್ದೇ ದೈಹಿಕ ಒಡೆದಾಟಕ್ಕೆ ಕಾರಣ ಎನ್ನಲಾಗಿದೆ. ಪ್ರಸ್ತಿತ, ಶೆಹಜಾದ್​ಗೆ ಹೊಡೆದ ಸಿವೆಟ್​ ತೋಮರ್​ರನ್ನು ಸ್ಪಾಟ್​ ಎಲಿಮಿನೇಷನ್​ ಮಾಡಿ ಹೊರ ಕಳುಹಿಸಲಾಗಿದೆ.

ಸ್ವರಾ ಭಾಸ್ಕರ್ ಮತ್ತು ಸಿವೆಟ್ ತೋಮರ್ ಅವರನ್ನು ಟಾರ್ಗೆಟ್​ ಮಾಡಿಕೊಂಡು ಮಾತು ಶುರುಮಾಡಿದ ಶೆಹಜಾದ್​, ಸಿವೆಟ್‌ನ ಬೆನ್ನೆಲುಬನ್ನು ನೋಡಿ ಒಮ್ಮೆ. ಸ್ವರಾ ಭಾಸ್ಕರ್ ಜತೆ ಕುಳಿತಿರುವ ಆ ವ್ಯಕ್ತಿ ನನಗೆ ಉಪದೇಶ ಕೊಡಲು ಬರುತ್ತಾನೆ. ಇದೊಂದು ಬೂಟಾಟಿಕೆ. ಹೋಗಿ, ಮೈತ್ರಿ ಮಾಡಿಕೊಳ್ಳಿ. ಇದೇ ನಿಮ್ಮ ಮೈತ್ರಿ! ಟ್ಯಾಟೂ ಹಾಕಿಸಿಕೊಂಡು ಓಡಾಡುವ ವ್ಯಕ್ತಿ ಸ್ವರಾ ಭಾಸ್ಕರ್ ಜತೆ ಸೇರಿಕೊಂಡಿದ್ದಾನೆ ಎಂದರು. ಈ ಮಾತುಗಳಿಂದ ಕೆರಳಿದ ಸಿವೆಟ್​, ಸಿಟ್ಟಿನಿಂದ ಬಂದು ಶೆಹಜಾದ್​ಗೆ ಹೊಡೆದಿದ್ದಾರೆ.

ವೇಗವಾಗಿ ಶೆಹಜಾದ್ ಬಳಿ ಬಂದ ಸಿವೆಟ್​ರನ್ನು ತಡೆದ ಸ್ವರಾ, ಯಾವುದೇ ಕಾರಣಕ್ಕೂ ಕೈಎತ್ತಬೇಡ ಎಂದ ಹೇಳಿದರೂ ಶೆಹಜಾದ್ ಪೂನಾವಾಲಾಗೆ ಥಳಿಸಿದರು. ಜಗಳದಲ್ಲಿ ಇತರ ಸ್ಪರ್ಧಿಗಳು ಮಧ್ಯಪ್ರವೇಶಿಸಲು ಮುಂದಾಗಿದ್ದೇ ಆದರೂ ಹಲ್ಲೆಯನ್ನು ತಡೆಯಲು ಸಾಧ್ಯವಾಗಲಿಲ್ಲ. ಅಷ್ಟರಲ್ಲಾಗಲೇ, ಶೆಹಜಾದ್ ಪೂನಾವಾಲಾ ಕೆಳಗೆ ಬಿದ್ದಿದ್ದರು. ಈ ದೃಶ್ಯ ಇದೀಗ ಸೋಷಿಯಲ್​ ಮೀಡಿಯಾದಲ್ಲಿ ಭಾರಿ ವೈರಲ್​ ಆಗಿದ್ದು ಹಿಂದಿ ವೀಕ್ಷಕರ ಅಸಮಾಧಾನಕ್ಕೆ ಕಾರಣವಾಗಿದೆ. ಶೆಹಜಾದ್, ಸಿವೆಟ್​ರನ್ನು ಕೆಣಕ್ಕಿದ್ದೆ ಈ ಘಟನೆಗೆ ಕಾರಣ ಎಂಬ ಆರೋಪಗಳು ಕೇಳಿಬಂದಿವೆ,(ಏಜೆನ್ಸೀಸ್).