| ಗೋವಿಂದರಾಜು ಚಿನ್ನಕುರ್ಚಿ ಬೆಂಗಳೂರು
ಗ್ರಾಮ ಠಾಣಾ ಒಳಗಿರುವ ಸೈಟು, ಮನೆ, ಆಸ್ತಿಗಳ ಸರ್ವೆ ನಕ್ಷೆಗೆ (ಮೋಜಣಿ) ಸರ್ವೆಯರ್ ಬೇಕಿಲ್ಲ. ಕೇವಲ ದಿಶಾಂಕ್ ಆಪ್ನಲ್ಲಿ ಗ್ರಾಮ ಪಂಚಾಯಿತಿ ಅಧಿಕಾರಿಗಳೇ ಸರ್ವೆ ನಡೆಸಿ ಇ-ಸ್ವತ್ತು ತಂತ್ರಾಂಶದಲ್ಲಿ ಇ-ಖಾತಾ ಕೊಡಬಹುದು. ಇಂತಹ ವಿನೂತನ ಯೋಜನೆಯನ್ನು ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಇಲಾಖೆ ಹಾಗೂ ಕಂದಾಯ ಇಲಾಖೆ ಜಂಟಿಯಾಗಿ ಆರಂಭಿಸಿವೆ. ಗ್ರಾಮ ಠಾಣಾ ಒಳಗಿನ ಆಸ್ತಿಗಳಿಗೆ ತೆರಿಗೆ ನಿರ್ಧಾರ ಮಾಡಲು ಗ್ರಾಮ ಪಂಚಾಯಿತಿಗಳು ಇ-ಸ್ವತ್ತು ತಂತ್ರಾಂಶದಲ್ಲಿ ನಮೂನೆ-9 ಮತ್ತು 11ಎ, 11ಬಿ ಅನ್ವಯ ಇ-ಖಾತಾ ನೀಡುತ್ತಿವೆ.
ಆಸ್ತಿ ಮಾಲೀಕ ಇ-ಖಾತಾಗೆ ಗ್ರಾಮ ಪಂಚಾಯಿತಿಗೆ ಅರ್ಜಿ ಸಲ್ಲಿಸಿದರೆ ಭೂಮಾಪನ ಇಲಾಖೆ ಸರ್ವೆಯರ್ ಬಂದು ನಕ್ಷೆ ಸಿದ್ಧಪಡಿಸಿ ಮೋಜಣಿ ತಂತ್ರಾಂಶದಲ್ಲಿ ಅಪ್ಲೋಡ್ ಮಾಡಿ ಆನಂತರ ಇ-ಸ್ವತ್ತು ತಂತ್ರಾಂಶದಲ್ಲಿ ಗ್ರಾಮ ಪಂಚಾಯಿತಿ ಅಧಿಕಾರಿಗಳು ಇ-ಖಾತಾ ನೀಡುತ್ತಿದ್ದರು. ಆದರೆ, ಇದೀಗ ಗ್ರಾಮ ಪಂಚಾಯಿತಿ ಕಾರ್ಯದರ್ಶಿ ಅಥವಾ ದ್ವಿತೀಯ ದರ್ಜೆ ಲೆಕ್ಕ ಸಹಾಯಕರು ಸ್ಥಳಕ್ಕೆ ತೆರಳಿ ಗ್ರಾಮ ಠಾಣಾ ವ್ಯಾಪ್ತಿಗೆ ಬರುತ್ತದೆಯೇ ಎಂದು ಖಚಿತಪಡಿಸಿಕೊಂಡು ಅರ್ಜಿದಾರನಿಂದ ಫೋಟೋ, ಐಡಿ ಕಾರ್ಡ್, ವಿಳಾಸ, ಆಸ್ತಿಯ ಚಕ್ಕುಬಂದಿ, ವಿಸ್ತೀರ್ಣ ದಾಖಲಿಸಬೇಕು. ಈ ಎಲ್ಲ ಅಂಶವನ್ನು ಅರ್ಜಿದಾರನಿಂದ ಖಾತರಿಪಡಿಸಿಕೊಂಡು ಇ-ಸ್ವತ್ತು ತಂತ್ರಾಂಶಕ್ಕೆ ಅಪ್ಡೇಟ್ ಮಾಡಿ ದಿಶಾಂಕ್ ಆಪ್ಗೆ ವರ್ಗಾವಣೆ ಮಾಡಬೇಕು.
