ಬೆಂಗಳೂರು: ಭಾರತ-ಪಾಕ್ ಉದ್ವಿಗ್ನತೆ ಇನ್ನೊಂದು ವಾರದಲ್ಲೂ ತಣ್ಣಗಾಗದೆ ಐಪಿಎಲ್ ಮತ್ತೆ ಮುಂದೂಡಿಕೆಯಾದರೆ ಸೆಪ್ಟೆಂಬರ್ನಲ್ಲಿ ನಿಗದಿಯಾಗಿರುವ ಏಷ್ಯಾಕಪ್ ಸಮಯದಲ್ಲಿ ಮರುನಿಗದಿಪಡಿಸುವ ಅವಕಾಶ ಬಿಸಿಸಿಐ ಮುಂದಿದೆ. ಹಾಲಿ ಸನ್ನಿವೇಶದಲ್ಲಿ ಭಾರತ-ಪಾಕ್ ಒಳಗೊಂಡ ಏಷ್ಯಾಕಪ್ ಟೂರ್ನಿ ನಡೆಯುವ ಸಾಧ್ಯತೆ ಇಲ್ಲ. ಹೀಗಾಗಿ ಅದೇ ಸಮಯದಲ್ಲಿ ಐಪಿಎಲ್ ಮರುನಿಗದಿಪಡಿಸುವುದು ಅತ್ಯುತ್ತಮ ಆಯ್ಕೆ ಎನಿಸಿದೆ.
ಐಪಿಎಲ್ನ ಉಳಿದ ಪಂದ್ಯಗಳ ಆಯೋಜನೆಗೆ 10ರಿಂದ 12 ದಿನ ಸಾಕಾಗುತ್ತದೆ. ಏಷ್ಯಾಕಪ್ ಟೂರ್ನಿ ಆಯೋಜನೆಗೆ ಸೆಪ್ಟೆಂಬರ್ನಲ್ಲಿ 19 ದಿನಗಳ ಕಾಲಾವಕಾಶ ನೀಡಲಾಗಿದೆ. ಹೀಗಾಗಿ ಭಾರತ ತಂಡ ಜೂನ್-ಜುಲೈ ತಿಂಗಳ ಇಂಗ್ಲೆಂಡ್ ಪ್ರವಾಸವನ್ನು ಪೂರ್ಣಗೊಳಿಸಿದ ಬಳಿಕ ಐಪಿಎಲ್ ಮರುನಿಗದಿಗೆ ಅವಕಾಶವಿದೆ. ಆದರೆ ವಿದೇಶಿ ಆಟಗಾರರ ಲಭ್ಯತೆಯೊಂದೇ ಪ್ರಮುಖ ಸವಾಲು ಆಗಿರಲಿದೆ. ಆಗಸ್ಟ್ನಲ್ಲಿ ನಿಗದಿಯಾಗಿರುವ ಭಾರತ ತಂಡದ ಬಾಂಗ್ಲಾದೇಶ ