ನಾನು ಇನ್ನೂ ಪ್ರಾಮಾಣಿಕತೆಯನ್ನು ಸಾಬೀತುಪಡಿಸಬೇಕೇ?; ಡೀಲ್ ಆರೋಪಕ್ಕೆ ಸೋನಮ್ ವಾಂಗ್ಚುಕ್ ಕಿಡಿ | Sonam Wangchuk

ನವದೆಹಲಿ: ಸಾಮಾಜಿಕ ಕಾರ್ಯಕರ್ತ ಸೋನಮ್ ವಾಂಗ್ಚುಕ್(Sonam Wangchuk) ಗುರುವಾರ(ಜು. 23) ಮಧ್ಯರಾತ್ರಿ ಕೇಂದ್ರ ಸಚಿವರ ಸಮ್ಮುಖದಲ್ಲಿ ಉಪಾವಾಸ ಕೈಬಿಟ್ಟಿದ್ದಕ್ಕೆ ಕೆಲವರಿಂದ ಟೀಕೆ ವ್ಯಕ್ತವಾದ ಹಿನ್ನೆಲೆ, ನಾನು ಇನ್ನೂ ಪ್ರಾಮಾಣಿಕತೆಯನ್ನು ಸಾಬೀತುಪಡಿಸಬೇಕೇ? ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.

ನೀಟ್ ಪರೀಕ್ಷೆ ಅಕ್ರಮ ಹೊಣೆಗಾರಿಕೆ ಮತ್ತು ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಅವರ ರಾಜೀನಾಮೆ ಒತ್ತಾಯಿಸಿ ಸಿಜೆಪಿ ನೇತೃತ್ವದ ಪ್ರತಿಭಟನೆಯನ್ನು ಬೆಂಬಲಿಸಿ ಸೋನಮ್ ವಾಂಗ್ಚುಕ್ ಅವರು 26 ದಿನಗಳ ಕಾಲ ಉಪವಾಸ ಸತ್ಯಾಗ್ರಹವನ್ನು ನಡೆಸಿದ್ದರು. 

ತಮ್ಮ ಉಪವಾಸವನ್ನು ಯಾಕೆ ಕೊನೆಗೊಳಿಸಿದರು? ಎಂಬ ವಿಮರ್ಶಗೆ ತಮ್ಮ ಇನ್​ಸ್ಟಾಗ್ರಾಂನಲ್ಲಿ ವಿಡಿಯೋ ಮೂಲಕ ಪ್ರತಿಕ್ರಿಯಿಸಿರುವ ಅವರು, ಸ್ನೇಹಿತರೇ, ನಾನು ಈ ವೀಡಿಯೊವನ್ನು ಸ್ವಲ್ಪ ದುಃಖ, ಸ್ವಲ್ಪ ಆಶ್ಚರ್ಯ ಮತ್ತು ದುಃಖ ಮತ್ತು ಕೋಪದ ಮಿಶ್ರಣದಿಂದ ಮಾಡುತ್ತಿದ್ದೇನೆ. ದೈಹಿಕವಾಗಿ ಹೋರಾಡುವುದು, ಜಗಳವಾಡುವುದು, ಮುಷ್ಕರದೊಳಗೆ ಮತ್ತೊಂದು ಮುಷ್ಕರ ನಡೆಸುವುದು, ನೆಲದ ಮೇಲೆ ಮಲಗುವುದು. ನನ್ನಲ್ಲಿ ಉಳಿದಿದ್ದ ಯಾವುದೇ ಶಕ್ತಿಯನ್ನು ಬಳಸಿ, 20 ಅಥವಾ 22ನೇ ದಿನದಂದು ನಾನು ಬಲವಂತವಾಗಿ ಹೊರಬರಬೇಕಾಯಿತು ಎಂದಿದ್ದಾರೆ.

ಇದು ತನ್ನ ದೇಹದ ಮೇಲೆ ತೀವ್ರ ದುಷ್ಪರಿಣಾಮ ಬೀರಿದೆ. ಸ್ನಾಯುಗಳು ಕರಗಿಹೋಗಿವೆ, ಮತ್ತು ನನ್ನ ಅಂಗಾಂಗಗಳು ಹಾಗೂ ಮೆದುಳಿಗೆ ಸರಿಪಡಿಸಲಾಗದ ಹಾನಿಯು ಬಹುತೇಕ ಸಂಭವಿಸುವ ಹಂತ ತಲುಪಿದೆ. ಈ ಅವಧಿಯಲ್ಲಿ ತಾವು 11 ಕೆ.ಜಿ ತೂಕ ಕಳೆದುಕೊಂಡಿರುವುದಾಗಿ ಹೇಳಿದ್ದಾರೆ. 

