ಸರಣಿ ಗೆಲುವಿನ ತವಕದಲ್ಲಿ ಭಾರತ; ಮಾಡು ಇಲ್ಲವೆ ಮಡಿ ಒತ್ತಡದಲ್ಲಿ ಕಿವೀಸ್​

ಹ್ಯಾಮಿಲ್ಟನ್: ಆರಂಭಿಕ 2 ಪಂದ್ಯಗಳಲ್ಲೂ ಜಯ ದಾಖಲಿಸಿ ಸರಣಿಯಲ್ಲಿ ಬಿಗಿಹಿಡಿತ ಸಾಧಿಸಿರುವ ಪ್ರವಾಸಿ ಭಾರತ ತಂಡ ಬುಧವಾರ ಸೆಡ್ಡನ್ ಪಾರ್ಕ್​ನಲ್ಲಿ 3ನೇ ಟಿ20 ಪಂದ್ಯ ಆಡಲು ಸಜ್ಜಾಗಿದೆ. ಐದು ಪಂದ್ಯಗಳ ಸರಣಿಯಲ್ಲಿ 2-0 ಮುನ್ನಡೆ ಸಾಧಿಸಿರುವ ಭಾರತ ನ್ಯೂಜಿಲೆಂಡ್ ನೆಲದಲ್ಲಿ ಚೊಚ್ಚಲ ಟಿ20 ಸರಣಿ ಗೆಲುವಿನ ಹೊಸ್ತಿಲಲ್ಲಿದೆ. ಇದೇ ವರ್ಷ ಆಸ್ಟ್ರೇಲಿಯಾದಲ್ಲಿ ನಡೆಯಲಿರುವ ಟಿ20 ವಿಶ್ವಕಪ್ ಸಿದ್ಧತೆ ದೃಷ್ಟಿಯಿಂದ ಸರಣಿ ಗೆಲುವು ಭಾರತದ ಪಾಲಿಗೆ ಮಹತ್ವದ್ದಾಗಿದೆ. ಆಕ್ಲೆಂಡ್​ನಲ್ಲಿ ನಡೆದ ಆರಂಭಿಕ ಎರಡು ಪಂದ್ಯಗಳಲ್ಲಿ ಭಾರತ ತಂಡ ಕ್ರಮವಾಗಿ 6 ಹಾಗೂ 7 ವಿಕೆಟ್​ಗಳಿಂದ ಜಯ ದಾಖಲಿಸಿತ್ತು.

2019ರ ಏಕದಿನ ವಿಶ್ವಕಪ್ ಬಳಿಕ ಸತತ 5 ಟಿ20 ಸರಣಿಗಳಲ್ಲಿ ಅಜೇಯವಾಗಿರುವ ಭಾರತ ತಂಡ, ವಿದೇಶಿ ನೆಲದಲ್ಲೂ ನಾಗಾಲೋಟ ಮುಂದುವರಿಸುವ ವಿಶ್ವಾಸದಲ್ಲಿದೆ. ಇದು ಆತಿಥೇಯ ನ್ಯೂಜಿಲೆಂಡ್ ಪಾಲಿಗೆ ಮಾಡು ಇಲ್ಲವೆ ಮಡಿ ಈ ಕದನವಾಗಿದೆ.

