Bondi Beach attack | ತಂದೆಯೊಂದಿಗೆ ನವೀದ್ ಅಕ್ರಂ ಶೂಟಿಂಗ್ ಪ್ರ್ಯಾಕ್ಟೀಸ್: ಬಾಂಡಿ ಬೀಚ್ ದಾಳಿ ಪೂರ್ವನಿಯೋಜಿತ: ಪೊಲೀಸರ ತನಿಖೆ ಬಹಿರಂಗ

ಸಿಡ್ನಿ ಆಸ್ಪತ್ರೆಯಲ್ಲಿ ಹೊಟ್ಟೆಯ ಗಾಯಕ್ಕೆ ಚಿಕಿತ್ಸೆ ಪಡೆಯುತ್ತಿರುವ ನವೀದ್ ಅಕ್ರಮ್​ನನ್ನು ವಿಡಿಯೋ ಕೋರ್ಟ್‌ಗೆ ಹಾಜರುಪಡಿಸಿದ ನಂತರ ಈ ದಾಖಲೆಗಳು ಬಹಿರಂಗಗೊಂಡಿವೆ. ಅಲ್ಲದೆ, ಇಬ್ಬರು ವ್ಯಕ್ತಿಗಳು ನಿಖರವಾಗಿ ಯೋಜಿಸಲಾದ ದಾಳಿಯನ್ನು ಸಮರ್ಥಿಸುವ ದೃಶ್ಯಗಳನ್ನು ರೆಕಾರ್ಡ್ ಮಾಡಿದ್ದಾರೆ ಎಂದು ಹೇಳಿದ್ದಾರೆ.

ಡಿಸೆಂಬರ್ 14 ರಂದು ನಡೆದ ಗುಂಡಿನ ದಾಳಿಯ ಸ್ಥಳದಲ್ಲಿ ಅಧಿಕಾರಿಗಳು ಅಕ್ರಮ್​ನನ್ನು ಗಾಯಗೊಳಿಸಿದರು ಮತ್ತು ಅವರ ತಂದೆ 50 ವರ್ಷದ ಸಾಜಿದ್ ಅಕ್ರಮ್ ಅವರನ್ನು ಕೊಂದರು.

ಈ ಬಗ್ಗೆ ಮಾಹಿತಿ ಹಂಚಿಕೊಂಡಿರುವ ಪೊಲೀಸರು ಸಿಕ್ಕ ಆ ಸಾಧನಗಳನ್ನು ಮೂರು ಅಲ್ಯೂಮಿನಿಯಂ ಪೈಪ್ ಬಾಂಬ್‌ಗಳು ಮತ್ತು ಸ್ಫೋಟಕ, ಗನ್‌ಪೌಡರ್ ಮತ್ತು ಸ್ಟೀಲ್ ಬಾಲ್ ಬೇರಿಂಗ್‌ಗಳನ್ನು ಒಳಗೊಂಡಿರುವ ಟೆನ್ನಿಸ್ ಬಾಲ್ ಬಾಂಬ್ ಎಂದು ವಿವರಿಸಿದ್ದಾರೆ. ಅಲ್ಲದೆ, ಇವುಗಳಲ್ಲಿ ಯಾವುದೂ ಸ್ಫೋಟಿಸಲಿಲ್ಲ. ಆದರೆ ಪೊಲೀಸರು ಅವುಗಳನ್ನು ಕಾರ್ಯಸಾಧ್ಯ ಐಇಡಿಗಳು ಎಂದು ತಿಳಿಸಿದ್ದಾರೆ.

ದಾಳಿಯ ದಿನ ಬೆಳಗಿನ ಜಾವ 2:16 ಕ್ಕೆ ಹೊರಟು ಹೋಗುವ ಮೊದಲು, ಸಿಡ್ನಿಯ ಉಪನಗರ ಕ್ಯಾಂಪ್ಸಿಯಲ್ಲಿ ಮೂರು ವಾರಗಳ ಕಾಲ ಕೊಠಡಿಯನ್ನು ಬಾಡಿಗೆಗೆ ಪಡೆದಿದ್ದ ಈ ಜೋಡಿಯು, ಎರಡು ಶಾಟ್‌ಗನ್‌ಗಳು, ಒಂದು ರೈಫಲ್, ಐದು ಐಇಡಿಗಳು ಮತ್ತು ಎರಡು ಮನೆಯಲ್ಲಿ ತಯಾರಿಸಿದ ಇಸ್ಲಾಮಿಕ್ ಸ್ಟೇಟ್ ಗುಂಪಿನ ಧ್ವಜಗಳನ್ನು ಕಂಬಳಿಗಳಲ್ಲಿ ಸುತ್ತಿ ಹೊತ್ತೊಯ್ಯುತ್ತಿರುವುದು ಸಿಸಿಟಿವಿಯಲ್ಲಿ ದೃಶ್ಯದಲ್ಲಿ ದಾಖಲಾಗಿದೆ.

