ನಾಡಿಗೆ ಸಾಹಿತ್ಯ ಭಂಡಾರ ಕಟ್ಟಿಕೊಟ್ಟವರು ಕುವೆಂಪು

ವಿಜಯಪುರ: ಕನ್ನಡ ನಾಡಿಗೆ ಸಾಹಿತ್ಯದ ಭಂಡಾರವನ್ನೇ ಕಟ್ಟಿಕೊಟ್ಟವರು ಪುವೆಂಪು. ಅವರ ಸಾಹಿತ್ಯದಲ್ಲಿ ಎಲ್ಲ ನೆಲೆಗಳನ್ನೂ ಕಾಣಬಹುದೆಂದು ಬೆಂಗಳೂರಿನ ಖ್ಯಾತ ಸಾಹಿತಿ ನಾಡೋಜ ಡಾ.ಕಮಲಾ ಹಂಪನಾ ಅಭಿಪ್ರಾಯಸಿದರು.

ಅಕ್ಕಮಹಾದೇವಿ ಮಹಿಳಾ ವಿವಿ ಜ್ಞಾನಶಕ್ತಿ ಆವರಣದ ಕನ್ನಡ ಅಧ್ಯಯನ ವಿಭಾಗದ ಸಭಾಂಗಣದಲ್ಲಿ ಬುಧವಾರ ಕುಪ್ಪಳ್ಳಿಯ ರಾಷ್ಟ್ರಕವಿ ಕುವೆಂಪು ಪ್ರತಿಷ್ಠಾನದ ಸಹಯೋಗದಲ್ಲಿ ಹಮ್ಮಿಕೊಂಡಿದ್ದ ‘ಕುವೆಂಪು ಕೃತಿಗಳಲ್ಲಿ ಬಹುತ್ವದ ನೆಲೆಗಳು’ ಕುರಿತ ಎರಡು ದಿನದ ವಿಚಾರ ಸಂಕಿರಣ ಉದ್ಘಾಟಿಸಿ ಅವರು ಮಾತನಾಡಿದರು.

ಕನ್ನಡದ ಅಸ್ಮಿತೆ ಸಾರಿದ ಕವಿ:
ಕುವೆಂಪು ಅವರ ಕೃತಿಗಳನ್ನು ಓದಿದರೆ 20ನೇ ಶತಮಾನದ ಸಾಹಿತ್ಯವನ್ನೆಲ್ಲಾ ಓದಿದಂತಾಗುತ್ತದೆ. ಪರಿಸರ, ಕೃಷಿ, ಮಹಿಳೆ, ಶೂದ್ರ ಇನ್ನಿತರ ಆಯಾಮಗಳನ್ನು ಒಳಗೊಂಡ ಕಾದಂಬರಿ, ನಾಟಕ, ಶಿಶು ಸಾಹಿತ್ಯ, ಕವನ ಸಂಕಲನ ಹೀಗೆ ಸಾಹಿತ್ಯದ ಎಲ್ಲ ನೆಲೆಗಳನ್ನು ಕುವೆಂಪು ಅವರ ಸಾಹಿತ್ಯದಲ್ಲಿ ಕಾಣಬಹುದು. ಶೂದ್ರ ಶಕ್ತಿ ಮತ್ತು ಆತ್ಮವಿಶ್ವಾಸವನ್ನು ಬೆಳೆಸಿ, ಕನ್ನಡದ ಅಸ್ಮಿತೆಯನ್ನು ನಮ್ಮೆಲ್ಲರಿಗೆ ತೋರಿಸಿಕೊಟ್ಟ ನಾಡಿನ ಶ್ರೇಷ್ಠ ಕವಿ ಕುವೆಂಪು. ಇಲ್ಲಿ ಯಾರೂ ಮೇಲಲ್ಲ, ಯಾರೂ ಕೀಳಲ್ಲ. ಎಲ್ಲರೂ ಸಮಾನರೆಂಬ ಕುವೆಂಪು ಅವರ ಬಹುತ್ವದ ನೆಲೆಗಳನ್ನು ಅವರು ಕೃತಿಗಳಲ್ಲಿ ಕಾಣುತ್ತೇವೆ. ಇಂತಹ ಕವಿ, ಸಾಹಿತಿಯನ್ನು ಕಾಣುವುದು ಕಷ್ಟಸಾಧ್ಯ ಎಂದರು.
ಯಾವ ಭಾಷೆಯ ಮೇಲೆಯೂ ದ್ವೇಷ ಇಲ್ಲ. ಭಾಷೆಯನ್ನು ಎಲ್ಲರೂ ಗೌರವಿಸಬೇಕು. ಆದರೆ ದಕ್ಷಿಣ ಭಾರತದ ಮೇಲೆ ಹಿಂದಿ ಭಾಷೆಯನ್ನು ಬಲವಂತದಿಂದ ಹೇರಿ ನಮ್ಮ ಪ್ರಾದೇಶಿಕ ಭಾಷೆಗಳ ಅಳಿವಿಗೆ ಸಂಚು ನಡೆಸುತ್ತಿರುವರೆಂಬ ಭಯ, ಆತಂಕ ನಮ್ಮನ್ನು ಕಾಡುತ್ತಿದೆ ಎಂದು ಅವರು ಕಳವಳ ವ್ಯಕ್ತಪಡಿಸಿದರು.

