ತಿರುವನಂತಪುರಂ: 2018 ಶೀರ್ಷಿಕೆ ಅಡಿಯಲ್ಲಿ 2023ರಲ್ಲಿ ಬಿಡುಗಡೆಯಾದ ಮಲಯಾಳಂ ಸಿನಿಮಾ ಬಾಕ್ಸ್ಆಫೀಸ್ನಲ್ಲಿ ಭಾರಿ ಸದ್ದು ಮಾಡಿತು. ಕೇರಳ ಪ್ರವಾಹ ಆಧರಿಸಿದ ತೆಗೆದ ಸಿನಿಮಾ ಇದು. ನಟ ಟೊವಿನೋ ಥಾಮಸ್, ಕುಂಚಿಕೋ ಬೋಬನ್, ಆಸಿಫ್ ಅಲಿ, ಸುನಿಲ್ ಕುಮಾರ್, ವಿನೀತ್ ಶ್ರೀನಿವಾಸನ್, ಲಾಲ್ ಮುಂತಾದವರು ಈ ಸಿನಿಮಾದಲ್ಲಿ ನಟಿಸಿದರು.
ಇದರಲ್ಲಿ ನಟ ಇಂದ್ರನ್ಸ್ ಪ್ರಮುಖ ಪಾತ್ರವನ್ನು ಮಾಡಿದ್ದಾರೆ. ಸಿನಿಮಾದಲ್ಲಿ ಪ್ರವಾಹದಲ್ಲಿ ಸಿಲುಕಿದ ಕುರುಡನ ಪಾತ್ರದಲ್ಲಿ ಇಂದ್ರನ್ಸ್ ನಟಿಸಿದ್ದು, ಅವರನ್ನು ಕಾಪಾಡಿ ಟೊವಿನೋ ಥಾಮಸ್ ಸಾಯುತ್ತಾರೆ. ಈ ಪಾತ್ರದಿಂದ ಇಂದ್ರನ್ಸ್ ಪ್ಯಾನ್-ಇಂಡಿಯನ್ ಮಟ್ಟದಲ್ಲಿ ಮನ್ನಣೆ ಗಳಿಸಿದರು. ಇದೀಗ ಏಳನೇ ತರಗತಿ ಪರೀಕ್ಷೆ ಬರೆದು ಮತ್ತೊಮ್ಮೆ ಸುದ್ದಿಯಲ್ಲಿದ್ದಾರೆ.
ವಿದ್ಯಾಭ್ಯಾಸಕ್ಕೆ ವಯಸ್ಸು ಅಡ್ಡಿಯಲ್ಲ ಎಂಬುದನ್ನು ಇಂದ್ರನ್ಸ್ ಸಾಬೀತುಪಡಿಸಿದ್ದಾರೆ. ತನ್ನ 68ನೇ ವಯಸ್ಸಿನಲ್ಲಿ 7ನೇ ತರಗತಿ ಪರೀಕ್ಷೆ ಬರೆದಿದ್ದಾರೆ. ಕೇರಳದ ಅಟ್ಟಕುಳಂಗರ ಶಾಲೆಯ ವಿದ್ಯಾರ್ಥಿಗಳೊಂದಿಗೆ ಪರೀಕ್ಷೆ ಬರೆದರು. ಎಲ್ಲ ವಿದ್ಯಾರ್ಥಿಗಳಂತೆ ಇವರಿಗೂ ಪರೀಕ್ಷೆ ಎಂದರೆ ಭಯ. ಆದರೆ, ಆ ಭಯವನ್ನು ಬಿಟ್ಟು ಪರೀಕ್ಷೆ ಎದುರಿಸಿದ್ದಾರೆ. ಅನಿವಾರ್ಯ ಪರಿಸ್ಥಿತಿಗಳಿಂದಾಗಿ ನಾಲ್ಕನೇ ತರಗತಿಯಲ್ಲೇ ಶಾಲೆ ತೊರೆದ ಇಂದ್ರನ್ಸ್ ಜೀವನೋಪಾಯಕ್ಕಾಗಿ ಟೈಲರಿಂಗ್ ಕಲಿತರು.