ಬಂದೂಕುಧಾರಿಗಳು ಪಾದಚಾರಿ ಸೇತುವೆಯಿಂದ ಗುಂಡು ಹಾರಿಸುತ್ತಿರುವ ಚಿತ್ರಗಳನ್ನು ಪೊಲೀಸರು ಬಿಡುಗಡೆ ಮಾಡಿದ್ದು, ಇದು ಅವರಿಗೆ ಎತ್ತರದ ವಾಂಟೇಜ್ ಪಾಯಿಂಟ್ ಮತ್ತು ಸೊಂಟದ ಎತ್ತರದ ಕಾಂಕ್ರೀಟ್ ಗೋಡೆಗಳ ರಕ್ಷಣೆಯನ್ನು ಒದಗಿಸಿದೆ. ಅಲ್ಲದೆ, ಪಾದಚಾರಿ ಸೇತುವೆಯ ಬಳಿ ಗುಂಡಿನ ಚಕಮಕಿಯ ನಂತರ, ಮಗನ ಕಾರಿನ ಡಿಕ್ಕಿಯಲ್ಲಿ ಅತಿದೊಡ್ಡ ಐಇಡಿ ಪತ್ತೆಯಾಗಿದ್ದು, ಆ ಕಾರಿನ ಮೇಲೆ ಧ್ವಜಗಳನ್ನು ಹೊದಿಸಲಾಗಿತ್ತು.

ನವೀದ್ ಅಕ್ರಮ್​ನನ್ನು ಸೋಮವಾರ ಆಸ್ಪತ್ರೆಯಿಂದ ಜೈಲಿಗೆ ವರ್ಗಾಯಿಸಲಾಗಿದೆ ಎಂದು ರಾಜ್ಯ ಸರ್ಕಾರ ದೃಢಪಡಿಸಿದೆ. 24 ವರ್ಷದ ಯುವಕ ಮತ್ತು ಆತನ ತಂದೆ ಬೋಂಡಿ ಬೀಚ್‌ನಲ್ಲಿ ವಾರ್ಷಿಕ ಯಹೂದಿ ಕಾರ್ಯಕ್ರಮವನ್ನು ಆಚರಿಸುತ್ತಿದ್ದ ಜನಸಮೂಹದ ಮೇಲೆ ನಾಲ್ಕು ಸುಧಾರಿತ ಸ್ಫೋಟಕ ಸಾಧನಗಳನ್ನು ಎಸೆದು ತಮ್ಮ ದಾಳಿಯನ್ನು ಪ್ರಾರಂಭಿಸಿದರು. ಆದರೆ ಆ ಸಾಧನಗಳು ಸ್ಫೋಟಗೊಳ್ಳಲು ವಿಫಲವಾದವು ಎಂದು ದಾಖಲೆಗಳು ತಿಳಿಸಿವೆ.

ಅಧಿಕಾರಿಗಳು ಅಕ್ರಮ್ ವಿರುದ್ಧ 59 ಅಪರಾಧಗಳನ್ನು ಹೊರಿಸಿದ್ದಾರೆ. ಇದರಲ್ಲಿ 15 ಕೊಲೆ ಆರೋಪಗಳು, ಗಾಯಗೊಂಡ ಬದುಕುಳಿದವರಿಗೆ ಸಂಬಂಧಿಸಿದಂತೆ ಕೊಲೆ ಮಾಡುವ ಉದ್ದೇಶದಿಂದ ಹಾನಿ ಉಂಟುಮಾಡಿದ 40 ಆರೋಪಗಳು ಮತ್ತು ಭಯೋತ್ಪಾದಕ ಕೃತ್ಯ ಎಸಗಿದ ಒಂದು ಆರೋಪ ಸೇರಿಸಿದ್ಧಾರೆ.

1996 ರಲ್ಲಿ ಟ್ಯಾಸ್ಮೇನಿಯಾ ರಾಜ್ಯದಲ್ಲಿ ಒಬ್ಬನೇ ಬಂದೂಕುಧಾರಿ 35 ಜನರನ್ನು ಕೊಂದ ನಂತರ, ಎಂಟು ದಿನಗಳ ಹನುಕ್ಕಾ ಆಚರಣೆಯ ಆರಂಭದಲ್ಲಿ ನಡೆದ ಯೆಹೂದ್ಯ ವಿರೋಧಿ ದಾಳಿಯು ಆಸ್ಟ್ರೇಲಿಯಾದ ಅತ್ಯಂತ ಭೀಕರ ಸಾಮೂಹಿಕ ಗುಂಡಿನ ದಾಳಿಯಾಗಿದೆ,(ಏಜೆನ್ಸೀಸ್).