ಆನಂತರ ಕಾರ್ಯದರ್ಶಿ ಅಥವಾ ಎಸ್ಡಿಎ ಲೆಕ್ಕ ಸಹಾಯಕರು ಖುದ್ದು ಸ್ಥಳಕ್ಕೆ ಭೇಟಿ ಕೊಟ್ಟು ದಿಶಾಂಕ್ನಲ್ಲಿ ಆಸ್ತಿ ಪ್ರತಿಯೊಂದು ಮೂಲೆಯನ್ನು ಜಿಪಿಎಸ್ ಪರಿಶೀಲನೆ ನಡೆಸಿ ಫೋಟೋ ಸೆರೆಹಿಡಿಯಬೇಕು. ಇದರಿಂದ ಆಸ್ತಿ ಗ್ರಾಮ ಠಾಣಾ ಒಳಗೆ ಅಥವಾ ಹೊರಗೆ ಇದೆಯೇ ಎಂಬುದು ಗೊತ್ತಾಗಲಿದೆ. ಗ್ರಾಮ ಠಾಣಾ ವ್ಯಾಪ್ತಿಯಲ್ಲಿ ಆಸ್ತಿ ಇದ್ದರೆ ದಿಶಾಂಕ್ ಆಪ್ ಲಾಗಿನ್ ಆಗಿ ಪಿಡಿಒ ದೃಢೀಕರಿಸಿ ಇ-ಸ್ವತ್ತು ತಂತ್ರಾಂಶಕ್ಕೆ ವರ್ಗಾವಣೆ ಮಾಡಿಕೊಂಡು ಇ-ಖಾತಾ ನೀಡಬಹುದು. ಗ್ರಾಮ ಪಂಚಾಯಿತಿಯಲ್ಲಿ ಸರ್ವೆ ಮಾಡಿ ದೃಢೀಕರಿಸಿದ ಶೇ.10 ಆಸ್ತಿಗಳನ್ನು ಭೂಮಾಪಕರು ಮತ್ತು ಕಾರ್ಯನಿರ್ವಾಹಕ ಅಧಿಕಾರಿ ಪರಿಶೀಲನೆ ನಡೆಸುವ ಮೂಲಕ ನಿಗಾ ವಹಿಸಲಿದ್ದಾರೆ. ಆಸ್ತಿ ಮಾಲೀಕ ಅರ್ಜಿಯೊಂದಿಗೆ 200 ರೂ. ಶುಲ್ಕ ಪಾವತಿಸಬೇಕಿದೆ.
ವ್ಯತ್ಯಾಸ ಇದ್ದರೆ ಸರ್ವೆಯರ್ಗೆ ವರ್ಗ: ದಿಶಾಂಕ್ ಆಪ್ನಲ್ಲಿ ಆಸ್ತಿ ಅಳತೆ ವೇಳೆ ವಿಸ್ತೀರ್ಣ ಮತ್ತು ಚಕ್ಕುಬಂದಿ ವ್ಯತ್ಯಾಸ ಇದ್ದರೆ, ಗ್ರಾಮ ಠಾಣಾ ಹೊರಗೆ ಇದ್ದರೆ ಅಥವಾ ಆಸ್ತಿ ಮಾಲೀಕರು ಒಪ್ಪದ್ದಿರೇ ಇ-ಸ್ವತ್ತು ತಂತ್ರಾಂಶದಲ್ಲಿ ಅರ್ಜಿ ತಿರಸ್ಕೃತವಾಗಲಿದೆ. ಆನಂತರ ಭೂಮಾಪಕನ ಇಲಾಖೆ ಮೂಲಕ ಆಸ್ತಿ ಸಮೀಕ್ಷೆ ಮಾಡಿಸಿ ದಾಖಲೆಯೊಂದಿಗೆ ಮತ್ತೆ ಅರ್ಜಿ ಸಲ್ಲಿಸಬಹುದು. ಇಂತಹ ಆಸ್ತಿಗಳಿಗೆ ಸರ್ವೆಯರ್ ಸ್ಥಳಕ್ಕೆ ಭೇಟಿ ಕೊಟ್ಟು ದಿಶಾಂಕ್ನಲ್ಲಿ ಜಿಪಿಎಸ್ ಮತ್ತು ಆಸ್ತಿ ಫೋಟೋ ಸೆರೆಹಿಡಿದು ಗ್ರಾಮ ಠಾಣಾ ಒಳಗೆ -ಹೊರಗೆ ಇದೆಯೇ ಎಂಬುದರ ಬಗ್ಗೆ ವರದಿ ಅಪ್ಡೇಟ್ ಮಾಡಿ ಇ-ಸ್ವತ್ತು ತಂತ್ರಾಂಶಕ್ಕೆ ಮಾಹಿತಿ ನೀಡಲಿದ್ದಾರೆ. ಇದಾದ ಮೇಲೆ ಇ-ಖಾತಾ ಸಿಗಲಿದೆ.