ಟೈಲರಿಂಗ್ ಬಳಿಕ ಇಂದ್ರನ್ಸ್ ಅವರು ಸಿನಿಮಾ ಇಂಡಸ್ಟ್ರಿಯತ್ತ ಕಾಲಿಟ್ಟರು. ಆದ್ದರಿಂದ ಅವರ ಓದುವ ಕನಸು ಕನಸಾಗಿಯೇ ಉಳಿಯಿತು. ಸಿನಿಮಾ ಕ್ಷೇತ್ರದಲ್ಲೂ ಯಶಸ್ಸು ಪಡೆದಿರುವ ಇಂದ್ರನ್ಸ್ ಅವರಿಗೆ ಇದೀಗ ಓದುವ ಆಲೋಚನೆ ಹುಟ್ಟಿಕೊಂಡಿದೆ. ಹೀಗಾಗಿ ಪುಸ್ತಕಗಳನ್ನು ಖರೀದಿಸಿ ಅಧ್ಯಯನಗಳಲ್ಲಿ ತೊಡಗಿದ್ದಾರೆ. ಆದರೆ, ಕೇರಳದಲ್ಲಿ ನೇರವಾಗಿ ಉನ್ನತ ಶಿಕ್ಷಣ ಪಡೆಯಲು ಸಾಧ್ಯವಿಲ್ಲ. 7 ಮತ್ತು 10ನೇ ತರಗತಿ ಪಾಸಾಗಿರಬೇಕು. ಸದ್ಯ ಇಂದ್ರನ್ಸ್ ಅವರು ಏಳನೇ ತರಗತಿ ಪರೀಕ್ಷೆಗೆ ಹಾಜರಾಗಿದ್ದಾರೆ. ಸದ್ಯ ಮಲಯಾಳಂ, ಇಂಗ್ಲಿಷ್ ಮತ್ತು ಹಿಂದಿ ಪರೀಕ್ಷೆಗಳಿಗೆ ಹಾಜರಾಗಿದ್ದಾರೆ. ಸಮಾಜ ವಿಜ್ಞಾನ, ವಿಜ್ಞಾನ ಮತ್ತು ಗಣಿತ ಪರೀಕ್ಷೆಗಳು ನಡೆಯಲಿದ್ದು, ಈ ಪರೀಕ್ಷೆಗಳ ಫಲಿತಾಂಶವನ್ನು ಇನ್ನೆರಡು ವಾರಗಳಲ್ಲಿ ಪ್ರಕಟಿಸಲಾಗುತ್ತದೆ. ಇದಾದ ಬಳಿಕ 10ನೇ ತರಗತಿ ಪರೀಕ್ಷೆಗೆ ಇಂದ್ರನ್ಸ್ ತಯಾರಿ ನಡೆಸಲಿದ್ದಾರೆ.
ಇಂದ್ರನ್ ಅವರು 10ನೇ ತರಗತಿಯನ್ನು ತಲುಪಿದಾಗ, ಅವರನ್ನು ಕೇರಳ ರಾಜ್ಯ ಸಾಕ್ಷರತಾ ಮಿಷನ್‌ನ ಬ್ರಾಂಡ್ ಅಂಬಾಸಿಡರ್ ಆಗಿ ಆಯ್ಕೆ ಮಾಡಲಾಗುತ್ತದೆ. ಅವರ ಹೆಸರನ್ನು ಸರ್ಕಾರಕ್ಕೆ ಶಿಫಾರಸು ಮಾಡಲು ಸಾಕ್ಷರತಾ ಮಿಷನ್ ಈಗಾಗಲೇ ಸಿದ್ಧತೆ ನಡೆಸಿದೆ. ಈ ಬಗ್ಗೆ ನಿರ್ದೇಶಕಿ ಎ.ಜಿ.ಒಲಿನಾ ಮಾತನಾಡಿ, ಇಂದ್ರನ್ಸ್ ಅವರ ಅಪಾರವಾದ ಶಿಕ್ಷಣದ ಒಲವು ಸಾಮಾನ್ಯ ಜನರನ್ನು ಪ್ರೇರೇಪಿಸುತ್ತದೆ ಎಂದಿದ್ದಾರೆ.
ಇನ್ನು ಇಂದ್ರನ್ಸ್ ಅವರ ವೃತ್ತಿಜೀವನದ ವಿಷಯಕ್ಕೆ ಬಂದರೆ ಅವರ ನಿಜವಾದ ಹೆಸರು ಕೆ. ಸುರೇಂದ್ರನ್. ಕಾಸ್ಟ್ಯೂಮ್ ಡಿಸೈನರ್ ಆಗಿ ಆರಂಭವಾದ ಅವರ ಪಯಣ ಇಂದು ನಟನಾಗಿ ಮುಂದುವರೆದಿದೆ. 1985 ರಿಂದ ಚಲನಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ. ಈಗಾಗಲೇ ಅನೇಕ ಚಲನಚಿತ್ರಗಳನ್ನು ಮಾಡಿದ್ದಾರೆ. 2018ರ ಸಿನಿಮಾದಲ್ಲಿ ಇಂದ್ರನ್ಸ್ ಕುರುಡನ ಪಾತ್ರವನ್ನು ನಿರ್ವಹಿಸಿದರು. ಈ ಚಿತ್ರದಲ್ಲಿನ ಅವರ ಪಾತ್ರಕ್ಕಾಗಿ ಅತ್ಯುತ್ತಮ ನಟನೆಗಾಗಿ ಕೇರಳ ಚಲನಚಿತ್ರ ಪ್ರಶಸ್ತಿಯನ್ನು ಗೆದ್ದರು. ಮಲಯಾಳಂ ಮಾತ್ರವಲ್ಲದೆ ಕೆಲವು ತಮಿಳು ಚಿತ್ರಗಳಲ್ಲೂ ನಟಿಸಿದ್ದಾರೆ. ಕಿರುತೆರೆಯಲ್ಲೂ ಸದ್ದು ಮಾಡಿದ್ದಾರೆ. (ಏಜೆನ್ಸೀಸ್)
ಬೇರೆ ದಾರಿಯೇ ಇಲ್ಲ: ಅವಕಾಶಕ್ಕಾಗಿ ಮಂಚಕ್ಕೆ ಕರೆಯುವವರ ಬಗ್ಗೆ ಮೀರಾ ಜಾಸ್ಮಿನ್ ಕೊಟ್ಟ ಹೇಳಿಕೆ ವೈರಲ್
2 ಲಕ್ಷ ರೂ. ಕೊಡೋದು ಬೇಡ ರಾತ್ರಿ ಮನೆಗೆ ಬಾ! ಮಂಚಕ್ಕೆ ಕರೆದ ನಟನ ಹೆಸರು ಬಹಿರಂಗಪಡಿಸಿದ ನಟಿ