ರೋಹಿತ್ ಫಾರ್ಮ್​ ಚಿಂತೆ: ತವರು ನೆಲದಲ್ಲಿ ಅಬ್ಬರಿಸಿದ್ದ ರೋಹಿತ್ ಶರ್ಮ ಕಿವೀಸ್ ನೆಲದಲ್ಲಿ ಎರಡು ಪಂದ್ಯಗಳಲ್ಲೂ ಕನಿಷ್ಠ ಎರಡಂಕಿ ತಲುಪಲು ವಿಫಲರಾಗಿದ್ದಾರೆ. ಕಡೇ 10 ಇನಿಂಗ್ಸ್ ಗಳಲ್ಲಿ ತಲಾ 2 ಶತಕ, ಅರ್ಧಶತಕ ಸಿಡಿಸಿರುವ ರೋಹಿತ್​ರಿಂದ ಕಿವೀಸ್​ನಲ್ಲಿ ಇದುವರೆಗೆ ನಿರೀಕ್ಷಿತ ನಿರ್ವಹಣೆ ಬಂದಿಲ್ಲ. ಉಳಿದಂತೆ ಕನ್ನಡಿಗ ಕೆಎಲ್ ರಾಹುಲ್ ವಿಕೆಟ್ ಕೀಪಿಂಗ್ ಜವಾಬ್ದಾರಿ ಮುಂದುವರಿಸಲಿದ್ದಾರೆ. ರಾಹುಲ್ ವಿಕೆಟ್ ಕೀಪಿಂಗ್ ಜವಾಬ್ದಾರಿಯಿಂದ ಕರ್ನಾಟಕದ ಮತ್ತೋರ್ವ ಬ್ಯಾಟ್ಸ್​ಮನ್ ಮನೀಷ್ ಪಾಂಡೆ ಹೆಚ್ಚುವರಿ ಬ್ಯಾಟ್ಸ್​ಮನ್ ಆಗಿ ಸ್ಥಾನ ಉಳಿಸಿಕೊಳ್ಳಲಿದ್ದಾರೆ. ರೋಹಿತ್ ಶರ್ಮ ವೈಫಲ್ಯ ನಡುವೆಯೂ ಕೆಎಲ್ ರಾಹುಲ್, ಶ್ರೇಯಸ್ ಅಯ್ಯರ್ ನಿರ್ವಹಣೆಯೇ ತಂಡದ ಪ್ಲಸ್ ಪಾಯಿಂಟ್.

ಪುಟಿದೇಳುವ ತವಕದಲ್ಲಿ ಕಿವೀಸ್: ಸತತ ಸೋಲುಗಳಿಂದ ಮಂಕಾಗಿರುವ ಆತಿಥೇಯ ನ್ಯೂಜಿಲೆಂಡ್ ತಂಡ ಸೆಡ್ಡನ್ ಪಾರ್ಕ್​ನಲ್ಲಿ ಸೆಡ್ಡು ಹೊಡೆಯುವ ಗುರಿಯಲ್ಲಿದೆ. ಆಲ್ರೌಂಡರ್​ಗಳೇ ತಂಡಕ್ಕೆ ಕೈಕೊಡುತ್ತಿದ್ದು, ಬೌಲರ್​ಗಳಿಂದಲೂ ಇದುವರೆಗೆ ನಿರೀಕ್ಷಿತ ನಿರ್ವಹಣೆ ಬಂದಿಲ್ಲ. ಇದಕ್ಕೆ ಹಿಂದಿನ ಎರಡು ಪಂದ್ಯಗಳೇ ಸಾಕ್ಷಿ. ತವರು ನೆಲದಲ್ಲೇ ಮುಖಭಂಗ ತಪ್ಪಿಸಿಕೊಳ್ಳಲು ಕಿವೀಸ್ ತಂಡಕ್ಕೆ ಪ್ರತಿಹೋರಾಟ ಅನಿವಾರ್ಯ. -ಪಿಟಿಐ/ಏಜೆನ್ಸೀಸ್

ಭಾರತ ಸರಣಿ ಗೆದ್ದರೂ ರ‍್ಯಾಂಕಿಂಗ್ ಪ್ರಗತಿ ಇಲ್ಲ

ಸತತ ಐದು ಟಿ20 ಸರಣಿಗಳಲ್ಲಿ ಅಜೇಯವಾಗಿರುವ ಭಾರತ, ಕಿವೀಸ್ ತಂಡವನ್ನು ಮಣಿಸಿ ಸರಣಿ ಜಯ ಖಚಿತ ಪಡಿಸಿಕೊಂಡರೂ ಐಸಿಸಿ ಟಿ20 ರ್ಯಾಂಕಿಂಗ್​ನಲ್ಲಿ ಮೇಲೇರಲು ಸಾಧ್ಯವಿಲ್ಲ. ಸದ್ಯ 5ನೇ ಸ್ಥಾನದಲ್ಲಿರುವ ಭಾರತ, ಕಿವೀಸ್ ಎದುರು 5-0ಯಿಂದ ಸರಣಿ ಜಯಿಸಿದರಷ್ಟೇ 1 ಸ್ಥಾನ ಮೇಲೇರಲಿದೆ. ಸದ್ಯ ಕಿವೀಸ್ 6ನೇ ಸ್ಥಾನದಲ್ಲಿದ್ದರೆ, ಪಾಕಿಸ್ತಾನ, ಆಸ್ಟ್ರೇಲಿಯಾ, ಇಂಗ್ಲೆಂಡ್ ಹಾಗೂ ದಕ್ಷಿಣ ಆಫ್ರಿಕಾ ತಂಡಗಳು ಮೊದಲ ನಾಲ್ಕು ಸ್ಥಾನದಲ್ಲಿವೆ.

