ಹಿಂದುಳಿದವರ ಕಲ್ಯಾಣವೇ ಕಾಂಗ್ರೆಸ್ ಗುರಿ

ಶಿಗ್ಗಾಂವಿ: ಹಿಂದುಳಿದ ವರ್ಗದ ನೇತಾರ ದಿ. ದೇವರಾಜ ಅರಸ್ ಅವರ ಕೊಡುಗೆಗಳು ಸಾಕಾರಗೊಂಡಿವೆ ಎಂಬುದಕ್ಕೆ ಕಾಂಗ್ರೆಸ್​ನ ಪಂಚ ಗ್ಯಾರಂಟಿ ಯೋಜನೆಗಳೇ ಸಾಕ್ಷಿ. ಪಕ್ಷದ ಗೆಲುವಿಗೆ ಇವುಗಳು ಕಾರಣವಾಗಲಿವೆ ಎಂದು ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಸಚಿವ ಮಧು ಬಂಗಾರಪ್ಪ ಹೇಳಿದರು. ಶಿಗ್ಗಾಂವಿ ವಿಧಾನಸಭಾ ಕ್ಷೇತ್ರದ ಉಪಚುನಾವಣೆ ಅಂಗವಾಗಿ ಹುಲಗೂರ ಗ್ರಾಮದಲ್ಲಿ ಶನಿವಾರ ಏರ್ಪಡಿಸಿದ್ದ ಪಕ್ಷದ ಅಭ್ಯರ್ಥಿ ಯಾಸೀರ್​ಖಾನ್ ಪಠಾಣ್ ಪರ ಮತಯಾಚಿಸಿ ಅವರು ಮಾತನಾಡಿದರು. ಊಳುವವನೇ ಭೂ ಒಡೆಯ ಎಂದು ಅನೇಕರಿಗೆ ಭೂಮಿ ಭಾಗ್ಯ ಕಲ್ಪಿಸಿದ ಡಿ. ದೇವರಾಜ ಅರಸ್ ಅವರು, ಆಶ್ರಯ, ಆರಾಧನಾ ಸಹಿತ ಇನ್ನಿತರ ಯೋಜನೆಗಳ ಮೂಲಕ ಜನಮಾನಸದಲ್ಲಿ ಉಳಿದಿರುವ ದಿ. ಎಸ್. ಬಂಗಾರಪ್ಪ ಹಾಗೂ ಹಾಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಪಂಚ ಗ್ಯಾರಂಟಿಗಳ ಮೂಲಕ ಶೋಷಿತರ, ಬಡವರ, ಮಹಿಳಾ ಪರ ಅನೇಕ ದಿಟ್ಟ ಕಾರ್ಯಕ್ರಮಗಳನ್ನು ಜಾರಿಗೆ ತಂದು ನಿಜವಾದ ಪ್ರಜಾಪ್ರಭುತ್ವ ಸ್ಥಾಪಿಸಿ ಜನರ ಕನಸು ನನಸು ಮಾಡಿದ್ದಾರೆ ಎಂದರು. ಮಾಜಿ ಶಾಸಕ ಮಲ್ಲಿಕಾರ್ಜುನ ಅಕ್ಕಿ ಮಾತನಾಡಿ, ಕ್ಷೇತ್ರ ಪುನರ್ವಿಂಗಡಣೆ ಮುನ್ನ ಶಿಗ್ಗಾಂವಿ ತಾಲೂಕಿನ 22 ಗ್ರಾಮಗಳು ಕುಂದಗೋಳ ಕ್ಷೇತ್ರಕ್ಕೊಳಪಟ್ಟಿದ್ದವು. ಆಗ ಕಾಂಗ್ರೆಸ್ ಪಕ್ಷವನ್ನು ಇಲ್ಲಿಯ ಮತದಾರ ಬೆಂಬಲಿಸಿದ್ದಾರೆ. ಈ ಬಾರಿಯೂ ಪಕ್ಷದ ಅಭ್ಯರ್ಥಿಯೇ ಅತ್ಯಧಿಕ ಮತಗಳಿಂದ ಗೆಲ್ಲಲಿದ್ದಾರೆಂಬ ವಿಶ್ವಾಸ ವ್ಯಕ್ತಪಡಿಸಿದರು. ಜಿಪಂ ಮಾಜಿ ಅಧ್ಯಕ್ಷೆ ಪ್ರೇಮಾ ಪಾಟೀಲ, ಮುಖಂಡ ಎನ್.ವಿ. ಪಾಟೀಲ, ಹುಲಗೂರ ಗ್ರಾಮ ಪಂಚಾಯಿತಿ ಅಧ್ಯಕ್ಷ ಜಾವೇದ್ ಅಹ್ಮದ್ ಸವಣೂರ, ಇತರರು ಇದ್ದರು.