ಲಂಕಾದಲ್ಲೇ ರಝೀನಾ ಅಂತ್ಯ ಸಂಸ್ಕಾರ

 >

– ವಿಜಯವಾಣಿ ಸುದ್ದಿಜಾಲ ಸುರತ್ಕಲ್
ಶ್ರೀಲಂಕಾದ ಕೊಲೊಂಬೋದಲ್ಲಿ ಭಾನುವಾರ ಸರಣಿ ಬಾಂಬ್ ಸ್ಫೋಟಕ್ಕೆ ಬಲಿಯಾದ ಮಂಗಳೂರಿನ ಬೈಕಂಪಾಡಿ ಮೂಲದ ಸುರತ್ಕಲ್ ನಿವಾಸಿ ರಝೀನಾ ಖಾದರ್ ಕುಕ್ಕಾಡಿ(58) ಅವರ ಅಂತಿಮ ಸಂಸ್ಕಾರ ಹುಟ್ಟೂರು ಲಂಕಾದಲ್ಲೇ ವಿಧಿವಿಧಾನ ಪ್ರಕಾರ ಸೋಮವಾರ ನೆರವೇರಿಸಲಾಯಿತು.
ಭಾನುವಾರ ರಾತ್ರಿ ವಿಮಾನ ಮೂಲಕ ಲಂಕಾ ತಲುಪಿದ ಸೇರಿದ್ದ ಅವರ ಸಹೋದರಿ, ನಿಕಟ ಸಂಬಂಧಿಕರು, ಪತಿ ಅಬ್ದುಲ್ ಖಾದರ್ ಕುಕ್ಕಾಡಿ, ಅಮೆರಿಕದಲ್ಲಿ ನೆಲೆಸಿದ್ದ ಪುತ್ರ, ಪುತ್ರಿ ಮೊದಲಾದವರು ಅಂತಿಮ ಸಂಸ್ಕಾರದಲ್ಲಿ ಭಾಗವಹಿಸಿದರು. ಸೋಮವಾರ ಬೆಳಗ್ಗೆ 11ರ ಸುಮಾರಿಗೆ ವಿಧಿಗಳು ಪೂರ್ಣಗೊಂಡವು ಎಂದು ಕುಟುಂಬ ಮೂಲಗಳು ತಿಳಿಸಿವೆ.

ರಾಯಭಾರ ಕಚೇರಿ ಸಹಕಾರ: ಬೆಂಗಳೂರು ಮೂಲಕ ಶ್ರೀಲಂಕಾಕ್ಕೆ ಸಂಬಂಧಿಕರು ತಲುಪಿದಾಗ ಅಲ್ಲಿ ಕರ್ಫ್ಯೂ ಜಾರಿಯಲ್ಲಿತ್ತು. ವಿಮಾನ ನಿಲ್ದಾಣದಿಂದ ತೆರಳಲು ಲಂಕಾದಲ್ಲಿರುವ ಭಾರತೀಯ ರಾಯಭಾರ ಕಚೇರಿ ಎಲ್ಲ ರೀತಿಯಲ್ಲಿ ಸಹಕಾರ ನೀಡಿತ್ತು. ಈ ಬಗ್ಗೆ ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್ ಕಚೇರಿಗೆ ಸೂಚನೆ ನೀಡಿದ್ದರು. ಕರ್ಫ್ಯೂ ಇದ್ದ ಕಾರಣ ವಿಮಾನ ನಿಲ್ದಾಣದಿಂದ ಸಂಬಂಧಿಕರ ಸಂಚಾರಕ್ಕೆ ಅಲ್ಲಿನ ಸಚಿವರ ಸರ್ಕಾರಿ ಕಾರನ್ನೇ ಒದಗಿಸಲಾಗಿತ್ತು. ಸ್ಥಳೀಯ ಜನಪ್ರತಿನಿಧಿಗಳು ಕೂಡ ಸಹಕಾರ ನೀಡಿದ್ದರು ಎಂದು ಅವರ ಕುಟುಂಬದ ಮೂಲಗಳು ತಿಳಿಸಿವೆ. ರಝೀನಾ ಅವರ ಅಣ್ಣ ಶ್ರೀಲಂಕಾದಲ್ಲಿ ಹೆಸರಾಂತ ಉದ್ಯಮಿ.
ರಝೀನಾ ಶ್ರೀಲಂಕಾ ಪೌರತ್ವ ಹೊಂದಿದ್ದು, ಪ್ರಾರಂಭಿಕ ಶಿಕ್ಷಣವನ್ನು ಅಲ್ಲಿಯೇ ಪಡೆದಿದ್ದರು. ಬಳಿಕ ಮಂಗಳೂರಿನಲ್ಲಿ ಬಿಎಎಸ್ಸಿ ಓದಿದ್ದರು. ಕಾಸರಗೋಡು ಬಳಿಯ ಮೊಗ್ರಾಲ್ ಪುತ್ತೂರಿನಲ್ಲಿಯೂ ಅವರ ನಿಕಟ ಸಂಬಂಧಿಕರು ನೆಲೆಸಿದ್ದಾರೆ.

