ಉಪವಾಸ ಮಾಡುವಾಗ ಭಕ್ತರು ಮಾಡುವ ತಪ್ಪೇನು?
ನವರಾತ್ರಿಯಲ್ಲಿ ಉಪವಾಸ ಮಾಡುವವರ ಸಂಖ್ಯೆ ಹೆಚ್ಚಿರುತ್ತದೆ. ಕೆಲವರು ಹಣ್ಣು ಮತ್ತು ಹಾಲನ್ನು ಮಾತ್ರ ಸೇವಿಸುತ್ತಾರೆ. ಇನ್ನು ಕೆಲವರು ದಿನಕ್ಕೆ ಒಂದು ಬಾರಿ ಊಟ ಮಾಡುತ್ತಾರೆ ಅಥವಾ ತಮ್ಮ ಕುಟುಂಬದ ಸಂಪ್ರದಾಯಕ್ಕೆ ತಕ್ಕಂತೆ ಆಹಾರ ನಿಯಮಗಳನ್ನು ಪಾಲಿಸುತ್ತಾರೆ. ಆದರೆ, ಉಪವಾಸ ಎಂದರೆ ಇಡೀ ದಿನ ಹಸಿವಿನಿಂದ ಬಳಲುವುದೇ ಭಕ್ತಿ ಎಂಬ ಅರ್ಥವಲ್ಲ. ಸಾಕಷ್ಟು ನೀರು ಕುಡಿಯದೆ ಇರುವುದು, ದೇಹಕ್ಕೆ ಅಗತ್ಯವಾದ ಪೋಷಕಾಂಶಗಳನ್ನು ಪಡೆಯದೆ ಇರುವುದು ಮತ್ತು ಉಪವಾಸ ಮುಗಿದ ತಕ್ಷಣ ಅತಿಯಾಗಿ ಆಹಾರ ಸೇವಿಸುವುದು ಆರೋಗ್ಯದ ಮೇಲೆ ಪರಿಣಾಮ ಬೀರಬಹುದು. ವಿಶೇಷವಾಗಿ ಮಧುಮೇಹ ಇರುವವರು, ಗರ್ಭಿಣಿಯರು, ನಿಯಮಿತವಾಗಿ ಔಷಧಿ ಸೇವಿಸುವವರು ಹಾಗೂ ಆರೋಗ್ಯ ಸಮಸ್ಯೆಗಳಿರುವವರು ಕಠಿಣ ಉಪವಾಸ ಮಾಡುವ ಮೊದಲು ವೈದ್ಯರ ಸಲಹೆ ಪಡೆಯುವುದು ಉತ್ತಮ. ಭಕ್ತಿಯಿಂದ ಉಪವಾಸ ಮಾಡುವುದರ ಜೊತೆಗೆ ದೇಹದ ಅಗತ್ಯಗಳನ್ನೂ ಅರ್ಥಮಾಡಿಕೊಳ್ಳಬೇಕು. ಆರೋಗ್ಯಕ್ಕೆ ಹಾನಿಯಾಗುವ ರೀತಿಯಲ್ಲಿ ಉಪವಾಸ ಮಾಡುವುದು ಅಗತ್ಯವಿಲ್ಲ.
ನವರಾತ್ರಿಯಲ್ಲಿ ಕೂದಲು ಮತ್ತು ಉಗುರು ಕತ್ತರಿಸಿದರೆ ಅಶುಭವೇ?