ವಿಶ್ವಮಾನವ ಸಂದೇಶ:
ಕುಪ್ಪಳ್ಳಿಯ ರಾಷ್ಟ್ರಕವಿ ಕುವೆಂಪು ಪ್ರತಿಷ್ಠಾನದ ಅಧ್ಯಕ್ಷ ಮತ್ತು ವಿದ್ವಾಂಸ ಪ್ರೊ.ಹಂಪ ನಾಗರಾಜಯ್ಯ ಮಾತನಾಡಿ, ಕುವೆಂಪು ಅವರು ನೀಡಿದ ಸರ್ವೋದಯ, ಸಮನ್ವಯ, ವಿಶ್ವಮಾನವನ ಸಂದೇಶ ಜಾಗತಿಕ ವೇದಿಕೆಯಲ್ಲಿ ಬೃಹತ್ ಮಟ್ಟದಲ್ಲಿ ಪರಿಣಾಮ ಮೂಡಿಸಿದೆ ಎಂದು ಹೇಳಿದರು.

ಕುವೆಂಪು ಅವರ ದೈಹಿಕ ಚಿತ್ರಣ ನೋಡಲು ಆಗದು. ಆದರೆ ಅವರಿಗೆ ಸ್ಪೂರ್ತಿ ನೀಡಿದ ಊರು, ಬೆಟ್ಟ-ಗುಡ್ಡ, ಕಾಡು, ಪರಿಸರವನ್ನು ನೋಡಿ ಮತ್ತು ಅವರ ಸಾಹಿತ್ಯವನ್ನು ಓದಿ ಅವರನ್ನು ಅರ್ಥ್ಯೆಸಿಕೊಳ್ಳಬೇಕು ಎಂದು ಹೇಳಿದರು.

ಕುವೆಂಪು ಜನ್ಮ ಸ್ಥಳವು ಅವರ ಸಾಹಿತ್ಯಕ್ಕೆ ಭೂಮಿಕೆಯಾಗಿದ್ದು, ಹೊಸ ಲೋಕವನ್ನೇ ತೆರೆದಿಟ್ಟಿದೆ. ಮರಭೂಮಿಯಂತಾಗಿದ್ದ ಸಾಹಿತ್ಯ ಲೋಕದಲ್ಲಿ ಲೇಖನಿ ಹಿಡಿದು ಪ್ರವೇಶಿಸಿದ ಕುವೆಂಪು ಅವರ ಸಾಹಿತ್ಯ ಬಹುತ್ವದ ನೆಲೆಯನ್ನು ಒದಗಿಸುತ್ತದೆ ಎಂದರು.

ಕುವೆಂಪು ಅವರ ಪುತ್ರಿ ಹಾಗೂ ಖ್ಯಾತ ಬರಹಗಾರ್ತಿ ತಾರಿಣಿ ಚಿದಾನಂದ ಮಾತನಾಡಿ, ಕುವೆಂಪು ಅವರ ಮಗಳಾಗಿ ಪ್ರತಿನಿತ್ಯ ಕಾಣುತ್ತಿದ್ದ ಕುವೆಂಪು ಅವರ ವ್ಯಕ್ತಿತ್ವದ ಅನುಭವಗಳನ್ನು ತುಂಬಾ ಸಂತಸದಿಂದ ವಿದ್ಯಾರ್ಥಿನಿಯರೊಂದಿಗೆ ಹಂಚಿಕೊಂಡರು. ಕುವೆಂಪು ಅವರು ತಮ್ಮ ಮಕ್ಕಳಿಗೂ ಸಾಹಿತ್ಯಾಸಕ್ತಿ ಬೆಳೆಸಿ ಅವರಿಗೆ ಪ್ರೋತ್ಸಾಹ ನೀಡಿದ್ದನ್ನು ತಾರಿಣಿ ಸ್ಮರಿಸಿದರು.

ಕುಲಪತಿ ಪ್ರೊ.ಸಬಿಹಾ ಅಧ್ಯಕ್ಷತೆ ವಹಿಸಿದ್ದರು. ಶಿವಮೊಗ್ಗ ಕುವೆಂಪು ವಿವಿ ನಿವೃತ್ತ ಪ್ರಾಧ್ಯಾಪಕ ಪ್ರೊ.ರಾಜೇಂದ್ರ ಚೆನ್ನಿ ದಿಕ್ಸೂಚಿ ಭಾಷಣ ಮಾಡಿದರು. ಕಡಿದಾಳ್ ಪ್ರಕಾಶ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಕುಲಸಚಿವೆ ಪ್ರೊ.ಆರ್.ಸುನಂದಮ್ಮ ಸ್ವಾಗತಿಸಿದರು. ಡಾ.ವಿಷ್ಣು ಶಿಂಧೆ ಪರಿಚಯಿಸಿ, ನಿರೂಪಿಸಿದರು. ಪ್ರೊ.ಓಂಕಾರ ಕಾಕಡೆ ವಂದಿಸಿದರು. ಸಂವಾದಕರಾಗಿ ವಿಕ್ರಮ ವಿಸಾಜೆ, ಡಾ.ಕಲಾಶ್ರೀ, ಡಾ.ಜಿನದತ್ತ ಹಡಗಲಿ, ಡಾ.ಆರ್. ರೇಣು, ಪ್ರೊ.ಮಹೇಶ ಚಿಂತಾಮಣಿ, ಪ್ರೊ.ಕೆ.ಚಿದಾನಂದಗೌಡ, ಮಹಿಳಾ ವಿವಿ ಆರ್ಥಿಕ ಅಧಿಕಾರಿ ಪ್ರೊ.ಎಸ್.ಬಿ. ಮಾಡಗಿ ಸೇರಿದಂತೆ ಇತರರಿದ್ದರು.

