ಬಾಗಲಕೋಟೆ: 50ಕ್ಕೂ ಹೆಚ್ಚು ಕಡೆ ಎತ್ತಿನ ಬಂಡಿ ಸ್ಪರ್ಧೆಯಲ್ಲಿ ಸ್ಪರ್ಧಿಸಿ, ಗೆಲುವಿನ ಸರದಾರ ಎನಿಸಿಕೊಂಡಿರುವ ಎತ್ತು, ದಾಖಲೆಯ ಮೊತ್ತಕ್ಕೆ ಮಾರಾಟವಾಗಿದೆ. ಹಲಕಿ ಗ್ರಾಮದ ಗಡದಾರ ಕುಟುಂಬದ ಎತ್ತು ಬರೋಬ್ಬರಿ 14 ಲಕ್ಷ ರೂಪಾಯಿಗೆ ಮಾರಾಟವಾಗಿದೆ.
ಮುಧೋಳ ತಾಲೂಕಿನ ಹಲಕಿ ಗ್ರಾಮದ ಕಾಶಿಲಿಂಗಪ್ಪ-ಯಮನಪ್ಪ ಗಡದಾರ ಸಹೋದರರ ಕುಟುಂಬ ಎರಡೂವರೆ ವರ್ಷದ ಹಿಂದೆ 5 ಲಕ್ಷ ರೂಪಾಯಿಗೆ ಎತ್ತನ್ನು ಖರೀದಿಸಿದ್ದರು. ಇದೀಗ ಮಾರಾಟಗೊಂಡ ಎತ್ತು 50ಕ್ಕೂ ಹೆಚ್ಚು ಕಡೆ ಸ್ಪರ್ಧಿಸಿ ಜಯಿಸಿ ಜಯಗೊಳಿಸಿತ್ತು. ಅಲ್ಲದೆ ಈವರೆಗೆ 6 ಬೈಕ್, 5 ತೊಲೆ ಬಂಗಾರ, 12 ಲಕ್ಷ ರೂ. ಗೆದ್ದು ಕೊಟ್ಟಿದೆ.
ಇದೀಗ ದಾಖಲೆಯ ಸರದಾರ ಎನಿಸಿಕೊಂಡಿರುವ ಎತ್ತನ್ನು ರಬಕವಿ-ಬನಹಟ್ಟಿ ತಾಲೂಕಿನ ನಂದಗಾಂವ ಗ್ರಾಮಸ್ಥ ವಿಠ್ಠಲ ಮ್ಯಾಗಾಡಿ ಬರೋಬ್ಬರಿ 14 ಲಕ್ಷ ರೂಪಾಯಿ ನೀಡಿ ಖರೀದಿಸಿದ್ದಾರೆ. ದಾಖಲೆ ಬೆಲೆಗೆ ಮಾರಾಟವಾದ ಎತ್ತನ್ನು ಹಲಕಿ ಗ್ರಾಮಸ್ಥರು ಹಾಗೂ ಗಡದಾರ ಕುಟುಂಬಸ್ಥರು, ಆರತಿ ಎತ್ತಿ, ಗುಲಾಲ್ ಎರಚಿ ಬೀಳ್ಕೊಟ್ಟಿದ್ದಾರೆ.