ಚಿತ್ರ: ಜಂಗಲ್ ಮಂಗಲ್
ನಿರ್ದೇಶನ: ರಕ್ಷಿತ್ ಕುಮಾರ್
ತಾರಾಗಣ: ಯಶ್ ಶೆಟ್ಟಿ, ಹರ್ಷಿತಾ ರಾಮಚಂದ್ರ, ಉಗ್ರಂ ಮಂಜು, ದೀಪಕ್ ರೈ ಪಾಣಾಜೆ, ಬಲರಾಜವಾಡಿ ಮತ್ತಿತರರು
| ಹರ್ಷವರ್ಧನ್ ಬ್ಯಾಡನೂರು
ಅಂದು 2020ರ ಏ.5 ಕರೊನಾ ಲಾಕ್ಡೌನ್ ಸಮಯ. ಮಲೆನಾಡ ಯುವಕ ಪ್ರವೀಣ (ಯಶ್ ಶೆಟ್ಟಿ) ಕೆಲಸ ಬಿಟ್ಟು ಸಾಲ ಮಾಡಿ ಐಸ್ಕ್ರೀಮ್ ಡಿಸ್ಟ್ರಿಬ್ಯೂಷನ್ಗೆ ಕೈಹಾಕಿದ ಕೆಲವೇ ತಿಂಗಳಲ್ಲಿ ಕರೊನಾದಿಂದಾಗಿ ಬಿಜಿಯಾಗಿದ್ದ ಬಿಜಿನೆಸ್, ಗಜಿಬಿಜಿಯಾಗಿರುತ್ತದೆ. ಅದೇ ಗ್ರಾಮದ ಅಂಗನವಾಡಿ ಟೀಚರ್ ಭವ್ಯ ಅಲಿಯಾಸ್ ಅಮ್ಮಿ (ಹರ್ಷಿತಾ) ಜತೆ ಅವನದ್ದೊಂದು ಲವ್ಸ್ಟೋರಿ. ಅಪ್ಪ ಕುಡುಕ, ತಾಯಿ ಮುಗ್ಧೆ. ನಾಲ್ವರು ಹೆಣ್ಣುಮಕ್ಕಳಲ್ಲಿ ಹಿರಿಯಾಕೆ ಅಮ್ಮಿ. ರಾವಣನನ್ನೂ ಮೀರಿಸುವ ಬಾಬು (ಮಂಜು) ಅಮ್ಮಿ ಮೇಲೆ ಕಣ್ಣು ಹಾಕಿರುತ್ತಾನೆ. ಮದುವೆಯಾಗು ಅಂತ ಆಕೆಯ ಹಿಂದೆ ಬಿದ್ದಿರುತ್ತಾನೆ. ಹೀಗೆ ಸಮಸ್ಯೆಗಳ ಸರಮಾಲೆಯನ್ನೇ ಹೊದ್ದು ಮಲಗಿರುವ ಈ ಯುವಪ್ರೇಮಿಗಳು, ಆ ಹತಾಶೆಯಿಂದ ಹೊರಬರಲು ನಿರ್ಧರಿಸುತ್ತಾರೆ. ಊರಿಂದ ದೂರ ಮಲೆನಾಡ ಹಸಿರ ಸಿರಿಯ ನಡುವೆ ಹರಿವ ಝರಿಯ ಪಕ್ಕ ಕಷ್ಟ&ಸುಖ ಮಾತನಾಡಲು ತೆರಳುತ್ತಾರೆ. ಜೋಡಿಯನ್ನು ನೋಡುವ ಸ್ಥಳಿಯರು ನೈತಿಕ ಪೊಲೀಸ್ಗಿರಿಗೆ ಮುಂದಾಗುತ್ತಾರೆ. ಹಾಗಾದರೆ ಮುಂದೆ? ಈ ಜೋಡಿ ಊರಿನವರಿಂದ ತಪ್ಪಿಸಿಕೊಳ್ಳುತ್ತಾರಾ? ಹೇಗೆ? ಮುಂದೇನು? ತಿಳಿಯಲು “ಜಂಗಲ್ ಮಂಗಲ್’ ಸಿನಿಮಾ ನೋಡಿ.
ನಿರ್ದೇಶಕ ರಕ್ಷಿತ್ ಕುಮಾರ್ ಚೊಚ್ಚಲ ಪ್ರಯತ್ನದಲ್ಲೇ ಭರವಸೆ ಮೂಡಿಸುತ್ತಾರೆ. ಕೇವಲ 92 ನಿಮಿಷದ ಚಿತ್ರವಾಗಿದ್ದು, ಎಲ್ಲೂ ಬೋರ್ ಹೊಡಿಸದೇ ಅಚ್ಚುಕಟ್ಟಾಗಿ ನೋಡಿಸಿಕೊಂಡು ಹೋಗುತ್ತದೆ. ನಾಯಕ. ನಾಯಕಿಯ ಜತೆಗೆ ಸುತ್ತಮುತ್ತಲಿನ ಬಹುತೇಕ ಪಾತ್ರಗಳ ಹಿನ್ನೆಲೆಯನ್ನೂ ಹೇಳುತ್ತಾ, ಒಂದಕ್ಕೊಂದು ಬೆಸೆದಿರುವ ರೀತಿ ಶ್ಲಾಘನೀಯ. ಹೀಗಾಗಿ ಈ ಚಿತ್ರಕ್ಕೆ ಕಥಾನಾಯಕನಿಲ್ಲ, ಕಥೆಯೇ ನಾಯಕ. ಫ್ರಸ್ಟ್ರೆಟೆಡ್ ಪ್ರವೀಣನಾಗಿ ಯಶ್ ಶೆಟ್ಟಿ, ಆತಂಕ, ಗೊಂದಲಗಳಿಂದ ಕೂಡಿದ ಅಸಹಾಯಕ ಅಮ್ಮಿ ಪಾತ್ರದಲ್ಲಿ ಹರ್ಷಿತಾ ಪಾತ್ರಗಳನ್ನು ಜೀವಿಸಿದ್ದಾರೆ. ಆದರೆ, ಅಕ್ರಮ ಮರಳು ದಂಧೆಕೋರ ಬಾಬು ಪಾತ್ರದಲ್ಲಿ ಉಗ್ರಂ ಮಂಜು ನಟನೆ ಎಲ್ಲರನ್ನೂ ಮೀರಿಸುವಂತಿದೆ. ಮಲೆನಾಡಿನ ಸೌಂದರ್ಯವನ್ನು ವಿಷ್ಣುಪ್ರಸಾದ್ ಬೆಳ್ಳಿತೆರೆಯ ಮೇಲೆ ಅಷ್ಟೇ ಸುಂದರವಾಗಿ ತೋರಿಸಿದ್ದಾರೆ. ಒಂದೂವರೆ ತಾಸು ಆರಾಮಾಗಿ ಕುಳಿತು ನೋಡಬಹುದಾದ ಒಂದೊಳ್ಳೆ ಮನರಂಜನಾತ್ಮಕ ಅಡ್ವೆಂಚರ್ ಥ್ರಿಲ್ಲರ್ ಚಿತ್ರವಿದು.