ಇಂದು ಬೆಳಿಗ್ಗೆಯಿಂದ ಅನೇಕ ಜನರು ನನಗೆ ಕರೆ ಮಾಡುತ್ತಿದ್ದಾರೆ. ಅಥವಾ ಪೋಸ್ಟ್‌ಗಳನ್ನು ತೋರಿಸುತ್ತಿದ್ದಾರೆ, ನಿಮ್ಮ ವಿರುದ್ಧ ಅನೇಕ ಪ್ರಶ್ನೆಗಳನ್ನು ಎತ್ತಲಾಗುತ್ತಿದೆ ಎಂದು ತಿಳಿಸಿದ್ದಾರೆ. ನೀವು ಕೇಂದ್ರ ಸಚಿವರ ಮೂಲಕ ಮಾತ್ರ ನಿಮ್ಮ ಉಪವಾಸವನ್ನು ಯಾಕೆ ನಿಲ್ಲಿಸಿದಿರಿ? ನೀವು ಅದನ್ನು ಬೇರೆಯವರ ಮೂಲಕ ಯಾಕೆ ಮುರಿಯಲಿಲ್ಲ? ಏನು ಒಪ್ಪಂದ ನಡೆದಿದೆ, ಏನು ಚೌಕಾಶಿ ನಡೆದಿದೆ? ಎಂದು ಕೇಳಿದ್ದಾರೆ. 

ನನ್ನ ಉಪವಾಸ ಎಷ್ಟು ಶುದ್ಧವಾಗಿತ್ತು ಎಂಬುದರ ಕುರಿತು ನಾನು ಈಗ ಯಾರಿಂದಲಾದರೂ ಚಾರಿತ್ರ್ಯ ಪ್ರಮಾಣಪತ್ರವನ್ನು ಪಡೆಯಬೇಕೇ? ಎಂದಿರುವ ಅವರು, ಸರ್ಕಾರದೊಂದಿಗೆ ಒಪ್ಪಂದ ಮಾಡಿಕೊಳ್ಳಲು ಸುಮಾರು ಒಂದು ತಿಂಗಳ ಕಾಲ ಹಸಿವಿನಿಂದ ಬಳಲುವುದು ಅಸಂಬದ್ಧ ಎಂದು ತಮ್ಮ ವಿರುದ್ಧದ ಡೀಲ್ ಆರೋಪವನ್ನು ತಳ್ಳಿ ಹಾಕಿದ್ದಾರೆ.

ಚೌಕಾಶಿ ಮಾಡಬೇಕಾದರೆ, ಒಂದು ಒಪ್ಪಂದ ಮಾಡಿಕೊಳ್ಳಬೇಕಾದರೆ, ಯಾರಾದರೂ 26 ದಿನಗಳ ಕಾಲ ಹಸಿವಿನಿಂದ ಇರಬೇಕೇ? ನೀವು ಇನ್ನೂ ಎಷ್ಟು ಜನರು ಒಪ್ಪಂದ ಮಾಡಿಕೊಂಡಿದ್ದಾರೆಂದು ನೋಡಿರಬೇಕು.  ಅವರು ಈ ರೀತಿಯ ಒಪ್ಪಂದಗಳನ್ನು ಮಾಡಿಕೊಳ್ಳುತ್ತಾರೆಯೇ? ದೆಹಲಿಯ ಬಿಸಿಲಿನಲ್ಲಿ ರಸ್ತೆಬದಿಯಲ್ಲಿ ಕುಳಿತು ಒಪ್ಪಂದ ಮಾಡಿಕೊಳ್ಳುವ ಬದಲು, ನಾನು ಐಷಾರಾಮಿ ಹವಾನಿಯಂತ್ರಿತ ಕೋಣೆಯಲ್ಲಿ ಕುಳಿತು ಒಪ್ಪಂದ ಮಾಡಿಕೊಳ್ಳಲು ಅಥವಾ ಚೌಕಾಶಿ ಮಾಡಲು ಸಾಧ್ಯವಾಗುತ್ತಿರಲಿಲ್ಲವೇ? ಎಂದು ಕಿಡಿಕಾರಿದ್ದಾರೆ. ಇದೇ ವೇಳೆ ತಮ್ಮ ಬೆಂಬಲಕ್ಕೆ ನಿಂತ ಸಾವಿರಾರು ಬೆಂಬಲಿಗರಿಗೆ ಧನ್ಯವಾದ ಅರ್ಪಿಸಿದ್ದಾರೆ (ಏಜೆನ್ಸೀಸ್).