ರಝೀನಾ ನೆನಪು ಚಿರಸ್ಥಾಯಿ:  ರಝೀನಾ ಪತಿ ಅಬ್ದುಲ್ ಖಾದರ್ ಕುಕ್ಕಾಡಿ ದುಬೈಯಲ್ಲಿ ಕೆಮಿಕಲ್ ಇಂಜಿನಿಯರ್. ಅವರು ಕುಕ್ಕಾಡಿ ಕುಟುಂಬದ ಏಳು ಸಹೋದರದಲ್ಲಿ ಹಿರಿಯ ಪುತ್ರ. ರಝೀನಾ ನೆನಪು ಚಿರಸ್ಥಾಯಿ ಎಂದು ಕುಟುಂಬದ ಸದಸ್ಯರು ಶೋಕ ವ್ಯಕ್ತಪಡಿಸಿದ್ದಾರೆ. ಅವರ ಆತ್ಮಕ್ಕೆ ಸದ್ಗತಿ ಕೋರಿ ಕುಟುಂಬಸ್ಥರು, ಬಂಧುಗಳು ಪ್ರಾರ್ಥನೆ ಸಲ್ಲಿಸಿದ್ದಾರೆ.

ಮಂಗಳೂರು ದಂಪತಿ ಲಂಕಾದಲ್ಲಿ ಸೇಫ್

>
ವಿಜಯವಾಣಿ ಸುದ್ದಿಜಾಲ ಮಂಗಳೂರು
ಶ್ರೀಲಂಕಾಕ್ಕೆ ಪತ್ನಿಯೊಂದಿಗೆ ಪ್ರವಾಸ ಹೋಗಿರುವ ಮಂಗಳೂರಿನ ವೈದ್ಯರೊಬ್ಬರು ಕೊನೇ ಕ್ಷಣದಲ್ಲಿ ವಾಸ್ತವ್ಯದ ಹೋಟೆಲ್ ಬದಲಾವಣೆ ಮಾಡುವ ತಮ್ಮ ನಿರ್ಧಾರದಿಂದ ಸುರಕ್ಷಿತವಾಗಿದ್ದಾರೆ.
ನಗರದ ಶ್ರೀ ವೇದಂಆಯು ಆಯುರ್ವೇದ ಆಸ್ಪತ್ರೆಯ ಡಾ.ಕೇಶವರಾಜ್ ಹಾಗೂ ಅವರ ಪತ್ನಿ ಶ್ರೀದೇವಿ ತಮ್ಮ ನಾಲ್ಕನೇ ವಿವಾಹ ವಾರ್ಷಿಕೋತ್ಸವ ಹಿನ್ನೆಲೆಯಲ್ಲಿ ಏ.20ರಂದು ಮಧ್ಯಾಹ್ನ ಕೊಲೊಂಬೊ ತೆರಳಿದ್ದರು. ಸ್ಫೋಟ ನಡೆದ ಹೋಟೆಲ್ ಸಿನ್ನಾಮೊನ್ ಗ್ಯ್ರಾಂಡ್‌ನಲ್ಲಿ ಉಳಿದುಕೊಳ್ಳಬೇಕಾಗಿತ್ತಾದರೂ, ಅಂತಿಮ ಹಂತದಲ್ಲಿ ಅದನ್ನು ರದ್ದು ಮಾಡಿ ನೆಗೊಂಬೋ ರಸ್ತೆಯ ಹೋಟೆಲ್ ಕ್ಲಾರಿಯನ್ ಹಬ್‌ನಲ್ಲಿ ತಂಗಿದ್ದರು.
ಶನಿವಾರ ಅವರು ವಿಶ್ರಾಂತಿ ಪಡೆದಿದ್ದು, ಮರುದಿನ ಸ್ಫೋಟದ ಸದ್ದು ಕೇಳಿದೆ. ತಮ್ಮ ಟೂರ್ ಏಜೆಂಟರಲ್ಲಿ ವಿಚಾರಿಸುವಾಗ ಇದು ಬಾಂಬ್ ಸ್ಫೋಟ ಎನ್ನುವುದು ಗೊತ್ತಾಯಿತು. ತಾವು ಉಳಿದುಕೊಳ್ಳಬೇಕಿದ್ದ ಹೊಟೇಲ್‌ನಲ್ಲೇ ಸ್ಫೋಟ ಸಂಭವಿಸಿ ಅಪಾರ ಜೀವಹಾನಿಯಾಗಿದ್ದು ಕೇಳಿ ಬೆಚ್ಚಿಬಿದ್ದರು. ಸರಣಿ ಸ್ಫೋಟದಿಂದಾಗಿ ಯೋಜಿಸಿದಂತೆ ಪ್ರವಾಸದ ಖುಷಿ ಅನುಭವಿಸಲಾಗದೆ ಕೇಶವರಾಜ್ ಹಿಂದಿರುಗಲಿದ್ದಾರೆ.
ಅವರ ಸಹೋದರ ಕಾರ್ತಿಕ್ ರಾಜ್ ‘ವಿಜಯವಾಣಿ’ಯೊಂದಿಗೆ ಮಾತನಾಡಿ, ‘ಸದ್ಯ ಕೊಲೊಂಬೋ ಸುತ್ತಮುತ್ತ ಮೊಬೈಲ್ ನೆಟ್‌ವರ್ಕ್ ಜಾಂ ಆಗಿದ್ದು, ಅಲ್ಲಿಗೆ ಸಂಪರ್ಕ ಮಾಡಲಾಗುತ್ತಿಲ್ಲ. ನಾನು ಮಧ್ಯಾಹ್ನ ಅಣ್ಣನೊಂದಿಗೆ ಮಾತನಾಡಿದ್ದೇನೆ, ಅವರು ಸುರಕ್ಷಿತವಾಗಿ ಹೊಟೇಲ್‌ನಲ್ಲೇ ಇದ್ದಾರೆ. ಏ.24ರಂದು ಮಂಗಳೂರಿಗೆ ತಲುಪುವ ನಿರೀಕ್ಷೆ ಇದೆ. ಸದ್ಯ ಕರ್ಫ್ಯೂ ಇರುವುದರಿಂದ ಎಲ್ಲಿಗೂ ಹೋಗಲಾಗುತ್ತಿಲ್ಲ ಎಂದು ತಿಳಿಸಿದ್ದಾರೆ’ ಎಂದು ಮಾಹಿತಿ ನೀಡಿದ್ದಾರೆ.

