ಲಖನೌ: ಇಂದು (ಫೆ.4) ಮದುವೆ ಮಂಟಪದಲ್ಲಿ ಹಸೆ ಮಣೆ ಏರಬೇಕಾಗಿದ್ದ ಯುವತಿಯೊಬ್ಬಳು ನದಿಯಲ್ಲಿ ಹೆಣವಾಗಿ ಪತ್ತೆಯಾಗಿರುವ ಘಟನೆ ಉತ್ತರ ಪ್ರದೇಶದ ಬಿಜ್ನೋರ್ನ ಮಂದಾವರ್ನಲ್ಲಿ ನಡೆದಿದೆ.
ಮಂದಾವರ್ನಲ್ಲಿರುವ ಮಲನ್ ನದಿಯಲ್ಲಿ 22 ವರ್ಷದ ಯುವತಿಯ ಮೃತದೇಹ ಪತ್ತೆಯಾಗಿದೆ. ಅಪಘಾತದಿಂದಾಗಿ ಗಂಭೀರ ಗಾಯಗಳಾಗಿರುವ ಆಕೆಯ ತಂದೆಯ ಆಸೆಯಂತೆ ಯುವತಿಗೆ ಇಂದು ಮದುವೆಯನ್ನು ಫಿಕ್ಸ್ ಮಾಡಲಾಗಿತ್ತು. ಕೆಲ ವರ್ಷಗಳ ಹಿಂದೆ ತಾಯಿಯನ್ನು ಕಳೆದುಕೊಂಡಿದ್ದ ಯುವತಿ ಭಾನುವಾರ ಸಂಜೆ ಮನೆಯಿಂದ ಕಾಣೆಯಾಗಿದ್ದಳು.
ರಾವುಲಿ ಗ್ರಾಮದ ಬಳಿ ಮಲನ್ ನದಿಗೆ ಹಾಕಲಾಗಿರುವ ಸೇತುವೆಯ ಕಂಬವೊಂದಕ್ಕೆ ಮೃತ ದೇಹವು ಸಿಲುಕಿಕೊಂಡಿದ್ದು, ಅದನ್ನು ಕಂಡ ದಾರಿಹೋಕನೊಬ್ಬ ಪೊಲೀಸರಿಗೆ ವಿಷಯ ತಲುಪಿಸಿದ್ದಾನೆ. ಗ್ರಾಮಸ್ಥರು ದೇಹವನ್ನು ಗುರುತಿಸಿದ್ದಾರೆ. ಮೇಲ್ನೋಟಕ್ಕೆ ಇದು ಆತ್ಮಹತ್ಯೆಯಂತೆ ಕಂಡುಬಂದಿದ್ದು, ಹೆಚ್ಚಿನ ತನಿಖೆ ನಡೆಸುತ್ತಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ. (ಏಜೆನ್ಸೀಸ್)