ಬೆಂಗಳೂರು: ಬೆಂಗಳೂರಿನಲ್ಲಿ ನೀರಿನ ಬಿಕ್ಕಟ್ಟಿನ ಕುರಿತು ದಿನ ನಿತ್ಯ ಹೊಸ ಹೊಸ ವರದಿಗಳು ಬರುತ್ತಿರುವುದನ್ನು ನಾವೆಲ್ಲಾ ನೋಡಿದ್ದೇವೆ ಅಥವಾ ಕೇಳಿದ್ದೇವೆ. ಏತನ್ಮಧ್ಯೆ ಬಳಸಿದ ನೀರಿನ ನಿರ್ವಹಣೆಯ ಮೌಲ್ಯಮಾಪನದಲ್ಲಿ ನಗರವು ಎರಡನೇ ಅತ್ಯುತ್ತಮ (10 ರಾಜ್ಯಗಳ ಸುಮಾರು 500 ನಗರಗಳಲ್ಲಿ) ನಗರ ಎಂದು ಗುರುತಿಸಿಕೊಂಡಿದೆ. ಹೌದು, 10 ರಾಜ್ಯಗಳ 500 ನಗರಗಳಲ್ಲಿ ಬಳಸಿದ ನೀರು ನಿರ್ವಹಣೆಯಲ್ಲಿ ಬೆಂಗಳೂರು ಎರಡನೇ ಸ್ಥಾನದಲ್ಲಿದ್ದರೆ ಸೂರತ್ ಅಗ್ರ ಸ್ಥಾನದಲ್ಲಿದೆ.
ದಿ ಥಿಂಕ್ ಟ್ಯಾಂಕ್ ಕೌನ್ಸಿಲ್ ಆನ್ ಎನರ್ಜಿ, ಎನ್ವಿರಾನ್‌ಮೆಂಟ್ ಆಂಡ್ ವಾಟರ್ (ಸಿಇಇಡಬ್ಲ್ಯು) ಮಂಗಳವಾರ ಬಿಡುಗಡೆ ಮಾಡಿದ ವರದಿಯಲ್ಲಿ ಬೆಂಗಳೂರಿಗಿಂತ ಉತ್ತಮವಾಗಿ ಕಾರ್ಯನಿರ್ವಹಿಸಿದ ಏಕೈಕ ನಗರ ಸೂರತ್ ಎಂದು ಹೇಳಲಾಗಿದೆ.
ಅಧ್ಯಯನದ ಸಂಶೋಧನೆಗಳ ಆಧಾರದ ಮೇಲೆ ಸಂಯೋಜಿತ ಸೂಚ್ಯಂಕದಲ್ಲಿ 5 ಕ್ಕೆ ಸೂರತ್ ಮತ್ತು ಬೆಂಗಳೂರು ಕ್ರಮವಾಗಿ 3.32 ಮತ್ತು 3.23 ಅಂಕಗಳನ್ನು ಗಳಿಸಿವೆ. ಬೇರೆ ಯಾವುದೇ ನಗರವು 3 ಕ್ಕಿಂತ ಹೆಚ್ಚು ಸ್ಕೋರ್ ಮಾಡಲಿಲ್ಲ.
ಸಂಶೋಧನೆಯು ಆಂಧ್ರಪ್ರದೇಶ, ಛತ್ತೀಸ್‌ಗಢ, ಗುಜರಾತ್, ಹರಿಯಾಣ, ಜಾರ್ಖಂಡ್, ಕರ್ನಾಟಕ, ಮಧ್ಯಪ್ರದೇಶ, ಪಂಜಾಬ್, ರಾಜಸ್ಥಾನ ಮತ್ತು ಪಶ್ಚಿಮ ಬಂಗಾಳಕ್ಕೆ ಸೀಮಿತವಾಗಿತ್ತು. ವರದಿಯ ಸಂಶೋಧನೆಗಳು 2021 ರಲ್ಲಿ ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ (CPCB) ಮತ್ತು ಇತರ ಸರ್ಕಾರಿ ಮತ್ತು ಸರ್ಕಾರೇತರ ಮೂಲಗಳು ಪ್ರಕಟಿಸಿದ ಇತ್ತೀಚಿನ ರಾಷ್ಟ್ರೀಯ ಮಟ್ಟದ ಒಳಚರಂಡಿ ದಾಸ್ತಾನು ಡೇಟಾವನ್ನು ಆಧರಿಸಿವೆ.
ಬೆಂಗಳೂರು ಮೂಲದ ಜಲತಜ್ಞ ಎಸ್ ವಿಶ್ವನಾಥ್ ಅವರು ಸಿಇಇಡಬ್ಲ್ಯು ವರದಿಯ ಸಂಶೋಧನೆಗಳಿಂದ ಆಶ್ಚರ್ಯಪಡುವುದಿಲ್ಲ. ಏಕೆಂದರೆ “ಬೆಂಗಳೂರು ಅತ್ಯುತ್ತಮ ನೀರು ಸಂಸ್ಕರಣಾ ಘಟಕಗಳನ್ನು ಹೊಂದಿದೆ ಮತ್ತು ದೇಶದ ದೊಡ್ಡ ನಗರಗಳಲ್ಲಿ ಉತ್ತಮ ಸಂಸ್ಕರಣಾ ದರಗಳಲ್ಲಿ ಒಂದಾಗಿದೆ” ಎಂದು ಅವರು ಹೇಳಿದರು.
ಪ್ರಸ್ತುತ, ಬೆಂಗಳೂರಿನ ಸಂಸ್ಕರಿಸಿದ ಕೊಳಚೆ ನೀರನ್ನು ನಗರದೊಳಗಿನ ಕೆರೆಗಳನ್ನು ತುಂಬಲು ಮತ್ತು ನೆರೆಯ ಒಣ ಜಿಲ್ಲೆಗಳಲ್ಲಿ ನೀರಾವರಿ ಉದ್ದೇಶಗಳಿಗಾಗಿ ಬಳಸಲಾಗುತ್ತದೆ.
ಬೆಂಗಳೂರಿನಲ್ಲಿ ಕುಡಿಯುವ ನೀರಿಗೂ ಹಾಹಾಕಾರ ಉಂಟಾಗಿರುವ ಇಂತಹ ಸಂದರ್ಭದಲ್ಲಿ ಕುಡಿಯಲು ಯೋಗ್ಯವಲ್ಲದ ಉದ್ದೇಶಗಳಿಗೆ (ತೋಟಗಾರಿಕೆ ಮತ್ತು ಕೈಗಾರಿಕೆಗಳಿಗೆ) ಸಂಸ್ಕರಿಸಿದ ನೀರು ಬಳಸಬಹುದಾಗಿದೆ. ಬೆಂಗಳೂರು ಜಲಮಂಡಳಿಯೂ ನೀರಿನ ಮರುಬಳಕೆಯನ್ನು ಉಲ್ಲೇಖಿಸಿತ್ತು.