ನವರಾತ್ರಿಯ ಒಂಬತ್ತು ದಿನಗಳಲ್ಲಿ ಕೂದಲು ಕತ್ತರಿಸಬಾರದು, ಕ್ಷೌರ ಮಾಡಿಸಬಾರದು ಅಥವಾ ಉಗುರು ತೆಗೆಯಬಾರದು ಎಂದು ಕೆಲವು ಕುಟುಂಬಗಳಲ್ಲಿ ಹೇಳಲಾಗುತ್ತದೆ. ವ್ರತದ ದಿನಗಳಲ್ಲಿ ಹೊರಗಿನ ಅಲಂಕಾರಕ್ಕಿಂತ ಪೂಜೆ, ಭಕ್ತಿ ಮತ್ತು ಆತ್ಮಸಂಯಮಕ್ಕೆ ಹೆಚ್ಚಿನ ಗಮನ ನೀಡಬೇಕು ಎಂಬ ಭಾವನೆ ಈ ಸಂಪ್ರದಾಯದೊಂದಿಗೆ ಬೆಸೆದುಕೊಂಡಿದೆ. ಆದರೆ, ಕೂದಲು ಅಥವಾ ಉಗುರು ಕತ್ತರಿಸಿದರೆ ದೇವಿಯ ಕೋಪಕ್ಕೆ ಗುರಿಯಾಗುತ್ತಾರೆ ಅಥವಾ ಅಶುಭ ಸಂಭವಿಸುತ್ತದೆ ಹಾಗೂ ಮನೆಗೆ ದರಿದ್ರ ಅಂಟಿಕೊಳ್ಳುತ್ತದೆ. ಹೆಣ್ಣು ಮಕ್ಕಳ ಕೂದಲನ್ನು ಶುಭ ಸಂಕೇತ ಎಂದು ಹಿರಿಯರ ಕಾಲದಿಂದಲೂ ಹೇಳಲಾಗುತ್ತದೆ.
ಪೂಜೆ ಮಾಡುವಾಗ ಕೋಪ ಮಾಡಿಕೊಳ್ಳಬಾರದು ಎನ್ನುವುದೇಕೆ?
ನವರಾತ್ರಿಯಲ್ಲಿ ದೇವಿಗೆ ಹೂವು, ಹಣ್ಣು ಮತ್ತು ನೈವೇದ್ಯ ಅರ್ಪಿಸುವುದಕ್ಕೆ ಎಷ್ಟು ಮಹತ್ವವಿದೆಯೋ, ನಮ್ಮ ನಡವಳಿಕೆಯನ್ನು ಸುಧಾರಿಸಿಕೊಳ್ಳುವುದಕ್ಕೂ ಅಷ್ಟೇ ಮಹತ್ವವಿದೆ ಎಂಬ ಸಂದೇಶವನ್ನು ಈ ಆಚರಣೆ ನೀಡುತ್ತದೆ. ಕೋಪ, ದ್ವೇಷ, ಜಗಳ ಮತ್ತು ಇತರರಿಗೆ ನೋವುಂಟುಮಾಡುವ ವರ್ತನೆಗಳಿಂದ ದೂರವಿರಬೇಕು ಎಂದು ಹಿರಿಯರು ಹೇಳುವುದರ ಹಿಂದೆ ಉತ್ತಮ ಜೀವನ ಮೌಲ್ಯಗಳಿವೆ. ಹಬ್ಬದ ದಿನಗಳಲ್ಲಿ ಪೂಜೆ ಸಲ್ಲಿಸುತ್ತಾ ಮನೆಯವರೊಂದಿಗೆ ಜಗಳವಾಡುವುದು, ಇತರರನ್ನು ಅವಮಾನಿಸುವುದು ಪೂಜಾ ಫಲವನ್ನು ತಂದು ಕೊಡುವುದಿಲ್ಲ. ಒಳ್ಳೆಯ ಮನಸ್ಸಿನ್ನಿಂದ ಯಾರಿಗೂ ಕೆಟ್ಟದ್ದನ್ನು ಬಯಸದೇ ಪೂಜೆ ಮಾಡಬೇಕು.
ಮನೆಯಲ್ಲಿ ಅಖಂಡ ದೀಪ ಹಚ್ಚಿದ್ದರೆ ಹೊರಗೆ ಹೋಗಬಾರದೇ?
