ತೋರಣಗಟ್ಟೆ ಕಾಟಮ್ಮಗೆ ಜಾನಪದ ಅಕಾಡೆಮಿ ಪ್ರಶಸ್ತಿ

ಜಗಳೂರು: ತಾಲೂಕಿನ ತೋರಣಗಟ್ಟೆ ಗ್ರಾಮದ ಕಾಟಮ್ಮ ಅವರಿಗೆ 2024ನೇ ಸಾಲಿನ ಕರ್ನಾಟಕ ಜಾನಪದ ಅಕಾಡೆಮಿ ಪ್ರಶಸ್ತಿ ಲಭಿಸಿದೆ.

ತೋರಣಗಟ್ಟೆ ಗ್ರಾಮದ ಗೌಡ್ರ ಚಿಕ್ಕಪ್ಪ ಮತ್ತು ಗೌರಮ್ಮ ದಂಪತಿ ಪುತ್ರಿಯಾದ ಕಾಟಮ್ಮ ಬಾಲ್ಯದಿಂದಲೇ ಸೋಬಾನೆ, ದೇವರ ಪದ, ಕುಣಿತ, ಮಣಿತಗಳ ಪದಗಳನ್ನು ಚಿತ್ತವಿಟ್ಟು ಆಲಿಸುತ್ತಲೇ ಕಲಿತುಕೊಂಡು ಬಂದರು.

ಹುಟ್ಟಿದ ಊರಿನಲ್ಲಿಯೇ ಬಾಲಪ್ಪ ಅವರನ್ನು ವಿವಾಹವಾದ ಕಾಟಮ್ಮ ನಾಲ್ಕು ಮಕ್ಕಳ ತಾಯಿಯಾಗಿ, ತುಂಬು ಸಂಸಾರ ನಿರ್ವಹಿಸುತ್ತಲೇ ತನ್ನ ಎದೆಯೊಳಗಿನ ಪದಗಳಿಗೆ ದನಿಯಾಗುತ್ತ ಬಂದರು.

ಸೋದರಿ ಶಾಂತವೀರಮ್ಮ ಹಾಗೂ ಸಮೀಪದ ಬಂಧುಗಳಾದ ಬಾಲಮ್ಮ, ಬಡಮ್ಮ ಮುಂತಾದವರ ತಂಡ ಕಟ್ಟಿಕೊಂಡು ಜಾನಪದ ಸಾಂಸ್ಕೃತಿಕ ವೀರರ ಬಗ್ಗೆ ಸುದೀರ್ಘ ಕಥನ ಕಾವ್ಯಗಳನ್ನು ಕಟ್ಟಿ ನಿರರ್ಗಳವಾಗಿ ಹಾಡುತ್ತಾರೆ.

ದಾವಣಗೆರೆ ಸೀಮೆಯ ಅವಧೂತ ಪರಂಪರೆಯ ಮೆಲ್ಲಜ್ಜ (ಮಳ ಮಲ್ಲಪ್ಪ)ನ ಬಗ್ಗೆ ಕಟ್ಟಿಕೊಡುವ ಪದಗಳು ಬಹು ಪ್ರಸಿದ್ಧಿ ಪಡೆದಿವೆ. ಯಾರದೇ ಮದುವೆಯಾಗಲಿ ಕಾಟಮ್ಮ ನವರ ಉಪಸ್ಥಿತಿ ಇರುತ್ತದೆ.

ಸುದೀರ್ಘ ನಲವತ್ತು ವರ್ಷಗಳಿಂದ ನಿರಂತರವಾಗಿ ಪದಗಂಗೆ ಹರಿಸುತ್ತಿರುವ ಎಲೆಮರೆಯ ಪ್ರತಿಭೆ ಕಾಟಮ್ಮ ಅವರನ್ನು ಕರ್ನಾಟಕ ಜಾನಪದ ಅಕಾಡೆಮಿ ಗುರುತಿಸಿ ಗೌರವಿಸುತ್ತಿರುವುದು ಹೆಮ್ಮೆಯ ಸಂಗತಿಯಾಗಿದೆ.

ಜಗಳೂರು ತಾಲೂಕಿನ ಗ್ರಾಮೀಣ ಪ್ರದೇಶದ ನನ್ನನ್ನು ಸರ್ಕಾರ ಗುರುತಿಸಿ ಜಾನಪದ ಅಕಾಡೆಮಿ ಪ್ರಶಸ್ತಿ ನೀಡುತ್ತಿರುವುದು ತುಂಬ ಸಂತಸ ತಂದಿದೆ. ಜಾನಪದ ಕಲೆಯನ್ನು ಹುಟ್ಟಿನಿಂದಲೂ ರೂಢಿಸಿಕೊಂಡು ಬಂದಿದ್ದೇನೆ. ಹಿರಿಯರಿಂದ ಜನಪದಗಳನ್ನು ಕಲಿತು ಅವರ ಪರಂಪರೆ ಉಳಿಸಿಕೊಂಡು ಬಂದಿದ್ದೇನೆ. ಇದು ಇಲ್ಲಿಗೇ ಮುಗಿಯಬಾರದು. ಶಾಶ್ವತವಾಗಿ ಕಲೆ ಉಳಿಯಬೇಕು, ಬೆಳಸಬೇಕು ಎನ್ನುವುದು ನನ್ನ ಆಶಯವಾಗಿದೆ.
ಕಾಟಮ್ಮ, ಜಾನಪದ ಕಲಾವಿದೆ, ತೋರಣಗಟ್ಟೆ.