ಧರ್ಮಶಾಲಾ: ಹಾಲಿ ಚಾಂಪಿಯನ್ ಚೆನ್ನೆ$ ಸೂಪರ್ಕಿಂಗ್ಸ್ ಅಸ್ಥಿರ ನಿರ್ವಹಣೆಯಿಂದ ಐಪಿಎಲ್-17ರ ಅಂಕಪಟ್ಟಿಯಲ್ಲಿ ಏರಿಳಿತ ಕಂಡಿದ್ದು, ಪ್ಲೇಆಫ್ ಆಸೆ ಜೀವಂತವಿರಿಸಲು ಗೆಲ್ಲಲೇಬೇಕಾದ ಒತ್ತಡಕ್ಕೆ ಸಿಲುಕಿದೆ. ಭಾನುವಾರ ಹಿಮಾಚಲ ಪ್ರದೇಶದ ಎಚ್ಪಿಸಿಎ ಕ್ರೀಡಾಂಗಣದಲ್ಲಿ ಆತಿಥೇಯ ಪಂಜಾಬ್ ಕಿಂಗ್ಸ್ ಸವಾಲು ಎದುರಿಸಲಿದ್ದು, ಮೊದಲ ಮುಖಾಮುಖಿಯ ಸೋಲಿಗೆ ಸೇಡು ತೀರಿಸಿಕೊಳ್ಳುವ ಹಂಬಲದಲ್ಲಿದೆ. ಹಿಂದಿನ 5 ಮುಖಾಮುಖಿಗಳಲ್ಲಿ ಸಿಎಸ್ಕೆ ಎದುರು ಗೆಲವು ದಾಖಲಿಸಿರುವ ಪಂಜಾಬ್ ಇನ್ನೊಂದು ಜಯದೊಂದಿಗೆ ಪ್ಲೇಆಫ್ ಅವಕಾಶ ವೃದ್ಧಿಸಿಕೊಳ್ಳುವ ವಿಶ್ವಾಸಲ್ಲಿದೆ. ಎರಡೂ ತಂಡಗಳಿಗೆ ಈ ಪಂದ್ಯ “ಮಾಡು ಇಲ್ಲವೇ ಮಡಿ’ ಹೋರಾಟ ಎನಿಸಿದೆ.
ಮೂರು ದಿನಗಳ ಹಿಂದಷ್ಟೇ (ಮೇ 1) ಚೆಪಾಕ್ನಲ್ಲಿ ಸಿಎಸ್ಕೆ ತಂಡವನ್ನು ಮಣಿಸಿರುವ ಪಂಜಾಬ್ ಕಿಂಗ್ಸ್ ಟೂರ್ನಿಯಲ್ಲಿ ಆಡಿರುವ 10 ಪಂದ್ಯಗಳಲ್ಲಿ 4ರಲ್ಲಿ ಗೆಲುವು, 6ರಲ್ಲಿ ಸೋತು 8 ಅಂಕ ಕಲೆಹಾಕಿದೆ. ಮುಂದಿನ ಸುತ್ತಿಗೆ ಅರ್ಹತೆ ಪಡೆಯಲು ಬಾಕಿ ಇರುವ ತನ್ನ ಲೀಗ್ ಪಂದ್ಯಗಳಲ್ಲಿ ಗೆಲುವು ದಾಖಲಿಸುವ ಒತ್ತಡದಲ್ಲಿದೆ. ಇನ್ನು ಸಿಎಸ್ಕೆ 10 ಪಂದ್ಯಗಳಲ್ಲಿ 5 ಗೆಲುವು-ಸೋಲಿನೊಂದಿಗೆ 10 ಅಂಕ ಕಲೆ ಹಾಕಿದೆ. ಉಳಿದಿರುವ 4 ಪಂದ್ಯಗಳಲ್ಲಿ ಕನಿಷ್ಠ 3ರಲ್ಲಿ ಜಯಿಸಬೇಕಿದೆ. ಆದರೆ 2010ರಲ್ಲಿ ನಾಕೌಟ್ಗೇರಲು ಗೆಲ್ಲಲೇಬೇಕಾದ ಪಂದ್ಯವನ್ನಾಡಿದ ಸಿಎಸ್ಕೆ ಕೊನೇ ಓವರ್ನಲ್ಲಿ ರೋಚಕ ಗೆಲುವು ಕಂಡಿತ್ತು. ಬಳಿಕ ಆ ಆವೃತ್ತಿಯಲ್ಲಿ ಮೊದಲ ಬಾರಿಗೆ ಚಾಂಪಿಯನ್ ಆಗಿತ್ತು.
