ಮುಂಬೈ: ಕೊರೊನಾ ವೈರಸ್ ಸೋಂಕಿನ ಕಾರಣಕ್ಕೆ ಜಾಗತಿಕ ಮಟ್ಟದಲ್ಲಿ ಷೇರುಗಳ ಸೆಲ್-ಆಫ್ ನಡೆದರೆ, ಭಾರತೀಯ ಷೇರುಪೇಟೆಯಲ್ಲಿ ಅದರ ಜತೆಗೆ ಯೆಸ್ ಬ್ಯಾಂಕ್ ಸಂಕಷ್ಟದ ಕಾರಣಕ್ಕೆ ಸೆನ್ಸೆಕ್ಸ್, ನಿಫ್ಟಿಗಳು ಬಡ್ಲಬಾತ್ ನಲ್ಲಿ ಮುಳುಗಿವೆ.
ಶುಕ್ರವಾರ ಬೆಳಗ್ಗೆ ಆರಂಭಿಕ ವಹಿವಾಟಿನಲ್ಲೇ ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್(ಬಿಎಸ್ಇ)ನ ಸೆನ್ಸೆಕ್ಸ್ 1,459 ಅಂಶ ಕುಸಿದು ನೆಲಕಚ್ಚಿ, ವಹಿವಾಟು ಮುಂದುವರಿಸಿತ್ತು. ದಿನದ ಅಂತ್ಯಕ್ಕೆ 30 ಷೇರುಗಳ ಸೆನ್ಸೆಕ್ಸ್ 893.99 ಅಂಶ (2.32%) ಕುಸಿದು 37,576.62ರಲ್ಲಿ ವಹಿವಾಟು ಕೊನೆಗೊಳಿಸಿದೆ. ಇದೇ ವೇಳೆ, ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್(ಎನ್ಎಸ್ಇ)ನ ಸೂಚ್ಯಂಕ ನಿಫ್ಟಿ 279.55 ಅಂಶ (2.48%) ಕುಸಿದು 10,989.45ರಲ್ಲಿ ವಹಿವಾಟು ಮುಗಿಸಿದೆ.
ಆರ್ಥಿಕ ಸಂಕಷ್ಟಕ್ಕೆ ಈಡಾಗಿರುವ ಯೆಸ್ ಬ್ಯಾಂಕ್ ಅನ್ನು ಆರ್ಬಿಐ ತನ್ನ ಸುಪರ್ದಿಗೆ ತೆಗೆದುಕೊಂಡು ಗ್ರಾಹಕರ ಹಣ ವಿತ್ಡ್ರಾವಲ್ಗೆ ಗರಿಷ್ಠ 50,000 ರೂಪಾಯಿ ಮಿತಿ ಹೇರಿದ ಪರಿಣಾಮ, ಅದರ ಷೇರುಗಳ ಮೌಲ್ಯ ಶೇಕಡ 55ಕ್ಕೂ ಹೆಚ್ಚು ಕುಸಿತ ಕಂಡಿವೆ. ಈ ಅನಿರೀಕ್ಷಿತ ಬೆಳವಣಿಗೆ ಗುರುವಾರ ಸಂಜೆ ನಡೆದಿತ್ತು.
ಸೆನ್ಸೆಕ್ಸ್ ಪಟ್ಟಿಯಲ್ಲಿ ಟಾಟಾ ಸ್ಟೀಲ್ ಷೇರುಗಳು ಹೆಚ್ಚಿನ ಅಂದರೆ ಗರಿಷ್ಠ ಶೇಕಡ 6.51 ನಷ್ಟ ಅನುಭವಿಸಿದರೆ, ಎಸ್ಬಿಐ, ಇಂಡಸ್ಇಂಡ್ ಬ್ಯಾಂಕ್, ಎಚ್ಡಿಎಫ್ಸಿ, ಐಸಿಐಸಿಐ ಬ್ಯಾಂಕ್, ಒಎನ್ಜಿಸಿ ಷೇರುಗಳು ಕೂಡ ನಷ್ಟದಲ್ಲಿ ನಂತರದ ಸ್ಥಾನದಲ್ಲಿವೆ. ಇದೇ ವೇಳೆ, ಬಜಾಜ್ ಆಟೋ, ಮಾರುತಿ, ಏಷ್ಯನ್ ಪೇಂಟ್ಸ್ ಷೇರುಗಳು ಮಾತ್ರವೇ ಲಾಭಾಂಶ ದಾಖಲಿಸಿವೆ. ಒಟ್ಟಾರೆ ವಾರದ ಅವಧಿಯಲ್ಲಿ ಸೆನ್ಸೆಕ್ಸ್ ಒಟ್ಟು 720.67 ಅಂಶ (1.88%) ಕುಸಿದರೆ, ನಿಫ್ಟಿ 212.30 ಅಂಶ(1.89%) ಕುಸಿತ ದಾಖಲಿಸಿವೆ.
ಬಿಎಸ್ಇಯ ಸೆಕ್ಟೋರಲ್ ಸೂಚ್ಯಂಕಗಳು ಎಲ್ಲವೂ ನಷ್ಟದಲ್ಲೇ ವಹಿವಾಟು ಮುಗಿಸಿವೆ. ಮೆಟಲ್ ಸೆಕ್ಟರ್ ಶೇಕಡ 4.40 , ಬ್ಯಾಂಕೆಕ್ಸ್, ಹಣಕಾಸು, ಎನರ್ಜಿ, ರಿಯಲ್ಟಿ, ಆಯಿಲ್ ಆ್ಯಂಡ್ ಗ್ಯಾಸ್, ಪವರ್ ಮತ್ತು ಇಂಡಸ್ಟ್ರಿಯಲ್ಸ್ ನಷ್ಟದಲ್ಲಿ ನಂತರದ ಸ್ಥಾನದಲ್ಲಿವೆ. ಇದೇ ರೀತಿ ಬಿಎಸ್ಇ ಮಿಡ್ಕ್ಯಾಪ್ ಮತ್ತು ಸ್ಮಾಲ್ ಕ್ಯಾಪ್ ಸೂಚ್ಯಂಕಗಳು ಕೂಡ ಶೇಕಡ 2.36ರಷ್ಟು ಕುಸಿದಿವೆ.
ಜಾಗತಿಕ ಮಾರುಕಟ್ಟೆಯಲ್ಲಿ ಕೊರೊನಾ ವೈರಸ್ ಸೋಂಕಿನ ಭೀತಿ ಆವರಿಸಿದ್ದು, ಎಲ್ಲವೂ ನಷ್ಟದಲ್ಲೇ ವಹಿವಾಟು ನಡೆಸಿವೆ. ಶಾಂಘೈ, ಹಾಂಕಾಂಗ್, ಸಿಯೋಲ್, ಟೋಕಿಯೋ ಶೇಕಡ 2ರಷ್ಟು ನಷ್ಟ ಅನುಭವಿಸಿವೆ. ಯುರೋಪಿಯನ್ ಷೇರುಪೇಟೆಯ ಸೂಚ್ಯಂಕಗಳೂ ಬೆಳಗ್ಗಿನ ಸೆಷನ್ಸ್ನಲ್ಲಿ ನಷ್ಟ ಅನುಭವಿಸಿವೆ. (ಏಜೆನ್ಸೀಸ್)