ಕುವೆಂಪು ಕನ್ನಡಕ್ಕೆ ಸೀಮಿತವಲ್ಲ
ನಮ್ಮ ತಲ್ಲಣಗಳಿಗೆ, ನಮ್ಮಲ್ಲಿರುವ ಎಲ್ಲಾ ತವಕಗಳಿಗೆ ಒಡನಾಡಿಯಾಗುವ ಕವಿಯಾದವರು ಕುವೆಂಪು. ಆದರೆ ಅವರನ್ನು ಕೇವಲ ಕನ್ನಡ ಬರಹಕ್ಕೆ ಮಾತ್ರ ಸೀಮಿತವಾಗಿರಿಸಿದ್ದೇವೆ. ಕುವೆಂಪು ಅವರನ್ನು ಜಾಗತಿಕ ಸಾಹಿತ್ಯ ಬರವಣಿಗೆಯಲ್ಲಿ ಗುರುತಿಸುವ ಜವಾಬ್ದಾರಿ ನಮ್ಮೆಲ್ಲರದು ಎಂದು ಶಿವಮೊಗ್ಗದ ಕುವೆಂಪು ವಿವಿ ನಿವೃತ್ತ ಪ್ರಾಧ್ಯಾಪಕ ಪ್ರೊ.ರಾಜೇಂದ್ರ ಚೆನ್ನಿ ಅಭಿಪ್ರಾಯಿಸಿದರು.

ವಿಚಾರ ಸಂಕಿರಣದಲ್ಲಿ ದಿಕ್ಸೂಚಿ ಭಾಷಣ ಮಾಡಿದ ಅವರು, ಬಹುಮುಖಿ, ಬಹುಸಂಸ್ಕೃತಿ, ಬಹುಧರ್ಮೀಯ, ಬಹುತ್ವವನ್ನು ಒಪ್ಪಿಕೊಳ್ಳುವ ಕೆಲಸವನ್ನು ಮಾಡಿದ ಕುವೆಂಪು ದಲಿತ ಸಮುದಾಯಗಳನ್ನು ಸಹ ತಮ್ಮ ಸಾಹಿತ್ಯದಲ್ಲಿ ತಂದಿದ್ದಾರೆ. ಇದರಿಂದ ಅವರ ಬಹುತ್ವದ ಕಲ್ಪನೆ ಹೇಗಿತ್ತು ಎಂಬುದನ್ನು ಅರಿಯಬೇಕು ಎಂದರು.

ಆಧುನೀಕತೆಯ ಪ್ರಶ್ನೆಯನ್ನು ಇಟ್ಟುಕೊಂಡು ಗಾಂಧೀ, ಅಂಬೇಡ್ಕರ್ ಅವರನ್ನು ಮಾತ್ರ ಚರ್ಚೆಗೆ ಒಳಪಡಿಸುತ್ತೇವೆಯೇ ಹೊರತು ಕುವೆಂಪು ಅವರನ್ನು ಚರ್ಚಿಸದೆ ಇರುವುದು ದುರ್ದೈವವೇ ಸರಿ. ಇದು ಭಾರತದ ಚಿಂತನೆಗೆ ಬಹು ದೊಡ್ಡ ನಷ್ಟ ಎಂಬುದನ್ನು ಮರೆಯಬಾರದು. ಯಾರು ಸಮಾಜವನ್ನು ಶುಚಿಯಾಗಿಡುತ್ತಾರೋ ಅವರನ್ನು ಅಶುಚಿ ಎಂದು ದೂರ ಇಡುವ ವ್ಯವಸ್ಥೆ ಇದೆ. ಆದರೆ ಕುವೆಂಪು ಇದನ್ನು ಮೀರಬೇಕೆಂಬ ಮತ್ತು ಈ ವ್ಯವಸ್ಥೆಯನ್ನು ಒಡೆಯಬೇಕೆಂಬ ಚಿಂತನೆಯನ್ನು ತಮ್ಮ ಕೃತಿಗಳಲ್ಲಿ ಕಟ್ಟಿಕೊಡುತ್ತಾರೆ ಎಂದು ತಿಳಿಸಿದರು.





Leave a Reply

Your email address will not be published. Required fields are marked *