ತಿರುಪ್ಪರಕುಂದ್ರಂ ದೇವಸ್ಥಾನ ದೀಪ ವಿವಾದ; ತಮಿಳುನಾಡು ಸಿಎಸ್​, ಎಡಿಜಿಪಿಗೆ ಸಮನ್ಸ್ ನೀಡಿದ ಮದ್ರಾಸ್ ಹೈಕೋರ್ಟ್​ | Madras HC

ಚೆನ್ನೈ: ತಮಿಳುನಾಡಿನಲ್ಲಿ ರಾಜಕೀಯ ವಿವಾದಕ್ಕೆ ಕಾರಣವಾಗಿರುವ ತಿರುಪ್ಪರಕುಂದ್ರಂ ಮುರುಗನ್ ದೇವಸ್ಥಾನದ ದೀಪ ಹಚ್ಚುವ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮುಖ್ಯಕಾರ್ಯದರ್ಶಿ ಮತ್ತು ಹೆಚ್ಚುವರಿ ಪೊಲೀಸ್ ಮಹಾನಿರ್ದೇಶಕರಿಗೆ(ಕಾನೂನು & ಸುವ್ಯವಸ್ಥೆ) ಡಿ. 17ರಂದು ವಿಡಿಯೋ ಕಾನ್ಫರೆನ್ಸ್ ಮೂಲಕ ನ್ಯಾಯಾಲಯಕ್ಕೆ ಹಾಜರಾಗುವಂತೆ ಮಂಗಳವಾರ(ಡಿ. 09) ಮದ್ರಾಸ್ ಹೈಕೋರ್ಟ್​ನ(Madras HC) ಮಧುರೈ ಪೀಠವು ಸಮನ್ಸ್ ನೀಡಿದೆ.

ಡಿ. 03ರಂದು ಮುರುಗನ್ ದೇವಸ್ಥಾನದ ಬೆಟ್ಟದ ಮೇಲಿನ ದೀಪಥೂನ್​ನಲ್ಲಿ ದೀಪ ಹಚ್ಚಲು ಅವಕಾಶ ನೀಡಿದ್ದ ಹೈಕೋರ್ಟ್​ನ ಏಕಸದಸ್ಯ ಪೀಠದ ತೀರ್ಪನ್ನು ಕೋಮುಸಂಘರ್ಷ ನಡೆಯುವ ಮತ್ತು ಕಾನೂನು ಸುವ್ಯವಸ್ಥೆ ನೆಪವೊಡ್ಡಿ ರಾಜ್ಯ ಸರ್ಕಾರ ಪಾಲಿಸಿರಲಿಲ್ಲ. ಪ್ರತಿವರ್ಷದಂತೆ ನಡೆಯುವ ಆಚರಣೆಯನ್ನು ಮಾತ್ರ ನಡೆಸಲು ಅವಕಾಶ ನೀಡಿತ್ತು.

ನ್ಯಾಯಾಲಯದ ಹಿಂದಿನ ಆದೇಶಗಳನ್ನು ಪಾಲಿಸದ ಕಾರಣ ಮಧುರೈ ಜಿಲ್ಲಾಧಿಕಾರಿ, ಪೊಲೀಸ್ ಆಯುಕ್ತರು ಮತ್ತು ತಿರುಪ್ಪರಕುಂದ್ರಂನ ಅರುಲ್ಮಿಘು ಸುಬ್ರಹ್ಮಣ್ಯ ಸ್ವಾಮಿ ದೇವಸ್ಥಾನದ ಕಾರ್ಯನಿರ್ವಾಹಕ ಅಧಿಕಾರಿಯ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಕೋರಿ ರಾಮ್ ರವಿಕುಮಾರ್ ಎಂಬುವರು ನ್ಯಾಯಾಂಗ ನಿಂದನೆ ಅರ್ಜಿ ಸಲ್ಲಿಸಿದ್ದರು.

ನ್ಯಾಯಾಂಗ ನಿಂದನೆ ಅರ್ಜಿಯ ವಿಚಾರಣೆ ನಡೆಸಿದ ಹೈಕೋರ್ಟ್ ನ್ಯಾ. ಜಿ.ಆರ್. ಸ್ವಾಮಿನಾಥನ್, ಉನ್ನತ ಅಧಿಕಾರಿಗಳು ನ್ಯಾಯಾಲಯದ ಮುಂದೆ ಹಾಜರಾಗುವಂತೆ ಸೂಚಿಸಿದರು. ಇದೇ ವೇಳೆ ತಿರುಪ್ಪರಕುಂದ್ರಂ ಬೆಟ್ಟದ ಮೇಲೆ ದೀಪ ಬೆಳಗಿಸುವ ಬಗ್ಗೆ ಏಕ ಸದಸ್ಯ ಪೀಠದ ಆದೇಶವನ್ನು ಪ್ರಶ್ನಿಸಿ ತಮಿಳುನಾಡು ಅಧಿಕಾರಿಗಳು ಸಲ್ಲಿಸಿರುವ ವಿಶೇಷ ರಜೆ ಅರ್ಜಿ ಸುಪ್ರೀಂ ಕೋರ್ಟ್‌ನಲ್ಲಿ ಬಾಕಿ ಇದೆ ಎಂದು ರಾಜ್ಯದ ಪರವಾಗಿ ಹಾಜರಾದ ಹೆಚ್ಚುವರಿ ಅಡ್ವೊಕೇಟ್ ಜನರಲ್ ವೀರ ಕಥಿರವನ್ ಮಾಹಿತಿ ನೀಡಿದರು.