04: ಹ್ಯಾಮಿಲ್ಟನ್​ನಲ್ಲಿ ಮೈದಾನದಲ್ಲಿ ನಡೆದ ಕಳೆದ 5 ಪಂದ್ಯಗಳಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ತಂಡವೇ ನಾಲ್ಕು ಬಾರಿ ಜಯ ದಾಖಲಿಸಿವೆ.

25: ವಿರಾಟ್ ಕೊಹ್ಲಿ 25 ರನ್ ಗಳಿಸಿದರೆ ಟಿ20 ಕ್ರಿಕೆಟ್​ನಲ್ಲಿ ಗರಿಷ್ಠ ರನ್ ಗಳಿಸಿದ ಭಾರತೀಯ ನಾಯಕ ಎನಿಸಲಿದ್ದಾರೆ. ಸದ್ಯ ಧೋನಿ (1,112) ಮುಂಚೂಣಿಯಲ್ಲಿದ್ದಾರೆ. ಒಟ್ಟಾರೆಯಾಗಿ ಕೇನ್ ವಿಲಿಯಮ್ಸನ್ (1,148) ಮತ್ತು ಫಾಫ್ ಡು ಪ್ಲೆಸಿಸ್ (1,273) ಮೊದಲೆರಡು ಸ್ಥಾನದಲ್ಲಿದ್ದಾರೆ.

03: ಕಿವೀಸ್ ಪ್ರವಾಸದಲ್ಲಿ 3ನೇ ಬಾರಿ ಟಿ20 ಸರಣಿ ಆಡುತ್ತಿರುವ ಭಾರತ, ಈ ಪಂದ್ಯ ಗೆದ್ದರೆ ಮೊದಲ ಬಾರಿಗೆ ಸರಣಿ ಗೆದ್ದಂತಾಗಲಿದೆ. 2008-09ರಲ್ಲಿ 0-2ರಿಂದ ಹಾಗೂ ಕಳೆದ ವರ್ಷ 1-2ರಿಂದ ಸರಣಿ ಸೋತಿತ್ತು.

04: ಕೆಎಲ್ ರಾಹುಲ್ ಈ ಪಂದ್ಯದಲ್ಲೂ ಅರ್ಧಶತಕ ಬಾರಿಸಿದರೆ, ಟಿ20ಯಲ್ಲಿ ಸತತ 4 ಅರ್ಧಶತಕ ಸಿಡಿಸಿದ ಮೊದಲ ಭಾರತೀಯರೆನಿಸಲಿದ್ದಾರೆ.

ಟೀಮ್ ನ್ಯೂಸ್

ಭಾರತ: ಗೆಲುವಿನ ನಾಗಾಲೋಟದಲ್ಲಿರುವ ಭಾರತ ತಂಡದಲ್ಲಿ ಬದಲಾವಣೆ ಕಾಣುವ ಸಾಧ್ಯತೆ ಕಡಿಮೆ. ಬ್ಯಾಟಿಂಗ್​ನಲ್ಲಿ ಸಮರ್ಥ ನಿರ್ವಹಣೆ ಬರುತ್ತಿರುವುದರಿಂದ ಈ ವಿಭಾಗದಲ್ಲಿ ಬದಲಾವಣೆ ನಿರೀಕ್ಷೆ ಇಲ್ಲ. ಬೌಲಿಂಗ್​ನಲ್ಲಿ ಕೊಂಚ ದುಬಾರಿಯಾಗು ತ್ತಿರುವ ಶಾರ್ದೂಲ್ ಠಾಕೂರ್ ಬದಲಿಗೆ ನವದೀಪ್ ಸೈನಿ ಕಣಕ್ಕಿಳಿಯಬಹುದು. ಆರಂಭಿಕ 2 ಪಂದ್ಯಗಳಲ್ಲೂ ಹೊರಗುಳಿದಿದ್ದ ಎಡಗೈ ಬೌಲರ್ ಕುಲದೀಪ್ ಯಾದವ್, ಮತ್ತೋರ್ವ ಸ್ಪಿನ್ನರ್ ಯಜುವೇಂದ್ರ ಚಾಹಲ್ ಬದಲಿಗೆ ತಂಡಕ್ಕೆ ವಾಪಸಾಗಬಹುದು.

