ತಮಿಳುನಾಡು ರಾಜಕೀಯದಲ್ಲಿ ಬದಲಾವಣೆ: DMK ಮೈತ್ರಿಕೂಟ ತೊರೆದ ವೈಕೋ ನೇತೃತ್ವದ ಎಂಡಿಎಂಕೆ: ಎಂ.ಕೆ.ಸ್ಟಾಲಿನ್ ಈಗ ಏಕಾಂಗಿ

ಚೆನ್ನೈ: ತಮಿಳುನಾಡು ರಾಜಕಾರಣದಲ್ಲಿ ಭಾರಿ ಬದಲಾವಣೆಯಾಗುತ್ತಿದ್ದು, ಕಳೆದ 9 ವರ್ಷಗಳಿಂದ ಡಿಎಂಕೆ(DMK) ಮೈತ್ರಿಕೂಟದ ಭಾಗವಾಗಿದ್ದ, ಒಬ್ಬರು ಸಂಸತ್ ಸದಸ್ಯರು, ಇಬ್ಬರು ಶಾಸಕರನ್ನು ಹೊಂದಿದ್ದ ಮಾಜಿ ಸಂಸದ ವೈಕೋ ನೇತೃತ್ವದ ಎಂಡಿಎಂಕೆ ಪಕ್ಷವೂ ಶನಿವಾರ(ಜೂ. 27) ಮೈತ್ರಿಕೂಟದಿಂದ ಹೊರ ಬಂದಿರುವುದಾಗಿ ಘೋಷಣೆ ಮಾಡಿದೆ.

ಇಂದು ನಡೆದ ಪಕ್ಷದ ಸಾಮಾನ್ಯ ಮಂಡಳಿ ಸಭೆಯಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಇದೇ ವೇಳೆ ಎಂಡಿಎಂಕೆಯನ್ನು ದುರ್ಬಲಗೊಳಿಸಲು ಪ್ರಯತ್ನಗಳು ನಡೆದಿದ್ದು, ಮತ್ತು ಎಐಎಡಿಎಂಕೆ ಜೊತೆ ಸರ್ಕಾರ ರಚಿಸಲು ಡಿಎಂಕೆ ರಹಸ್ಯ ಮಾತುಕತೆ ಎಂದು ಪಕ್ಷ ಆರೋಪಿಸಿದೆ. ಈ ಹಿನ್ನೆಲೆ ಮೈತ್ರಿಯಿಂದ ಹೊರ ನಡೆಯಲಾಗುತ್ತಿದೆ ಎಂದು ಹೇಳಿದೆ.

ಇನ್ನೂ ಸಭೆಯಲ್ಲಿ ನೂತನ ಟಿವಿಕೆ ಸರ್ಕಾರವನ್ನು ಸ್ವಾಗತಿಸಿದ್ದು, ಆದರೆ ಟಿವಿಕೆ ಮೈತ್ರಿಕೂಟಕ್ಕೆ ಸೇರುವ ಬಗ್ಗೆ ಯಾವುದೇ ಸ್ಪಷ್ಟ ಉಲ್ಲೇಖವನ್ನು ನೀಡಿಲ್ಲ. ಭ್ರಷ್ಟಾಚಾರ ಮುಕ್ತ ಆಡಳಿತ, ಮೇಕೆದಾಟು ಅಣೆಕಟ್ಟು ಯೋಜನೆ, ತಮಿಳುನಾಡಿನ ಹಕ್ಕುಗಳನ್ನು ರಕ್ಷಿಸುವುದು ಪ್ರಮುಖ ಚುನಾವಣಾ ಭರವಸೆಗಳ ಈಡೇರಿಕೆಗೆ ರಾಜಿ ಮಾಡಿಕೊಳ್ಳದಂತೆ ಸರ್ಕಾರವನ್ನು ಒತ್ತಾಯಿಸಲಾಗಿದೆ.