ಡಿ. 3ರಂದು ಕಾರ್ತಿಗೈ ದೀಪಂ ಹಬ್ಬದ ಸಂದರ್ಭದಲ್ಲಿ ತಿರುಪ್ಪರಕುಂದ್ರಂ ಬೆಟ್ಟದಲ್ಲಿರುವ ಕಲ್ಲಿನ ಕಂಬದ ಮೇಲೆ ದೀಪ ಬೆಳಗಿಸಲು ವ್ಯವಸ್ಥೆ ಮಾಡುವಂತೆ ಡಿ. 1ರಂದು ಮಧುರೈ ಹೈಕೋರ್ಟ್ ಪೀಠದ ನ್ಯಾ. ಸ್ವಾಮಿನಾಥನ್ ದೇವಾಲಯ ಆಡಳಿತ ಮಂಡಳಿಗೆ ಆದೇಶಿಸಿದ್ದರು. ಆದರೆ, ನ್ಯಾಯಾಲಯದ ಆದೇಶದ ಹೊರತಾಗಿಯೂ ಕಾರ್ಯಕ್ರಮ ನಡೆಯದಿದ್ದಾಗ, ನ್ಯಾಯಾಧೀಶರು ಡಿ. 3ರ ಸಂಜೆ ಅರ್ಜಿದಾರರು ಮತ್ತು ಇತರ ಹತ್ತು ಜನರಿಗೆ CISF ರಕ್ಷಣೆಯೊಂದಿಗೆ ದೀಪ ಬೆಳಗಿಸಲು ಮತ್ತೊಮ್ಮೆ ಅನುಮತಿ ನೀಡಿ ಆದೇಶಿಸಿದ್ದರು.

ಆದರೆ ಮಧುರೈ ಜಿಲ್ಲಾಡಳಿತ ಕೋಮು ಸಂಘರ್ಷದ ನೆಪವೊಡ್ಡಿ ತಿರುಪ್ಪರಕುಂದ್ರಂನಲ್ಲಿ ಸೆಕ್ಷನ್ 144 ಸೆಕ್ಷನ್ ಜಾರಿಗೊಳಿಸಿ, ನ್ಯಾಯಾಲಯ ಆದೇಶವನ್ನು ಪಾಲಿಸಲಿಲ್ಲ. ಈ ಹಿನ್ನೆಲೆ ಡಿ. 4ರಂದು ನ್ಯಾಯಾಂಗ ನಿಂದನೆ ಅರ್ಜಿಯನ್ನು ಅಂಗೀಕರಿಸಿದ ನ್ಯಾಯಾಲಯ, ಕಾರ್ತಿಗೈ ದೀಪಂ ಹಬ್ಬದ ಸಂದರ್ಭದಲ್ಲಿ ಜಿಲ್ಲಾಧಿಕಾರಿ ಜಾರಿಗೊಳಿಸಿದ್ದ ನಿಷೇಧಾಜ್ಞೆಯನ್ನು ರದ್ದುಗೊಳಿಸಿತು. ನಿನ್ನೆ ವಿಚಾರಣೆ ನಡೆಸಿ ನ್ಯಾಯಾಧೀಶರು ಸಿಎಸ್, ಎಡಿಜಿಪಿಗೆ ಕೋರ್ಟ್​ಗೆ ಹಾಜರಾಗುವಂತೆ ನಿರ್ದೇಶನ ನೀಡಿದ್ದಾರೆ.

ತಿರುಪ್ಪನಕುಂದ್ರಂ ಬೆಟ್ಟದ ಮೇಲೆ ದೀಪ ಬೆಳಗಿಸಲು ಅವಕಾಶ ನೀಡಿದ ನ್ಯಾ.ಜಿ.ಆರ್.ಸ್ವಾಮಿನಾಥನ್ ಅವರು, ಪಕ್ಷಪಾತಿಯಾಗಿದ್ದಾರೆಂದು ಆರೋಪಿಸಿ ಮಂಗಳವಾರ ಡಿಎಂಕೆ ನಾಯಕ ಕನ್ನಿಮೊಳಿ, ಕಾಂಗ್ರೆಸ್‌ನ ಪ್ರಿಯಾಂಕಾ ಗಾಂಧಿ ವಾದ್ರಾ, ಸಮಾಜವಾದಿ ಪಕ್ಷದ ಮುಖ್ಯಸ್ಥ ಅಖಿಲೇಶ್ ಯಾದವ್ ಸೇರಿದಂತೆ 120 ಕ್ಕೂ ಹೆಚ್ಚು ವಿರೋಧ ಪಕ್ಷದ ಸಂಸದರು ಸಹಿ ಮಾಡಿದ ಪ್ರಸ್ತಾವನೆಯೊಂದಿಗೆ ಮಹಾಭಿಯೋಗ ಆರಂಭಿಸುವಂತೆ ಒತ್ತಾಯಿಸಿದ್ದಾರೆ (ಏಜೆನ್ಸೀಸ್).