ಕರ್ನಾಟಕ ಕರಾವಳಿ ಪಹರೆ ಬಿಗು
ಶ್ರೀಲಂಕಾ ಸರಣಿ ಬಾಂಬ್ ಸ್ಫೋಟ ಹಿನ್ನೆಲೆಯಲ್ಲಿ ಕರಾವಳಿಯಲ್ಲೂ ಭದ್ರತಾ ವ್ಯವಸ್ಥೆ, ಅದರಲ್ಲೂ ಕರಾವಳಿ ಕಾವಲು ಪಡೆಯ ಪಹರೆಯನ್ನು ಬಿಗುಗೊಳಿಸಲಾಗಿದೆ.
ದೆಹಲಿಯಿಂದಲೇ ಬಂದಿರುವ ಸೂಚನೆಯನ್ವಯ ಪಶ್ಚಿಮ ಮತ್ತು ಪೂರ್ವ ಕರಾವಳಿಯುದ್ದಕ್ಕೂ ಕೋಸ್ಟ್‌ಗಾರ್ಡ್ ಕಾವಲು ನೌಕೆಗಳು ಭಾರತೀಯ ಜಲಗಡಿಯ ಮೇಲೆ ನಿಗಾ ಇರಿಸಿಕೊಂಡಿವೆ.
ಕೋಸ್ಟ್‌ಗಾರ್ಡ್ ಭದ್ರತೆಯ ಮೇಲೆ ಸದಾ ನಿಗಾ ಇರಿಸಿರುತ್ತದೆ, ಸದ್ಯ ಭಾರತದ ನೆರೆ ದೇಶದ ಮೇಲೆ ನಡೆದ ದಾಳಿಯ ಹಿನ್ನೆಲೆಯಲ್ಲಿ ಹೆಡ್‌ಕ್ವಾರ್ಟರ್ಸ್ ಮಟ್ಟದಲ್ಲೇ ಸಂವಹನ ನಡೆದಿರುತ್ತದೆ, ಸಾರ್ವಜನಿಕ ಹಿತಾಸಕ್ತಿಯಿಂದ ಭದ್ರತಾ ವಿಚಾರಗಳನ್ನು ಹಂಚಿಕೊಳ್ಳುವಂತಿಲ್ಲ ಎಂದು ಕೋಸ್ಟ್‌ಗಾರ್ಡ್ ಹಿರಿಯ ಅಧಿಕಾರಿ ‘ವಿಜಯವಾಣಿ’ಗೆ ತಿಳಿಸಿದರು.
ಪಶ್ಚಿಮ ಕರಾವಳಿಯಲ್ಲಿ 320 ಕಿ.ಮೀ ಸಮುದ್ರ ತೀರವನ್ನು ಹೊಂದಿರುವ ಕರ್ನಾಟಕದ ರಕ್ಷಣೆಯ ಹೊಣೆ ಹೊತ್ತಿರುವ ಕರಾವಳಿ ಕಾವಲು ಪಡೆ ಅತ್ಯಾಧುನಿಕ ರಾಡಾರ್‌ಗಳು, ಕಾವಲು ನೌಕೆಗಳು, ಹೋವರ್‌ಕ್ರಾಫ್ಟ್, ಡೋರ್ನಿಯರ್ ವಿಮಾನಗಳ ಮೂಲಕ ಭದ್ರತೆಯನ್ನು ನೋಡಿಕೊಳ್ಳುತ್ತಿದೆ.

Leave a Reply

Your email address will not be published. Required fields are marked *