ಬದುಕಿಗೆ ಬಸವ ತತ್ವ ದಾರಿದೀಪ

ಬೀದರ್: ಬಸವ ತತ್ವ ಆಚರಣೆ ಬದುಕಿಗೆ ದಾರಿದೀಪವಾಗಿದೆ ಎಂದು ಬೀದರ್ ವಿಶ್ವವಿದ್ಯಾಲಯ ಕುಲಸಚಿವ ಪ್ರೊ.ಪರಮೇಶ್ವರ ನಾಯಕ್ ಹೇಳಿದರು.
ನಗರದಲ್ಲಿ ಜಿಲ್ಲಾ ಬಸವ ಕೇಂದ್ರದಿಂದ ಶ್ರಾವಣ ಮಾಸ ನಿಮಿತ್ತ ಒಂದು ತಿಂಗಳ ಆಯೋಜಿಸಿದ್ದ ಜೀವನ ದರ್ಶನ ಪ್ರವಚನಕ್ಕೆ ಚಾಲನೆ ನೀಡಿದ ಅವರು, ವಚನಗಳ ಮೂಲಕ ಸಾಮಾಜಿಕ ಸಾಮರಸ್ಯ, ಜಾತ್ಯತೀತ ಮನೋಭಾವ, ಕಾಯಕ-ದಾಸೋಹ ತತ್ವಗಳನ್ನು ಸಾರಿದ ಬಸವಾದಿ ಶರಣರ ಕನಸು ನನಸಾಗಿಸಬೇಕು ಎಂದರು.
ಇದು ಶರಣರು ನಡೆದಾಡಿದ ಪುಣ್ಯಭೂಮಿ. ಯಾವುದೇ ಜಾತಿ, ಪಂಥಕ್ಕೆ ಶರಣರು ಸೀಮಿತವಲ್ಲ. ಅವರು ಮನುಷ್ಯ ಧರ್ಮವನ್ನು ಪ್ರತಿಪಾದಿಸಿದ್ದಾರೆ. ಅವರ ವಚನಗಳನ್ನು ಪ್ರತಿಯೊಬ್ಬರೂ ಓದಿ ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು. ಕಲ್ಲು ನಾಗರಕ್ಕೆ ಹಾಲೆರೆಯದೆ ಬಡವರಿಗೆ ಅನ್ನ ದಾಸೋಹ ಮಾಡಲು ಹೇಳಿ ಮೂಢನಂಬಿಕೆ ಕಿತ್ತು ಹಾಕಿದ್ದು ಶರಣರು. ಒಂದು ತಿಂಗಳ ಪ್ರವಚನವನ್ನು ಎಲ್ಲರೂ ಆಲಿಸಬೇಕು ಎಂದು ಕೋರಿದರು.
ಅಧ್ಯಕ್ಷತೆ ವಹಿಸಿದ್ದ ಬಸವ ಕೇಂದ್ರ ಜಿಲ್ಲಾಧ್ಯಕ್ಷ ಶರಣಪ್ಪ ಮಿಠಾರೆ ಮಾತನಾಡಿ, ಶ್ರಾವಣ ನಿಮಿತ್ತ ಒಂದು ತಿಂಗಳು ಗದಗದ ಪ್ರೊ.ಸಿದ್ದು ಯಾಪಲಪರವಿ ಅವರು ವಿದ್ಯಾನಗರ ಬಡಾವಣೆ ಕೇಂದ್ರದಲ್ಲಿ ನಿತ್ಯ ಸಂಜೆ 6.30ಕ್ಕೆ ಪ್ರವಚನ ನೀಡಲಿದ್ದಾರೆ ಎಂದು ತಿಳಿಸಿದರು.
ನಗರಸಭೆ ಮಾಜಿ ಸದಸ್ಯ ಧನರಾಜ ಹಂಗರಗಿ, ಪ್ರವಚನ ಸಮಿತಿ ಅಧ್ಯಕ್ಷ ರೇವಣಸಿದ್ದಪ್ಪ ಜಲಾದೆ ಮಾತನಾಡಿದರು. ಕಸಾಪ ಜಿಲ್ಲಾಧ್ಯಕ್ಷ ಸುರೇಶ ಚನ್ನಶೆಟ್ಟಿ, ಕರುಣಾ ಶೆಟಕಾರ್, ಸಂಪಾವತಿ ಪಾಟೀಲ್, ರಾಚಮ್ಮ ಚಿಕ್ಕಪೇಟೆ, ಕವಿತಾ ಸ್ವಾಮಿ ಬಂಪಳ್ಳಿ, ರೇವಣ್ಣಪ್ಪ ಮೂಲಗೆ ಇತರರಿದ್ದರು. ಬಾಬುರಾವ ದಾನಿ ಸ್ವಾಗತಿಸಿದರು. ಶಿವಶಂಕರ ಟೋಕರೆ ನಿರೂಪಣೆ ಮಾಡಿದರು. ವಿದ್ಯಾವತಿ ಬಲ್ಲೂರ ವಂದಿಸಿದರು.
ಪಶು ವೈದ್ಯಕೀಯ ಮತ್ತು ಮೀನುಗಾರಿಕೆ ವಿಶ್ವವಿದ್ಯಾಲಯ ಆಡಳಿತ ಮಂಡಳಿ ಸದಸ್ಯ ಬಸವರಾಜ ಪಿ.ಭತಮುರ್ಗೆ, ಚಲನಚಿತ್ರ ನಿರ್ಮಾಪಕ ನಿರ್ದೇಶಕ ವಿಷ್ಣುಕಾಂತ ಬಿ.ಜೆ. ದಂಪತಿ, ವೀರಪ್ಪ ಜೀರ್ಗೆ, ಬಾಬುರಾವ ಬಿರಾದಾರ್ ಮೇಹಕರ್, ಭೀಮಣ್ಣ ಹಡಪದ ಅವರನ್ನು ಸನ್ಮಾನಿಸಲಾಯಿತು.