ಎಂ.ಕೆ.ಸ್ಟಾಲಿನ್ ಸೋಲು; ವಿಪಕ್ಷ ನಾಯಕರಾಗುತ್ತಾರಾ? ಉದಯನಿಧಿ; ವಿಧಾನಸಭೆಯಲ್ಲಿ ವಿಜಯ್ ಮತ್ತು ಉದಯನಿಧಿ ಫೈಟ್! | Udayanidhi Stalin

Udayanidhi Stalin: ತಮಿಳುನಾಡು ವಿಧಾನಸಭೆ ಚುನಾವಣೆಯಲ್ಲಿ ಮೊದಲ ಪ್ರವೇಶದಲ್ಲೇ 108 ಸ್ಥಾನಗಳನ್ನು ಗೆಲ್ಲುವ ಮೂಲಕ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿರುವ ಸೂಪರ್ ಸ್ಟಾರ್ ವಿಜಯ್ ನೇತೃತ್ವದ ಟಿವಿಕೆ, ಕಾಂಗ್ರೆಸ್ ಮತ್ತು ಸಣ್ಣಪಕ್ಷಗಳ ಬೆಂಬಲದೊಂದಿಗೆ ಸರ್ಕಾರ ರಚಿಸಲು ಹಕ್ಕು ಮಂಡಿಸಿದ್ದು, ಬಹುಶಃ ನಾಳೆ ಸಿಎಂ ಆಗಿ ವಿಜಯ್ ಪ್ರಮಾಣವಚನ ಸ್ವೀಕರಿಸಬಹುದು.

ವಿಜಯ್ ಸಿಎಂ ಆದರೆ, ವಿಪಕ್ಷ ನಾಯಕ ಯಾರಗಬಹುದು ಎಂದು ಚರ್ಚೆ ಎದ್ದಿದೆ. ಕಳೆದ ಐದು ವರ್ಷಗಳ ಕಾಲ ದ್ರಾವಿಡ ಮಾಡಲ್ ಹೆಸರಲ್ಲಿ ಅಧಿಕಾರವನ್ನು ನಡೆಸಿದ್ದ ಡಿಎಂಕೆ, ಕಡಿಮೆ ಆಡಳಿತ ವಿರೋಧಿ ಅಲೆಯ ನಡುವೆಯೂ ಟಿವಿಕೆಯ ಅರ್ಭಟಕ್ಕೆ ಎರಡನೇ ಸ್ಥಾನಕ್ಕೆ ಕುಸಿದಿದ್ದು, ವಿಪಕ್ಷದಲ್ಲಿ ಕೂರುವಂತಾಗಿದೆ. ಜೊತೆಗೆ ಸ್ವತಃ ಸಿಎಂ ಸ್ಟಾಲಿನ್ ಅವರೇ, ತಮ್ಮ ಕ್ಷೇತ್ರವಾದ ಕೊಳತ್ತೂರಿನಲ್ಲಿ ಟಿವಿಕೆ ಅಭ್ಯರ್ಥಿ ಎದುರು ಸೋತಿದ್ದಾರೆ. 

ತಮಿಳುನಾಡಿನ ಈ ಬಾರಿಯ ವಿಧಾನಸಭೆ ದ್ರಾವಿಡ ಚಳುವಳಿಯ ಕೊಂಡಿಗಳನ್ನು ಬಿಟ್ಟು ಹೊಸಬರನ್ನು ಒಳಗೊಂಡಿದೆ. ಎಂ.ಕೆ. ಸ್ಟಾಲಿನ್ ಸೋಲು ಅನುಭವಿಸಿರುವುದರಿಂದ ವಿಧಾನಸಭೆಯಲ್ಲಿ ಡಿಎಂಕೆಯನ್ನು ಮುನ್ನಡೆಸುವವರು ಯಾರು ಎಂಬ ಬಗ್ಗೆ ಕೂತುಹಲ ಮೂಡಿದ್ದು, ಉದಯನಿಧಿ ವಿರೋಧ ಪಕ್ಷದ ನಾಯಕರಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಕಳೆದ ಸರ್ಕಾರದಲ್ಲಿ ಡಿಸಿಎಂ ಆಗಿದ್ದ ಎಂ.ಕೆ.ಸ್ಟಾಲಿನ್ ಅವರ ಪುತ್ರ ಉದಯನಿಧಿ ಸ್ಟಾಲಿನ್, ಗೆದ್ದ ಮೊದಲ ಅವಧಿಯಲ್ಲಿಯೇ ಎರಡು ವರ್ಷಗಳ ಬಳಿಕ ಸಚಿವರಾಗಿ, ಮೂರನೇ ವರ್ಷದ ಅಂತ್ಯದಲ್ಲಿ ಡಿಸಿಎಂ ಹುದ್ದೆಗೆ ಏರಿದ್ದರು. ಡಿಎಂಕೆಯ ಮುಂದಿನ ಉತ್ತರಾಧಿಕಾರಿ ಎಂದೇ ಬಿಂಬಿತವಾಗಿದ್ದಾರೆ. ಈ ಬಾರಿ ಅದೇ ಚೆಪಾಕ್-ತಿರುವಲ್ಲಿಕೇಣಿ ಕ್ಷೇತ್ರದಲ್ಲಿ 7,000 ಕ್ಕೂ ಹೆಚ್ಚು ಮತಗಳಿಂದ ಗೆದ್ದಿದ್ದಾರೆ. ಶಾಸಕಾಂಗಸಭೆ ನಾಯಕನಾಗಿ ಆಯ್ಕೆ ಮಾಡುವ ಸಾಧ್ಯತೆ ಇದೆ. 