ಋತುರಾಜ್ ಮೇಲೆ ಅವಲಂಬನೆ
ಟೂರ್ನಿಯ ಮೊದಲ 6 ಪಂದ್ಯಗಳ ಪೈಕಿ 4ರಲ್ಲಿ ಗೆದ್ದ ಉತ್ತಮ ಆರಂಭ ಕಂಡಿದ್ದ ಸಿಎಸ್ಕೆ ನಂತರ 4 ಪಂದ್ಯಗಳ ಪೈಕಿ ತವರಿನಲ್ಲಿ 2 ಪಂದ್ಯ ಸೋತಿರುವುದು ಮಾನಸಿಕವಾಗಿ ಕುಗ್ಗಿಸಿದೆ. 2023ರಲ್ಲಿ ಮಧ್ಯಮ ಓವರ್ಗಳಲ್ಲಿ ಯಶಸ್ಸು ದಾಖಲಿಸಿದ ಶಿವಂ ದುಬೆ ಅವರನ್ನೇ ಈ ಬಾರಿಯೂ ನೆಚ್ಚಿಕೊಂಡಿದೆ. ಜತೆಗೆ ನಾಯಕ ಋತುರಾಜ್ ಗಾಯಕ್ವಾಡ್ ಮೇಲೆ ಅತಿಯಾದ ಅವಲಂಬನೆ ಕಂಡಿದೆ. ಅಜಿಂಕ್ಯ ರಹಾನೆ ಫಾಮ್ರ್ ಕಳವಳಕಾರಿ ಎನಿಸಿದೆ. ರವೀಂದ್ರ ಜಡೇಜಾ, ಸಮೀರ್ ರಿಜ್ವಿ ಬ್ಯಾಟಿಂಗ್ನಲ್ಲಿ ಕೊಡುಗೆ ನೀಡಬೇಕಿದೆ.
ಮುಸ್ತಾಫಿಜುರ್, ಚಹರ್ ಅಲಭ್ಯ
ಬಾಂಗ್ಲಾದೇಶದ ವೇಗಿ ಮುಸ್ತಾಫಿಜುರ್ ರೆಹಮಾನ್ ರಾಷ್ಟ್ರೀಯ ತಂಡದ ಕರ್ತವ್ಯಕ್ಕಾಗಿ ಸಿಎಸ್ಕೆ ತಂಡದ ಮುಂದಿನ ಪಂದ್ಯಗಳಿಗೆ ಅಲಭ್ಯರಾಗಿದ್ದಾರೆ. ಜತೆಗೆ ಹಿಂದಿನ ಪಂದ್ಯದಲ್ಲಿ 2 ಎಸೆತಗಳನ್ನಷ್ಟೇ ಎಸೆದ ದೀಪಕ್ ಚಹರ್ ಸಹ ಟೂರ್ನಿಯಲ್ಲಿ ಮರಳಿ ಕಣಕ್ಕಿಳಿಯುವುದು ಅನುಮನ ಎನ್ನಲಾಗಿದೆ. ಪಂಜಾಬ್ ವಿರುದ್ಧ ಪಂದ್ಯಕ್ಕೆ ತುಷಾರ್ ದೇಶಪಾಂಡೆ ಫಿಟ್ ಆಗದಿದ್ದರೆ ಚಹರ್ ಬದಲಿಗೆ ಮುಕೇಶ್ ಚೌಧರಿ ಸ್ಥಾನ ಪಡೆಯುವ ನಿರೀಕ್ಷೆ ಇದೆ. ಮಥೀಶ ಪಥಿರಣ ಕಣಕ್ಕಿಳಿಯುವ ಸಾಧ್ಯತೆ ಇದೆ.
ಆತ್ಮವಿಶ್ವಾಸದಲ್ಲಿ ಕರನ್ ಪಡೆ
ಸತತ 2 ಪಂದ್ಯಗಳಲ್ಲಿ ಗೆದ್ದು ಕಂಬ್ಯಾಕ್ ಮಾಡಿರುವ ಪಂಜಾಬ್ ಕಿಂಗ್ಸ್ಗೆ ಕಾಯಂ ನಾಯಕ ಶಿಖರ್ ಧವನ್ ಸಿಎಸ್ಕೆ ವಿರುದ್ಧವೂ ಅಲಭ್ಯರಾಗಲಿದ್ದು, ಸ್ಯಾಮ್ ಕರನ ತಂಡ ಮುನ್ನಡೆಸಲಿದ್ದಾರೆ. ಈಡನ್ ಗಾರ್ಡನ್ಸ್ನಲ್ಲಿ ದಾಖಲೆಯ ಚೇಸಿಂಗ್, ಚೆಪಾಕ್ ಗೆಲುವಿನೊಂದಿಗೆ ಜಾನಿ ಬೇರ್ಸ್ಟೋ, ರಿಲೀ ರೋಸೌ ಾಮ್ರ್ಗೆ ಮರಳಿರುವುದು ಬಲ ತಂದಿದೆ. ಶಶಾಂಕ್ ಸಿಂಗ್ ಮತ್ತು ಆಶುತೋಷ್ ಶರ್ಮ ಜೋಡಿಯನ್ನು ನಿಯಂತ್ರಿಸುವುದು ಪಥಿರಣ ಎದುರಿನ ಮುಂದಿನ ಸವಾಲಾಗಿದೆ. ಹರ್ಪ್ರೀತ್ ಬ್ರಾರ್, ರಾಹುಲ್ ಚಹರ್ ಮತ್ತೆ ಸಿಎಸ್ಕೆ ಎದುರು ಮ್ಯಾಜಿಕ್ ನಡೆಸುವ ನಿರೀಕ್ಷೆಯಲ್ಲಿದ್ದಾರೆ.
ಮುಖಾಮುಖಿ: 29
ಸಿಎಸ್ಕೆ: 15
ಪಂಜಾಬ್: 14
ಆರಂಭ: ಮಧ್ಯಾಹ್ನ 3.30
ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್, ಜಿಯೋ ಸಿನಿಮಾ
IPL 2024: ಆರ್ಸಿಬಿಗೆ ಹ್ಯಾಟ್ರಿಕ್ ಜಯ; ಗುಜರಾತ್ ವಿರುದ್ಧ ಭರ್ಜರಿ ಬೌಲಿಂಗ್