ನ್ಯೂಜಿಲೆಂಡ್: ಸರಣಿ ಉಳಿವಿಗೆ ಅಡ್ಡ ಕತ್ತರಿಯಲ್ಲಿ ಸಿಲುಕಿರುವ ನ್ಯೂಜಿಲೆಂಡ್ ತಂಡದಲ್ಲಿ ಕೆಲ ಬದಲಾವಣೆ ಕಾಣುವ ಸಾಧ್ಯತೆಗಳಿವೆ. ಆರಂಭಿಕ 2 ಪಂದ್ಯಗಳಲ್ಲೂ ವಿಫಲರಾಗಿರುವ ಆಲ್ರೌಂಡರ್ ಕಾಲಿನ್ ಡಿಗ್ರಾಂಡ್​ಹೋಮ್ ಬದಲಿಗೆ ಡೆರಿಲ್ ಮಿಚೆಲ್ ಹನ್ನೊಂದರ ಬಳಗದಲ್ಲಿ ಕಾಣಿಸಿದರೂ ಅಚ್ಚರಿ ಇಲ್ಲ. ಇದರಿಂದ ಮಿಚೆಲ್ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿದಂತಾಗುತ್ತದೆ. 2 ಪಂದ್ಯಗಳಿಂದ 1 ವಿಕೆಟ್ ಕಬಳಿಸಿರುವ ಮಧ್ಯಮ ವೇಗಿ ಬ್ಲೈರ್ ಟಿಕ್ನರ್ ಬದಲಿಗೆ ಸ್ಕಾಟ್ ಕಗಿಲಿನ್ ಕಣಕ್ಕಿಳಿಯಬಹುದು.

ಪಿಚ್ ರಿಪೋರ್ಟ್

ಸೆಡ್ಡನ್ ಪಾರ್ಕ್​ನಲ್ಲಿ ರನ್​ಹೊಳೆಯೇ ಹರಿಯುವ ನಿರೀಕ್ಷೆ ಇದೆ. ಇಲ್ಲಿ ನಡೆದಿರುವ ಹಿಂದಿನ 5 ಪಂದ್ಯಗಳೇ ಇದಕ್ಕೆ ಪುಷ್ಠಿ. ಮೊದಲು ಬ್ಯಾಟಿಂಗ್ ಮಾಡಿದ ತಂಡಗಳು 3 ಬಾರಿ 190ಕ್ಕೂ ಹೆಚ್ಚು ರನ್ ಪೇರಿಸಿವೆ. ಈ ನೆಲದಲ್ಲಿ ಭಾರತ-ಕಿವೀಸ್ ಕಡೆಯ ಬಾರಿಗೆ ಎದುರಾಗಿದ್ದು, ಕಳೆದ ಫೆಬ್ರವರಿ 10 ರಂದು ನಡೆದ ಪಂದ್ಯದಲ್ಲಿ. ಆಗ ಕಿವೀಸ್ ನೀಡಿದ್ದ 213 ರನ್ ಬೆನ್ನಟ್ಟಿದ ಭಾರತ ಕೇವಲ 4 ರನ್​ಗಳಿಂದ ಸೋಲು ಕಂಡಿತ್ತು.

ಪಂದ್ಯ ಆರಂಭ: ಮಧ್ಯಾಹ್ನ 12.30 ನೇರಪ್ರಸಾರ: ಸ್ಟಾರ್​ಸ್ಪೋರ್ಟ್ಸ್