ಕಾವೇರಿಯಲ್ಲಿ ಕೊಚ್ಚಿ ಹೋಗುತ್ತಿದ್ದವನನ್ನು ರಕ್ಷಿಸಿದ್ದು ಪೇದೆಯ ಸಮಯಪ್ರಜ್ಞೆ!

ಚಾಮರಾಜನಗರ: ಕೊಳ್ಳೇಗಾಲ ತಾಲೂಕಿನ ಶಿವನಸಮುದ್ರದ ಬಳಿಯ ಕಾವೇರಿ ನದಿಯಲ್ಲಿ ಕೊಚ್ಚಿ ಹೋಗುತ್ತಿದ್ದ ವ್ಯಕ್ತಿಯನ್ನು ಪೊಲೀಸರು ರಕ್ಷಿಸಿದ್ದಾರೆ.

ಹೌದು, ಶಿವನಸಮುದ್ರದ ರಂಗನಾಥಸ್ವಾಮಿ ದೇವಾಲಯದಲ್ಲಿ ವಾಸವಿದ್ದ ಬುದ್ಧಿಮಾಂದ್ಯ ವ್ಯಕ್ತಿ ಜಡೇಯ ಎಂಬಾತ ಮರುಜೀವ ಪಡೆದಿದ್ದಾನೆ.

ನಿನ್ನೆ ಸಂಜೆ ದೇವಸ್ಥಾನದ ಹಿಂದಿರುವ ಕಾವೇರಿ ನದಿ ನಡುವಿನ ಗುಡ್ಡದಲ್ಲಿ ಕುಳಿತು ಅರ್ಚಕರ ಜಾನುವಾರುಗಳನ್ನು ಮೇಯಿಸುತ್ತಿದ್ದ. ಈ ವೇಳೆ ನೀರಿನ ಪ್ರಮಾಣ ಹೆಚ್ಚಾಗಿ ಹೆದರಿದ ವ್ಯಕ್ತಿ ರಾತ್ರಿಯಿಡೀ ಅಲ್ಲಿಯೇ ತಂಗಿದ್ದ.

ಜಾನುವಾರುಗಳು ಸಂಜೆ ಮನೆ ಸೇರಿದರೂ ಜಡೇಯ ಬಾರದಿದ್ದಾಗ ಎಲ್ಲೋ ಹೋಗಿರಬಹುದು ಎಂದು ಅರ್ಚಕರು ಸುಮ್ಮನಾಗಿದ್ದರು. ಆದರೆ, ಬೆಳಗ್ಗೆ ದೇವಾಲಯ ಹಿಂಭಾಗದ ನದಿಯ ನಡುವಿನ ಗುಡ್ಡದಲ್ಲಿಯೇ ಈತ ಇರುವುದು ಗಮನಕ್ಕೆ ಬಂದಿದೆ. ನಂತರ ಪೊಲೀಸರಿಗೆ ವಿಷಯ ತಿಳಿಸಿದರು.

ನಂತರ ಅರ್ಚಕರು, ಪೊಲೀಸರು ನದಿಯ ದಂಡೆಗೆ ತೆರಳಿ ಆತನನ್ನು ಬರುವಂತೆ ಕರೆದಿದ್ದಾರೆ. ಅಲ್ಲಿಂದ ಇಳಿದು ಬರುವಾಗ ಜಡೇಯ ಕಾಲು ಜಾರಿ ಬಿದ್ದಿದ್ದಾನೆ. ನೀರಿನಲ್ಲಿ ಕೊಚ್ಚಿ ಹೋಗುತ್ತಿದ್ದ ಜಡೇಯನನ್ನು ನೋಡಿದ ಪೇದೆ ನಂಜುಂಡ ತಕ್ಷಣ ನೀರಿಗೆ ಧುಮುಕಿ ಹಗ್ಗ ಎಸೆದು ಕೊಚ್ಚಿ ಹೋಗುತ್ತಿದ್ದ ಜಡೇಯನನ್ನು ರಕ್ಷಿಸಿದ್ದಾರೆ.

ರಾತ್ರಿಯಿಡೀ ನೀರಿನ ನಡುವೆ ಕುಳಿತು ಚಳಿಯಲ್ಲಿ ಬಳಲಿದ್ದ ಈತನನ್ನು ಸದ್ಯ ಸತ್ತೇಗಾಲದ ಸರ್ಕಾರಿ ಆಸ್ಪತ್ರೆಗೆ ಕರೆದೊಯ್ದು ಚಿಕಿತ್ಸೆ ಕೊಡಿಸಲಾಗಿದೆ.

Leave a Reply

Your email address will not be published. Required fields are marked *