ಕೊಪ್ಪಳ: ಕೇಂದ್ರ ಸರ್ಕಾರ ವಕ್ಫ್ ಆಸ್ತಿ ರಕ್ಷಣೆ ಹಾಗೂ ಸುಧಾರಣೆ ಹೆಸರಿನಲ್ಲಿ ಜಾತ್ಯಾತಿತ ಮೌಲ್ಯಗಳಿಗೆ ವಿರುದ್ಧವಾದ ತಿದ್ದುಪಡಿ ಮಾಡುತ್ತಿದೆ ಎಂದು ಆರೋಪಿಸಿ ಎಸ್ಡಿಪಿಐ ಜಿಲ್ಲಾ ಪದಾಧಿಕಾರಿಗಳು ಶುಕ್ರವಾರ ನಗರದಲ್ಲಿ ಪ್ರತಿಭಟನಾ ಮೆರವಣಿಗೆ ನಡೆಸಿದರು.
ವಕ್ಫ್ ಬಿಲ್ -2024 ತಂದಿದ್ದು ಆಘಾತಕಾರಿ. ಮುಸ್ಲಿಮ್ ಸಮುದಾಯ ಕ್ಷೇಮಾಭಿವೃದ್ಧಿಗೆ ಇರುವ ವಕ್ಫ್ ಆಸ್ತಿಗಳನ್ನು ಕಸಿದುಕೊಳ್ಳುವ ಹುನ್ನಾರ ಇದರಲ್ಲಿ ಅಡಿಗಿದೆ. ಸದ್ಯದ ಕಾಯ್ದೆಗೆ 40 ತಿದ್ದುಪಡಿ ಮಾಡುವ ಮೂಲಕ ನಾಶಕ್ಕೆ ಮುಂದಾಗಿದೆ. ಇದು ಜಾತ್ಯಾತಿತ ಮೌಲ್ಯಗಳ ವಿರುದ್ಧವಾಗಿದೆ. ತಾರತಾಮ್ಯದಿಂದ ಕೂಡಿದೆ. ಇದನ್ನು ಸೋಶಿಯಲ್ ಡೆಮಾಕ್ರಟಿಕ್ ಪಾರ್ಟಿ ಆಫ್ ಇಂಡಿಯಾ ತೀವ್ರವಾಗಿ ಖಂಡಿಸುತ್ತದೆ ಎಂದು ವಿರೋಧಿಸಿದರು.
ಹೊಸ ಮಸೂದೆ ನ್ಯಾಯಾಂಗ ಅಧಿಕಾರ ಕಸಿಯಲಿದೆ. ಹಿಂದುಗಳಿಗೆ ವಕ್ಫ್ ಮಂಡಳಿ ಸದಸ್ಯರನ್ನಾಗಿ ನೇಮಿಸುದು ಸರಿಯಲ್ಲ. ಆಸ್ತಿಗಳನ್ನು ವಕ್ಫ್ ನಿಯಂತ್ರಣದಿಂದ ದೂರ ಇಡುವುದು ಹಾನಿ ಮಾಡಲಿದೆ. ಭೂ ಪರಿವರ್ತನೆಗೆ 90 ದಿನ ನೀಡಿದ್ದು ಸಾಕಾಗುವುದಿಲ್ಲ. ದುರುದ್ದೇಶದಿಂದ ಕೂಡಿದ ಮಸೂದೆ ಮುಸಲ್ಮಾನರನ್ನು ಎರಡನೇ ದರ್ಜೆ ನಾಗರಿಕರನ್ನಾಗಿ ಮಾಡಲು ಹೊರಟಿದೆ ಎಂದು ಆರೋಪಿಸಿದರು.
ತಕ್ಷಣ ಮಸೂದೆ ಕೈ ಬಿಡುವಂತೆ ಆಗ್ರಹಿಸಿದರು. ಪ್ರತಿಭಟನೆ ಬಳಿಕ ತಹಸೀಲ್ದಾರ್ ವಿಠ್ಠಲ ಚೌಗಲಾ ಮೂಲಕ ಮನವಿ ಸಲ್ಲಿಸಿದರು. ಹುಜೂರ್ ಅಹ್ಮದ್, ಯೂಸುಫಿಯ ಮಸ್ಜಿದ್ ಇಮಾಮ್ ಮುಫ್ತಿ ನಜಿರ್ ಅಹ್ಮದ್, ಪ್ರಮುಖರಾದ ನಿಜಾಮುದ್ದಿನ್ ಮಾಳೇಕೊಪ್ಪ, ಸಲೀಮ್ ಖಾದ್ರಿ, ಫಾರೂಕ್ ಅತ್ತಾರ, ಮೊಹಮ್ಮದ್ ಸಾಧಿಕ್, ಅರ್ಷದ್ ಶೈಖ್, ತಬ್ರೇಜ್ ಶೈಖ್ ಖಾಜಾ ಹುಸೇನ್ ಗದಗ ಇತರರಿದ್ದರು.