ತಮಿಳುನಾಡಿನಲ್ಲಿ ದಳಪತಿ ವಿಜಯ್ ಟಿವಿಕೆ ಎಂಬ ಪಕ್ಷ ಕಟ್ಟಿ ದ್ರಾವಿಡ ಪಕ್ಷಗಳ ಕೋಟೆಯನ್ನು ಭೇದಿಸಿ ಅಧಿಕಾರಕ್ಕೇರಿದ್ದು, ಇಲ್ಲಿಯವರೆಗೂ ಅಲ್ಲಿ ನಡೆದುಕೊಂಡು ಬರುತ್ತಿದ್ದ ದ್ರಾವಿಡ ರಾಜಕಾರಣವನ್ನು ಬದಲಾಯಿಸಿದ್ದಾರೆ. ಆರಂಭದಲ್ಲಿ ವಿಜಯ್​ ಸಮ್ಮಿಶ್ರ ಸರ್ಕಾರಕ್ಕೆ ಡಿಎಂಕೆ ಮೈತ್ರಿಕೂಟದಲ್ಲಿದ್ದ ಕಾಂಗ್ರೆಸ್​, ಎಡಪಕ್ಷಗಳು, ವಿಸಿಕೆ ಹಾಗೂ ಮುಸ್ಲಿಂ ಲೀಗ್ ಪಕ್ಷಗಳು ಬೆಂಬಲಿಸಿದವು. ಕೊನೆಯದಾಗಿ ಇಂದು ಕೂಟದ ಪ್ರಬಲ ಮತ್ತು ಏಕೈಕ ಪಕ್ಷವಾಗಿದ್ದ ಎಂಡಿಎಂಕೆ ಕೂಡ ಹೊರ ಬಂದಿದ್ದು, ಈಗ ಡಿಎಂಕೆ ಏಕಾಂಗಿಯಾಗಿ ಟಿವಿಕೆ ವಿರುದ್ಧ ಹೋರಾಟ ಮಾಡಬೇಕಿದೆ.

ಮೈತ್ರಿಕೂಟದಿಂದ ಎಂಡಿಎಂಕೆ ಹೊರ ನಡೆಯುವ ನಿರ್ಣಯದ ಬಗ್ಗೆ ಪ್ರತಿಕ್ರಿಯಿಸಿರುವ ಡಿಎಂಕೆ, ವಿಧಾನಸಭೆ ಮತ್ತು ಸಂಸತ್ತಿನಲ್ಲಿ ಎಂಡಿಎಂಕೆ ಪ್ರಾತಿನಿಧ್ಯ ಪಡೆಯಲು ಡಿಎಂಕೆ ಕಾರಣ ಎಂದು ಹೇಳಿದೆ.

ಈ ಕುರಿತು ಮಾತನಾಡಿರುವ ಡಿಎಂಕೆ ನಾಯಕ ಸೈಯದ್ ಹಫೀಜುಲ್ಲಾ, ವೈಕೋ ಅವರ ಪುತ್ರ ದುರೈ ವೈಕೋ ಅವರನ್ನು ಎಂಡಿಎಂಕೆಯಲ್ಲಿ ಸೇರಿಸಿಕೊಂಡದ್ದೇ ಪಕ್ಷ ದುರ್ಬಲಗೊಳ್ಳಲು ಕಾರಣ, ಏಕೆಂದರೆ ಇದು ವೈಕೋ ಅವರ ವಂಶಪಾರಂಪರ್ಯ ರಾಜಕೀಯದ ವಿರುದ್ಧದ ಅಭಿಯಾನಕ್ಕೆ ಸಂಪೂರ್ಣವಾಗಿ ವಿರುದ್ಧವಾಗಿದೆ ಎಂದು ತಿರುಗೇಟು ನೀಡಿದ್ದಾರೆ.

ಡಿಎಂಕೆ ಕೂಟದಿಂದ ಹೊರ ನಡೆಯುವ ನಿರ್ಧಾರವನ್ನು ಡಿಎಂಕೆ ಚಿಹ್ನೆಯಲ್ಲಿ ಆಯ್ಕೆಯಾದ ಅದರ ಇಬ್ಬರು ಶಾಸಕರು ತಿರಸ್ಕರಿಸಿದ್ದು, ತಾವು ಡಿಎಂಕೆಯೊಂದಿಗೆ ಉಳಿಯುವುದಾಗಿ ಸೂಚಿಸಿ. ಸಭೆಗೆ ಗೈರಾಗಿದ್ದರು ಎನ್ನಲಾಗಿದೆ (ಏಜೆನ್ಸೀಸ್).