ಈ ಕುರಿತಾದ ವರದಿಗಾರರು ಕೇಳಿದ ಪ್ರಶ್ನೆಗೆ ಉತ್ತರ ನೀಡಿರುವ ಉದಯನಿಧಿ ಸ್ಟಾಲಿನ್, ನಾನು ಆ ನಿರ್ಧಾರ ತೆಗೆದುಕೊಳ್ಳಲು ಸಾಧ್ಯವಿಲ್ಲ. ನಮ್ಮ ಪಕ್ಷದಲ್ಲಿ ಈಗಾಗಲೇ ಗೆದ್ದಿರುವ ಅನೇಕ ಹಿರಿಯ ಶಾಸಕರಿದ್ದಾರೆ. ನನ್ನ ನಾಯಕರು ಏನು ಹೇಳುತ್ತಾರೋ ಅದನ್ನು ನಾನು ಮಾಡುತ್ತೇನೆ ಎಂದು ಹೇಳಿದ್ದಾರೆ.

1977 ನವೆಂಬರ್ 27ರಂದು ಜನಿಸಿದ ಉದಯನಿಧಿ ಸ್ಟಾಲಿನ್, ರಾಜಕೀಯಕ್ಕೆ ಬರುವ ಮೊದಲು ಹಲವು ಸಿನಿಮಾಗಳಲ್ಲಿ ಹೀರೋ ಆಗಿ ನಟಿಸಿದ್ದಾರೆ. ಜೊತೆಗೆ ನಿರ್ಮಾಪಕ/ವಿತರಕರಾಗಿ ಕೆಲಸ ಮಾಡಿದ್ದಾರೆ. 2019ರಲ್ಲಿ ನೇರ ರಾಜಕಾರಣಕ್ಕೆ ಧುಮುಕಿದರು. ಡಿಎಂಕೆ ಯುವ ಘಟಕದ ಕಾರ್ಯದರ್ಶಿಯಾದರು. ಮುಂದೆ 2021ರಲ್ಲಿ ಅಜ್ಜ ಎಂ.ಕರುಣಾನಿಧಿ ಪ್ರತಿನಿಧಿಸುತ್ತಿದ್ದ ಚೆಪಾಕ್-ತಿರುವಲ್ಲಿಕೇಣಿಯಿಂದ ಗೆದ್ದರು. 

2023ರಲ್ಲಿ ಸನಾತನ ಒಳಿಪ್ಪು ಎಂಬ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಉದಯನಿಧಿ, ತಮ್ಮ ಭಾಷಣದಲ್ಲಿ ಸನಾತನ ಧರ್ಮವನ್ನು ನಿರ್ಮೂಲನೆ ಮಾಡಿ ಎಂಬ ಹೇಳಿ ನೀಡಿ ದೊಡ್ಡ ವಿವಾದವನ್ನು ಸೃಷ್ಟಿಸಿದ್ದರು. ಇದು ಬಿಜೆಪಿ ಮತ್ತು ಹಿಂದೂ ಪರ ಸಂಘಟನೆಗಳ ಕೋಪಕ್ಕೆ ಕಾರಣವಾಯಿತು. ದೇಶಾದ್ಯಂತ ಅವರ ವಿರುದ್ಧ ಪ್ರತಿಭಟನೆ ನಡೆಸಿ ಹಿಂದೂಪರ ಸಂಘಟನೆಗಳು ಕೇಸ್ ದಾಖಲಿಸಿವೆ (ಏಜೆನ್ಸೀಸ್).