ಮತ್ತೆ ಯುದ್ಧ ಫಿಕ್ಸ್!..ಇರಾನ್ ಉತ್ತರಾಧಿಕಾರ ಸಮರಕ್ಕೆ ಟ್ರಂಪ್ ಎಂಟ್ರಿ; ಖಮೇನಿ ಪುತ್ರನ ಆಯ್ಕೆಗೆ ತೀವ್ರ ವಿರೋಧ! | Donald Trump

ಆಕ್ಸಿಯಾಸ್‌ಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿರುವ ಟ್ರಂಪ್​​, ಖಮೇನಿಯ ಉತ್ತರಾಧಿಕಾರಿಯಾಗಲು ಪುತ್ರ ಮೊಜ್ತಾಬಾ ಖಮೇನಿ ಸರಿಯಾದ ಆಯ್ಕೆಯಲ್ಲ, ಇದನ್ನು ತಾವು ಒಪ್ಪಿಕೊಳ್ಳುವುದಿಲ್ಲ ಎಂದಿದ್ದು, ಒಂದು ವೇಳೆ ಅವರ ಮಗನೇ ಇರಾನಿನ ನಾಯಕನಾದರೆ ಮುಂದಿನ ಐದು ವರ್ಷಗಳಲ್ಲಿ ಯುನೈಟೆಡ್ ಸ್ಟೇಟ್ಸ್​ಮತ್ತೊಂದು ಯುದ್ಧ ಪ್ರಾರಂಭಿಸಬಹುದು ಎಂದು ಎಚ್ಚರಿಕೆ ನೀಡಿದ್ದಾರೆ.

ವೆನೆಜುವೆಲಾದಲ್ಲಿ ನಡೆದಿದೆ ಎನ್ನಲಾದ ಬೆಳವಣಿಗೆಗಳನ್ನು ಉದಾಹರಣೆಯಾಗಿ ನೀಡಿರುವ ಟ್ರಂಪ್​​, ಜನವರಿಯಲ್ಲಿ ಅಮೆರಿಕನ್ ಪಡೆಗಳು ನಿಕೋಲಸ್ ಮಡುರೊರನ್ನು ಅಪಹರಿಸಿ ದೇಶದಿಂದ ಹೊರಹಾಕಿದ ಬಳಿಕ, ಡೆಲ್ಸಿ ರೊಡ್ರಿಗಸ್​​ರನ್ನು ಮಧ್ಯಂತರ ಅಧ್ಯಕ್ಷರನ್ನಾಗಿ ನೇಮಕ ಮಾಡಿದ ರೀತಿಯಲ್ಲೇ ಇರಾನ್ ವಿಷಯದಲ್ಲೂ ಅಮೆರಿಕ ಕಠಿಣ ನಿಲುವು ತಳೆಯಲಿದೆ ಎಂಬ ಧಾಟಿಯಲ್ಲಿ ಈ ಚರ್ಚೆಗಳು ನಡೆಯುತ್ತಿವೆ.

ಖಮೇನಿಯವರ ಮಗ ಆ ಸ್ಥಾನಕ್ಕೆ ಸೂಕ್ತವಲ್ಲ, ಇರಾನ್‌ಗೆ ಸಾಮರಸ್ಯ ಮತ್ತು ಶಾಂತಿಯನ್ನು ತರುವ ವ್ಯಕ್ತಿಯನ್ನು ಆ ಸ್ಥಾನದಲ್ಲಿ ಕೂರಿಸುವುದು ನನ್ನ ಬಯಕೆಯಾಗಿದೆ ಎಂದು ಹೇಳಿದ್ದಾರೆ.

ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ಜಂಟಿ ದಾಳಿಯಲ್ಲಿ ಇರಾನ್​ ಸರ್ವೋಚ್ಛ ನಾಯಕ ಅಯತೊಲ್ಲಾ ಅಲಿ ಖಮೇನಿ ಸಾವನ್ನಪ್ಪಿದ ಬಳಿಕ, ಮೊಜ್ತಾಬಾ ಖಮೇನಿಯನ್ನು ಅವರ ಉತ್ತರಾಧಿಕಾರಿಯನ್ನಾಗಿಸುವ ಬೆಳವಣಿಗೆಗಳು ನಡೆಯುತ್ತಿವೆ. 56 ವರ್ಷದ ಮೊಜ್ತಾಬಾ ಖಮೇನಿ 1969 ರಲ್ಲಿ ಮಶಾದ್‌ನಲ್ಲಿ ಜನಿಸಿದರು.

ಇಸ್ಲಾಮಿಕ್ ಗಣರಾಜ್ಯದಲ್ಲಿ ಕನಿಷ್ಠ 1,230 ಜನರನ್ನು ಬಲಿತೆಗೆದುಕೊಂಡ ಅಮೆರಿಕ-ಇಸ್ರೇಲ್ ನೇತೃತ್ವದ ಯುದ್ಧಕ್ಕೆ ಪ್ರತಿಕ್ರಿಯೆಯಾಗಿ ಇರಾನ್ ಕೊಲ್ಲಿಯಲ್ಲಿರುವ ಅಮೆರಿಕದ ನೆಲೆಗಳ ಮೇಲಿನ ದಾಳಿ ಮುಂದುವರೆಸಿದ್ದು, ಯುದ್ಧ ಆರನೇ ದಿನವನ್ನು ತಲುಪಿದ್ದರೂ, ಎರಡೂ ಕಡೆಯವರು ಅದನ್ನು ಕೊನೆಗೊಳಿಸಲು ನಿರಾಕರಿಸಿದ್ದಾರೆ ಎನ್ನಲಾಗಿದೆ.

ಖಮೇನಿ ಸಾವಿಗೆ ಪ್ರತೀಕಾರ ತೀರಿಸಿಕೊಳ್ಳುವುದಾಗಿ ಇರಾನ್ ಪ್ರತಿಜ್ಞೆ ಮಾಡಿದ್ದು, ಈ ಪ್ರದೇಶದಲ್ಲಿ ಅಮೆರಿಕದ ಉಪಸ್ಥಿತಿಯನ್ನು ಕೊನೆಗೊಳಿಸುವಂತೆ ತನ್ನ ನೆರೆಹೊರೆಯವರನ್ನು ಒತ್ತಾಯಿಸಿದೆ(ಏಜೆನ್ಸೀಸ್​).