ಚೆನ್ನೈ: ಐಐಟಿ ಮದ್ರಾಸ್ ಕಾಲೇಜಿನ ಮಹಿಳಾ ಶೌಚಗೃಹದಲ್ಲಿ ಅಸಿಸ್ಟೆಂಟ್ ಪ್ರೊಫೆಸರ್ ಒಬ್ಬ ತನ್ನ ಮೊಬೈಲ್ ಕ್ಯಾಮರಾ ಆನ್ ಮಾಡಿ ಇಟ್ಟುಬಂದಿರುವ ಘಟನೆ ನಡೆದಿದೆ. ಆರೋಪಿಯು ರೆಡ್ ಹ್ಯಾಂಡ್ ಆಗಿ ಸಿಕ್ಕಿಬಿದ್ದಿರುವುದು ವರದಿಯಾಗಿದೆ.
ಬುಧವಾರ ಸಂಜೆ ಕಾಲೇಜಿನ ಮಹಿಳಾ ಶೌಚಗೃಹಕ್ಕೆ ಪಿಎಚ್ಡಿ ವಿದ್ಯಾರ್ಥಿನಿಯೊಬ್ಬಳು ಹೋದಾಗ ಅಲ್ಲಿ ಮೊಬೈಲ್ ಇರುವುದು ಕಂಡುಬಂದಿದೆ. ಆ ಮೊಬೈಲ್ ಕ್ಯಾಮರಾ ತನ್ನತ್ತಲೇ ತಿರುಗಿರುವುದನ್ನು ಗಮನಿಸಿದ ವಿದ್ಯಾರ್ಥಿನಿ ತಕ್ಷಣ ಆ ಮೊಬೈಲ್ನ್ನು ತೆಗೆದು ನೋಡಿದ್ದಾಳೆ. ಆಗ ಅದರಲ್ಲಿ ಕ್ಯಾಮರಾ ಆನ್ ಇರುವುದು ಗೊತ್ತಾಗಿದೆ. ಕೂಡಲೇ ಪುರುಷರ ಶೌಚಗೃಹದತ್ತ ಹೋದ ಮಹಿಳೆ ಅಲ್ಲಿನ ಬಾಗಿಲಿಗೆ ಹೊರಗಿನಿಂದ ಚಿಲಕ ಹಾಕಿ ಸೆಕ್ಯುರಿಟಿಯನ್ನು ಕರೆದಿದ್ದಾಳೆ. ಸೆಕ್ಯುರಿಟಿ ಬಂದು ಶೌಚಗೃಹದೊಳಗೆ ನೋಡಿದಾಗ ಅಲ್ಲಿ ಆ ಮೊಬೈಲ್ ಇಟ್ಟ ವ್ಯಕ್ತಿ ಇರುವುದು ಪತ್ತೆಯಾಗಿದೆ.
ಆರೋಪಿಯನ್ನು ಏರೋಸ್ಪೇಸ್ ಇಂಜಿನಿಯರಿಂಗ್ ವಿಭಾಗದಲ್ಲಿ ಸಹಾಯಕ ಪ್ರಾಧ್ಯಾಪಕ ಸುಭಾಮ್ ಬ್ಯಾನರ್ಜಿ ಎಂದು ಪೊಲೀಸರು ಗುರುತಿಸಿದ್ದಾರೆ. (ಏಜೆನ್ಸೀಸ್)