ಬೆಳಗಾವಿ: ‘ಅತ್ಯಾಚಾರ ಅನಿವಾರ್ಯವಾಗಿದ್ದರೆ, ಆಸ್ವಾದಿಸಿ. ಅಂತಹ ಸ್ಥಿತಿಯಲ್ಲಿ ನಿಮ್ಮೊಂದಿಗೆ ನಾವೂ ಇದ್ದೇವೆ’ ಎಂದ ವಿಧಾನಸಭೆ ಮಾಜಿ ಸಭಾಧ್ಯಕ್ಷ ರಮೇಶ್ಕುಮಾರ್ ವಿರುದ್ಧ ರಾಜ್ಯಾದ್ಯಾಂತ ವ್ಯಾಪಕ ಖಂಡನೆ ವ್ಯಕ್ತವಾಗಿದ್ದು, ಎಚ್ಚೆತ್ತ ರಮೇಶ್ ಕುಮಾರ್ ಕೈ ಮುಗಿದು ಕ್ಷಮೆಯಾಚಿಸಿದ್ದಾರೆ.
ಸದನಕ್ಕೆ ಹೋಗುವ ಮುನ್ನ ದಿಗ್ವಿಜಯ ನ್ಯೂಸ್ ಜತೆ ಮಾತನಾಡಿದ ರಮೇಶ್, ‘ದಯಮಾಡಿ ಕ್ಷಮಿಸಿ, ನಾನೀಗ ಏನೂ ಮಾತನಾಡುವುದಿಲ್ಲ. ಸದನಕ್ಕೆ ಬನ್ನಿ ಅಲ್ಲಿಯೇ ಮಾತಾಡುವೆ’ ಎಂದರು. ಟ್ವೀಟ್ ಮೂಲಕ ‘ನಾನು ಆಡಿದ ಅಸಡ್ಡೆ ಮತ್ತು ನಿಲರ್ಕ್ಷ್ಯದ ಮಾತಿಗೆ ದಯವಿಟ್ಟು ಕ್ಷಮಿಸಿ. ಪ್ರಾಮಾಣಿಕವಾಗಿ ಕ್ಷಮೆಯಾಚಿಸುತ್ತಿದ್ದೇನೆ’ ಎಂದು ರಮೇಶ್ ಕುಮಾರ್ ಮನವಿ ಮಾಡಿದ್ದಾರೆ
ಬೆಳಗಾವಿಯಲ್ಲಿ ನಡೆಯುತ್ತಿರುವ ಅಧಿವೇಶನದಲ್ಲಿ ಗುರುವಾರ ಪ್ರವಾಹದ ಹಾನಿ ಕುರಿತ ಚರ್ಚೆ ನಡೆಯುತ್ತಿತ್ತು. ಈ ವೇಳೆ ಪ್ರಕೃತಿ ವಿಕೋಪ ವಿಷಯದ ಬಗ್ಗೆ ಹೆಸರು ಕೊಟ್ಟವರದು ಸೇರಿ 25 ಶಾಸಕರು ಮಾತನಾಡಿದ್ದರು. ಮತ್ತೆ ಹಲವು ಶಾಸಕರು ಮಾತನಾಡಲು ಕೈಎತ್ತಿದಾಗ ನಾಲ್ಕು ದಿನಗಳಿಂದ ಚರ್ಚೆಯಾಗುತ್ತಿದೆ, ಸರ್ಕಾರದಿಂದ ಉತ್ತರ, ಬೇರೆ ಕಾರ್ಯ-ಕಲಾಪಗಳು ನಡೆಸುವುದು ಹೇಗೆ? ಎಂದು ಸ್ಪೀಕರ್ ಪ್ರಶ್ನಿಸಿದ್ದರು. ಸಿದ್ದರಾಮಯ್ಯ ಪ್ರವೇಶಿಸಿ, ವಿಷಯ ಗಂಭೀರವಾಗಿರುವ ಕಾರಣ ಬಯಸಿದ ಶಾಸಕರಿಗೆ ತಲಾ ಎರಡು ನಿಮಿಷ ಅವಕಾಶ ಕೊಡಿ. ಸರ್ಕಾರ ಶುಕ್ರವಾರ ನೀಡಲಿ ಎಂದು ಸಲಹೆ ನೀಡಿದ್ದರು. ಕಂದಾಯ ಸಚಿವ ಆರ್.ಅಶೋಕ್ ನಮ್ಮದೇನು ಅಭ್ಯಂತರವಿಲ್ಲ ಎಂದಿದ್ದರು.