ನವರಾತ್ರಿಯ ಸಂದರ್ಭದಲ್ಲಿ ಕೆಲವು ಮನೆಗಳಲ್ಲಿ ಒಂಬತ್ತು ದಿನಗಳ ಕಾಲ ಅಖಂಡ ದೀಪವನ್ನು ಬೆಳಗಿಸಲಾಗುತ್ತದೆ. ದೀಪವು ಭಕ್ತಿ, ಶುಭ ಮತ್ತು ನಿರಂತರ ಆರಾಧನೆಯ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ಈ ಆಚರಣೆಯನ್ನು ಪಾಲಿಸುವವರು ದೀಪ ಆರದಂತೆ ವಿಶೇಷ ಕಾಳಜಿ ವಹಿಸುತ್ತಾರೆ. ಆದರೆ, ದೀಪವನ್ನು ಬೆಳಗಿಟ್ಟು ಮನೆಯಲ್ಲಿ ಯಾರೂ ಇಲ್ಲದೆ ದೀರ್ಘಕಾಲ ಹೊರಗೆ ಹೋಗುವುದು ಅಪಾಯಕಾರಿಯಾಗಬಹುದು. ದೀಪದ ಹತ್ತಿರ ಪರದೆ, ಕಾಗದ, ಒಣಹೂವು ಅಥವಾ ಬೆಂಕಿ ಹತ್ತಿಕೊಳ್ಳಬಹುದಾದ ವಸ್ತುಗಳಿದ್ದರೆ ಅನಾಹುತ ಸಂಭವಿಸುವ ಸಾಧ್ಯತೆಯಿದೆ. ಹೀಗಾಗಿ ಅಖಂಡ ದೀಪದ ಆಚರಣೆಯನ್ನು ಪಾಲಿಸುವಾಗ ಸುರಕ್ಷತೆಗೆ ಮೊದಲ ಆದ್ಯತೆ ನೀಡಬೇಕು. ದೀಪವನ್ನು ಸ್ಥಿರವಾದ, ಸುರಕ್ಷಿತ ಸ್ಥಳದಲ್ಲಿ ಇಡುವುದು ಮತ್ತು ಅದನ್ನು ನಿರ್ಲಕ್ಷಿಸದೆ ನೋಡಿಕೊಳ್ಳುವುದು ಅಗತ್ಯವಾಗಿದೆ.
ಋತುಸ್ರಾವದ ಸಮಯದಲ್ಲಿ ಮಹಿಳೆಯರು ದೇವಿಯ ಪೂಜೆ ಮಾಡಬಾರದೇ?
ನವರಾತ್ರಿಯ ಸಂದರ್ಭದಲ್ಲಿ ಅನೇಕ ಮಹಿಳೆಯರಿಗೆ ಎದುರಾಗುವ ಪ್ರಶ್ನೆಗಳಲ್ಲಿ ಇದೂ ಒಂದು. ಋತುಸ್ರಾವದ ಸಮಯದಲ್ಲಿ ಪೂಜೆ ಮಾಡಬಾರದು ಎಂಬ ನಿಯಮ ಕೆಲವು ಕುಟುಂಬಗಳ ಸಂಪ್ರದಾಯದಲ್ಲಿದೆ. ಈ ಸಮಯದಲ್ಲಿ ಮಹಿಳೆ ಅಶುದ್ಧಳಾಗುತ್ತಾಳೆ ಅಥವಾ ದೇವಿಯನ್ನು ಆರಾಧಿಸಲು ಅರ್ಹಳಲ್ಲ ಎಂದು ಯಾವಾಗಲೂ ಕೂಡಾ ಪಾಲಿಸಿಕೊಂಡು ಬಂದ ಸಂಪ್ರದಾಯವಾಗಿದೆ. ಧಾರ್ಮಿಕ ಆಚರಣೆಗಳ ಬಗ್ಗೆ ಪ್ರತಿಯೊಂದು ಕುಟುಂಬವೂ ತನ್ನದೇ ಆದ ನಂಬಿಕೆಯನ್ನು ಹೊಂದಿರಬಹುದು. ಆದರೆ ಆ ನಂಬಿಕೆಯ ಹೆಸರಿನಲ್ಲಿ ಮಹಿಳೆಯರನ್ನು ಅವಮಾನಿಸುವುದು ಸರಿಯಲ್ಲ. ಆದರೂ, ಈ ಸಮಯದಲ್ಲಿ ಪೂಜಾ ಕಾರ್ಯದಲ್ಲಿ ಮಹಿಳೆಯರು ಭಾಗವಹಿಸುವುದು ನಿಷೇಧವಾಗಿದೆ.
