ನವದೆಹಲಿ: ಭಾರತದ ಭರವಸೆಯ ಶೂಟರ್ ಮನು ಭಾಕರ್, ಅಂತಾರಾಷ್ಟ್ರೀಯ ಟೂರ್ನಿ ವೇಳೆಯಲ್ಲೂ ಓದಿನತ್ತ ಗಮನಹರಿಸಿದ್ದಾರೆ. ಕ್ರೋವೆಷಿಯಾದ ರಾಜಧಾನಿ ಜಾಗ್ರೇಬ್ನಲ್ಲಿ ನಡೆಯುತ್ತಿರುವ ಯುರೋಪಿಯನ್ ಚಾಂಪಿಯನ್ಷಿಪ್ನಲ್ಲಿ ಪಾಲ್ಗೊಂಡಿರುವ ಮನು ಭಾಕರ್, ತಾವು ತಂಗಿರುವ ಹೋಟೆಲ್ ಕೊಠಡಿಯಲ್ಲೇ ಕುಳಿತು ಬಿಎ ಪದವಿ ಪರೀಕ್ಷೆ ಬರೆಯಲಿದ್ದಾರೆ. ಪಿಸ್ತೂಲ್ ಬದಿಗಿಟ್ಟು ಪೆನ್ ಕೈಗೆತ್ತಿಕೊಂಡು ಬಿಎ ಪದವಿಯ 4ನೇ ಸೆಮಿಸ್ಟರ್ ಪರೀಕ್ಷೆ ಎದುರಿಸಲಿದ್ದಾರೆ. ದೆಹಲಿ ವಿಶ್ವವಿದ್ಯಾಲಯದ ಪ್ರತಿಷ್ಠಿತ ಲೇಡಿ ಶ್ರೀ ರಾಮ್ ಮಹಿಳಾ ಕಾಲೇಜಿನಲ್ಲಿ ರಾಜ್ಯ ಶಾಸ್ತ್ರ ಓದುತ್ತಿರುವ ಮನು ಭಾಕರ್ ಅವರ ಪರೀಕ್ಷೆ ಮೇ 18 ರಿಂದ ಆರಂಭಗೊಳ್ಳಲಿವೆ.
ಇದನ್ನೂ ಓದಿ: ಸಿಟ್ಟಾದ ಟೆನಿಸ್ ತಾರೆ ಜೋಕೊವಿಕ್ ಕೋರ್ಟ್ನಲ್ಲಿ ಮಾಡಿದ್ದೇನು ಗೊತ್ತೇ?
ಮೇ 20 ರಿಂದ ಚಾಂಪಿಯನ್ಷಿಪ್ ಆರಂಭಗೊಳ್ಳಲಿದ್ದು, ಮನು ಭಾಕರ್ ಅವರ ಪದವಿ ಪರೀಕ್ಷೆ ಹಾಗೂ ಟೂರ್ನಿ ಏಕಕಾಲದಲ್ಲಿ ನಡೆಯಲಿವೆ. ಆದರೆ, ಸ್ಪರ್ಧೆಗೂ ಹಾಗೂ ಪರೀಕ್ಷೆಗೂ ಯಾವುದೇ ತೊಂದರೆಯಾಗುವುದಿಲ್ಲ ಎಂದು ಭಾಕರ್ ಸ್ಪಷ್ಟಪಡಿಸಿದ್ದಾರೆ. ಏಕಕಾಲದಲ್ಲಿ ಯಾವುದೇ ತೊಂದರೆ ಇಲ್ಲದೆ ಎರಡನ್ನೂ ನಿರ್ವಹಿಸುವೆ. ಇದಕ್ಕೂ ಮೊದಲು ಇದೇ ರೀತಿ ಮಾಡಿರುವೆ. ಪರೀಕ್ಷೆ ದಿನ ಯಾವುದೇ ಸ್ಪರ್ಧೆ ಇರುವುದಿಲ್ಲ. ಹೀಗಾಗಿ ಎರಡನ್ನೂ ಒಟ್ಟಿಗೆ ಕಾರ್ಯನಿರ್ವಹಿಸುವೆ ಎಂದು ಭಾಕರ್ ಹೇಳಿದ್ದಾರೆ. ಮನು ಭಾಕರ್ಗೆ ಓದಿನಲ್ಲೂ ತುಂಬಾ ಆಸಕ್ತಿ ಇದೆ. ಸ್ಪರ್ಧೆಗಳಿಗೆ ತೆರಳುವಾಗ ಯಾವಾಗಲೂ ಪುಸ್ತಕಗಳೊಂದಿಗೆ ತೆರಳುತ್ತಾಳೆ. ಈಗಾಗಲೇ ಪರೀಕ್ಷೆಗೆ ಸಿದ್ಧತೆ ನಡೆಸಿದ್ದು, ವೊಬೈಲ್ ಸ್ಕ್ಯಾನರ್ ಮೂಲಕ ಉತ್ತರ ಪತ್ರಿಕೆಗಳನ್ನು ವಿಶ್ವವಿದ್ಯಾಲಯಕ್ಕೆ ಕಳುಹಿಸಿಕೊಡಲಿದ್ದಾಳೆ ಎಂದು ಭಾಕರ್ ತಂದೆ ರಾಮಕೃಷ್ಣನ್ ಭಾಕರ್ ತಿಳಿಸಿದ್ದಾರೆ.
ಇದನ್ನೂ ಓದಿ: ಕುಸ್ತಿಪಟು ಸುಶೀಲ್ ಕುಮಾರ್ ವಿರುದ್ಧ ಜಾಮೀನುರಹಿತ ವಾರೆಂಟ್,
ಮನು ಭಾಕರ್, ಟೋಕಿಯೊ ಒಲಿಂಪಿಕ್ಸ್ನಲ್ಲಿ ಭಾರತದ ಪದಕದ ಭರವಸೆಯಾಗಿದ್ದಾರೆ. ಯೂತ್ ಒಲಿಂಪಿಕ್ಸ್, ಐಎಸ್ಎಸ್ಎಫ್ ವಿಶ್ವಕಪ್ ಹಾಗೂ ಕಾಮನ್ವೆಲ್ತ್ ಗೇಮ್ಸ್ನಲ್ಲಿ ಭಾಕರ್ ಸ್ವರ್ಣ ಪದಕ ಜಯಿಸಿದ್ದರು. ಟೋಕಿಯೊ ಒಲಿಂಪಿಕ್ಸ್ನಲ್ಲಿ ಭಾಕರ್ 25 ಮೀಟರ್ ಪಿಸ್ತೂಲ್ ಹಾಗೂ 10 ಮೀಟರ್ ಏರ್ ಪಿಸ್ತೂಲ್ ವಿಭಾಗದಲ್ಲಿ ಸ್ಪರ್ಧಿಸಲಿದ್ದಾರೆ.
ಲಸಿಕೆ ಪಡೆಯಲು ನಿರಾಕರಿಸಿದ್ದ ಕ್ರಿಕೆಟಿಗರು?