ಆಗ ಸ್ಪೀಕರ್ ಮಾತು ಮುಂದುವರಿಸಿ, ಗಮನಸೆಳೆಯುವ ಸೂಚನೆಗಳಿಗೆ ಲಭ್ಯ ಉತ್ತರಗಳನ್ನು ಮಂಡಿಸುವೆ. ಸದನ ಮುಕ್ತವಾಗಿಡುತ್ತೇನೆ, ಎಷ್ಟು ಸದಸ್ಯರು ಬೇಕಾದರೂ ಮಾತನಾಡಲಿ ಎಂದರು. ಅಲ್ಲದೆ ನಗುತ್ತಲೇ ರಮೇಶ್ಕುಮಾರ್ ಉದ್ದೇಶಿಸಿ, ಸಿಚ್ಯುವೇಷನ್ ನಾಟ್ ಇನ್ ಕಂಟ್ರೋಲ್ ಲೆಟ್ಸ್ ಲೇಡೌನ್ ಇಟ್ (ಪರಿಸ್ಥಿತಿ ನಿಯಂತ್ರಣಕ್ಕೆ ಬರುವುದಿಲ್ಲ ಎಂದಾದರೆ ಹಾಗೆಯೇ ಬಿಡುವುದು ಲೇಸು) ಎಂಬ ಮಾತನ್ನೂ ಸೇರಿಸಿದರು. ಈ ವೇಳೆ ರಮೇಶ್ಕುಮಾರ್, “ದೇರ್ ಈಸ್ ಎ ಸೇಯಿಂಗ್, ವ್ಹೆನ್ ರೇಪ್ ಈಸ್ ಇನ್ನೆವಿಟಬಲ್ ಲೆಟ್ಸ್ ಲೇ ಡೌನ್ ಆ್ಯಂಡ್ ಎಂಜಾಯ್. ದಾಟ್ಸ್ ದಿ ಪೊಸಿಷನ್ ಟು ವಿತ್ ಯುವ್ ಆಲ್” (ಹೀಗೊಂದು ಮಾತಿದೆ, ಅತ್ಯಾಚಾರ ಅನಿವಾರ್ಯವಾಗಿದ್ದರೆ, ಆಸ್ವಾದಿಸಿ. ಅಂತಹ ಸ್ಥಿತಿಯಲ್ಲಿ ನಿಮ್ಮೊಂದಿಗೆ ನಾವೂ ಇದ್ದೇವೆ.) ಎನ್ನುತ್ತಾ ನಕ್ಕರು. ಪ್ರತಿಯಾಗಿ ಸ್ಪೀಕರ್ ಕೂಡ ನಕ್ಕಿದ್ದರು.
ಅತ್ಯಾಚಾರ ಅನಿವಾರ್ಯವಾಗಿದ್ದರೆ… ಆಸ್ವಾದಿಸಿ ಎಂಬರ್ಥದ ಮಾತು ಹೇಳಿದ ರಮೇಶ್ ಕುಮಾರ್ ವಿರುದ್ಧ ವ್ಯಾಪಕ ಟೀಕೆ ವ್ಯಕ್ತವಾಗುತ್ತಿದೆ. ವಿವಾದ ಹೆಚ್ಚಾಗುತ್ತಿದ್ದಂತೆ ಇದರ ಗಂಭೀರತೆ ಅರಿತ ರಮೇಶ್ಕುಮಾರ್ ಟ್ವೀಟ್ ಮೂಲಕವೂ ಕ್ಷಮೆಯಾಚಿಸಿದ್ದಾರೆ.
ರಮೇಶ್ ಕುಮಾರ್ ಅವರು 2019ರಲ್ಲಿ ತಾವು ಸ್ಪೀಕರ್ ಆಗಿದ್ದಾಗಲೂ ಹೀಗೇ ಸದನಲ್ಲಿ ರೇಪ್ ವಿಷಯ ಮಾತನಾಡಿ, ವಿವಾದಕ್ಕೀಡಾಗಿದ್ದರು. ಅದಾಗ್ಯೂ ಮತ್ತೊಮ್ಮೆ ಸದನದಲ್ಲಿ ಆ ವಿಚಾರವಾಗಿ ಮಾತನಾಡಿ, ಮತ್ತೆ ವಿವಾದ ಮೈಮೇಲೆ ಎಳೆದುಕೊಂಡಿದ್ದಾರೆ.
5 ಲಕ್ಷ ಲಂಚ ಪಡೆಯುತ್ತಿರುವಾಗಲೇ ಗಂಡನ ಜತೆ ರೆಡ್ಹ್ಯಾಂಡ್ ಆಗಿ ಸಿಕ್ಕಿಬಿದ್ದ ಗ್ರಾಪಂ ಅಧ್ಯಕ್ಷೆ!