ನಿಮ್ಮ ಕೆಲಸದ ಸ್ಥಳದಲ್ಲಿ ಉಂಟಾಗುವ ಉದ್ವೇಗದ ಕಾರಣವನ್ನು ತಿಳಿಯಲು ಪ್ರಯತ್ನಿಸಿ. ಟೆನ್ಷನ್ನಿಂದ ಶಕ್ತಿ ಕ್ಷೀಣಿಸುತ್ತದೆ. ಅದು ಏಕಾಗ್ರತೆಯನ್ನು ತೆಗೆದುಹಾಕುತ್ತದೆ, ಆತ್ಮವಿಶ್ವಾಸವನ್ನು ಅಲುಗಾಡಿಸುತ್ತದೆ. ಕ್ರಮೇಣ ಒತ್ತಡದ ತಲೆನೋವು, ಹೊಟ್ಟೆ ಉಬ್ಬರ, ರಕ್ತದೊತ್ತಡ, ಎದೆನೋವು, ನಿದ್ರೆಯ ತೊಂದರೆ ಮುಂತಾದ ದೈಹಿಕ ಲಕ್ಷಣಗಳಿಗೆ ಕಾರಣವಾಗಬಹುದು. ಯೋಗದ ಮೂಲಕ ಆಂತರಿಕ ಶಾಂತಿ ಪಡೆಯಬಹುದು. ಆರಂಭದಲ್ಲಿ ದೇಹದಲ್ಲಿ ಒತ್ತಡ ಅಥವಾ ಭೀತಿ ಎಲ್ಲಿದೆ ಎಂಬುದನ್ನು ಗಮನಿಸಿ. ಕಚೇರಿಯ ಬಿಡುವಿನ ವೇಳೆಯಲ್ಲಿ ಬೆನ್ನು, ಕುತ್ತಿಗೆಯನ್ನು ನೇರ ಮಾಡಿ ಚಿನ್ಮುದ್ರೆಯ ಭಂಗಿಯಲ್ಲಿ ಸ್ವಲ್ಪ ಹೊತ್ತು ಉಸಿರನ್ನು ಗಮನಿಸಿ. ಆಮೇಲೆ ಕೈಗಳನ್ನು ಪರಸ್ಪರ ಹೆಣೆದು ಶಿರಸ್ಸಿನ ಮೇಲೆ ಹಾಗೂ ಕೆಳಕ್ಕೆ ಆರು ಬಾರಿ ಮಾಡಿ. ಕುತ್ತಿಗೆ, ಭುಜಗಳ ವ್ಯಾಯಾಮ ಮಾಡಿ. ಆಮೇಲೆ ಸ್ವಲ್ಪ ಹೊತ್ತು ಡೆಸ್ಕ್ನ ಮೇಲೆ ತಲೆ ಇಟ್ಟು ಒರಗಿ. ನೀವು ಮುಂಜಾನೆ ಖಾಲಿ ಹೊಟ್ಟೆಯಲ್ಲಿಸಾಧ್ಯವಾಗುವ ಆಸನಗಳನ್ನು (ಮುಂದಕ್ಕೂ ಹಿಂದಕ್ಕೂ ಬಾಗುವ ಆಸನಗಳು) ಮಾಡಿ. ಕೊನೆಯಲ್ಲಿ ಶವಾಸನ, ಪ್ರಾಣಾಯಾಮ ಮಾಡಿ. ಬೆಳಗ್ಗೆ ಮತ್ತು ಸಂಜೆ ತಲಾ ಹತ್ತು ನಿಮಿಷದ ಧ್ಯಾನ ಮಾಡಿ. ಶರೀರಕ್ಕೆ ಒಳ್ಳೆಯ ಆಹಾರ ನೀಡಿದಂತೆಯೇ ಮನಸ್ಸಿಗೆ ಒಳ್ಳೆಯ ಆಹಾರ ನೀಡಿ. ಕಚೇರಿಯಲ್ಲಿ ಮಧ್ಯ ವಿರಾಮಗಳನ್ನು ತೆಗೆದುಕೊಳ್ಳಿ. ಮೂರು ತಿಂಗಳ ಕಾಲ ಹತ್ತು ನಿಮಿಷ ಪ್ರಾಣಮುದ್ರೆ, ನಲವತ್ತು ನಿಮಿಷ ಚಿನ್ಮುದ್ರೆ ಅಭ್ಯಾಸ ಮಾಡಿ.
