ಚೆನ್ನೈ: ಪ್ರತಿಭಟನೆ ನಡೆಸುವ ವೇಳೆ ಕಾಂಗ್ರೆಸ್ ಕಾರ್ಯರ್ತರು ಮೈಕೈಗೆ ಬೆಂಕಿ ತಗುಲಿಸಿಕೊಂಡ ಪ್ರಕರಣ ಬೆಂಗಳೂರಿನಲ್ಲಿ ಈ ಹಿಂದೆ ವರದಿಯಾಗಿತ್ತು. ಇದೀಗ ಬಿಜೆಪಿಯ ಸುಮಾರು 30 ಕಾರ್ಯಕರ್ತರು ಖುಷಿಯಲ್ಲಿ ಮೈಸುಟ್ಟುಕೊಂಡ ಪ್ರಕರಣ ತಡವಾಗಿ ಬೆಳಕಿಗೆ ಬಂದಿದೆ.
ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಜನ್ಮದಿನಾಚರಣೆ ಆಚರಿಸುವ ಜೋಶ್ನಲ್ಲಿ ತಮಿಳುನಾಡಿನಲ್ಲಿ ಇಂಥದ್ದೊಂದು ಅನಾಹುತ ಸಂಭವಿಸಿದೆ. ಸೆ. 17ರಂದು ಚೆನ್ನೈನ ಅಂಬತ್ತೂರು ಸಮೀಪದ ಪಡಿ ಎಂಬಲ್ಲಿ ಈ ಘಟನೆ ನಡೆದಿದೆ.
ಸಂಭ್ರಮಾಚರಣೆ ವೇಳೆ ಪಟಾಕಿಯಿಂದ ಸಿಡಿದ ಬೆಂಕಿಯ ಕಿಡಿ ಹೀಲಿಯಂ ತುಂಬಿದ ಬಲೂನ್ಗಳ ಮೇಲೆ ಬಿದ್ದು ಅದು ಒಡೆದಿದೆ. ಪರಿಣಾಮ ಬೆಂಕಿ ಉಂಟಾಗಿದ್ದು, ಬಲೂನ್ಗಳ ಬಳಿ ಇದ್ದ ಕಾರ್ಯಕರ್ತರಿಗೆ ಬೆಂಕಿ ತಗುಲಿದೆ. ತಕ್ಷಣ ಅವರನ್ನು ಹತ್ತಿರದ ಆಸ್ಪತ್ರೆಗೆ ಕರೆದೊಯ್ದು ಚಿಕಿತ್ಸೆ ನೀಡಲಾಗಿದೆ. ಅದೃಷ್ಟವಶಾತ್ ಎಲ್ಲರೂ ಸಣ್ಣಪುಟ್ಟ ಗಾಯಕ್ಕೊಳಗಾಗಿದ್ದು, ಅಪಾಯದಿಂದ ಪಾರಾಗಿದ್ದಾರೆ. (ಏಜೆನ್ಸೀಸ್)