ಬಫರ್ ವಲಯದಲ್ಲಿ ಇದ್ದರೇ?: ಗ್ರಾಮ ಠಾಣಾ ಗಡಿ ಅಥವಾ ಗಡಿಯಿಂದ 20 ಮೀಟರ್ ಅಂತರದೊಳಗೆ ಇದ್ದರೇ ಅಂತಹ ಅರ್ಜಿಯನ್ನು ಸ್ವಯಂಕೃತವಾಗಿ ಭೂಮಾಪನ ಇಲಾಖೆ ಸರ್ವೆಯರ್ ದಿಶಾಂಕ್ ಲಾಗಿನ್ಗೆ ವರ್ಗಾವಣೆ ಮಾಡಲಾಗುತ್ತದೆ. ದಿಶಾಂಕ್ ಆಪ್ನಲ್ಲಿ ಭೂಮಾಪನ ಇಲಾಖೆ ಸರ್ವೆಯರ್ ತಮ್ಮ ಲಾಗಿನ್ ಐಡಿಗೆ ವರ್ಗಾವಣೆ ಮಾಡಿಕೊಂಡು ಖುದ್ದು ಸ್ಥಳಕ್ಕೆ ಭೇಟಿ ಕೊಟ್ಟು ಸರ್ವೆ ಮಾಡಲಿದ್ದಾರೆ. ಆನಂತರ ದಿಶಾಂಕ್ ಆಪ್ ಮೂಲಕವೇ ಗ್ರಾಮ ಪಂಚಾಯಿತಿ ಲಾಗಿನ್ಗೆ ವರ್ಗಾವಣೆ ಮಾಡಲಿದ್ದಾರೆ. ಈ ನಕ್ಷೆಯನ್ನು ಪಡೆದು ಇ-ಸ್ವತ್ತು ತಂತ್ರಾಂಶದ ಮೂಲಕ ಇ-ಖಾತಾವನ್ನು ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿ ನೀಡಲಿದ್ದಾರೆ.
ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಹಾಗೂ ಕಂದಾಯ ಜಂಟಿಯಾಗಿ ದಿಶಾಂಕ್ ಸೇವೆ ಪರಿಚಯ ಪಡಿಸಲಾಗಿದೆ. ಈ ಬಗ್ಗೆ ಪಂಚಾಯಿತಿ ಅಧಿಕಾರಿಗಳಿಗೆ ತರಬೇತಿ ಕೊಟ್ಟು ಸೇವೆಗೆ ವೇಗ ನೀಡಲಾಗುತ್ತದೆ.
| ಎಲ್.ಕೆ. ಅತೀಕ್ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಇಲಾಖೆ, ಪ್ರಧಾನ ಕಾರ್ಯದರ್ಶಿ
ಕೊರತೆ ತಗ್ಗಿಸುವ ಪ್ರಯತ್ನ: ಈ ಮೊದಲು ಗ್ರಾಮ ಠಾಣಾ ಆಸ್ತಿಗೆ ಇ-ಖಾತಾ ಪಡೆಯಲು ಗ್ರಾಮ ಪಂಚಾಯಿತಿಗೆ ಅರ್ಜಿ ಸಲ್ಲಿಸಿದರೆ ಅರ್ಜಿ ಸ್ವೀಕರಿಸಿ ಭೂಮಾಪನ ಇಲಾಖೆಗೆ ವರ್ಗಾವಣೆ ಮಾಡುತ್ತಿದ್ದರು. ತಹಶೀಲ್ದಾರ್ ಅವರಿಂದ ಗ್ರಾಮ ಠಾಣಾ ಒಳಗೆ ಬರಲಿದೆ ಎಂದು ಪ್ರಮಾಣ ಪತ್ರ ತರುವಂತೆ ಸೂಚಿಸುತ್ತಿದ್ದರು. ಸರ್ವೆಯರ್ ಬಂದು ನಕ್ಷೆ ತಯಾರಿಸಿ ಮೋಜಣಿಗೆ ಅಪ್ಲೋಡ್ ಮಾಡಿದ ಮೇಲೆ ಇ-ಸ್ವತ್ತು ತಂತ್ರಾಂಶದಲ್ಲಿ ಸ್ವೀಕರಿಸಿ ಗ್ರಾಮ ಪಂಚಾಯಿತಿ ಅಧಿಕಾರಿಗಳು ಇ-ಖಾತಾ ಕೊಡುತ್ತಿದ್ದರು. ಆದರೆ, ದಿಶಾಂಕ್ ಆಪ್ ಬಳಕೆಯಿಂದ ಸರ್ವೆಯರ್ ಮತ್ತು ತಹಶೀಲ್ದಾರ್ ಪ್ರಮಾಣ ಪತ್ರ ಪಡೆಯುವ ಅಗತ್ಯ ಇರುವುದಿಲ್ಲ. ಮೋಜಣಿ ಶುಲ್ಕ 800 ರೂ. ಉಳಿತಾಯವಾಗಲಿದೆ.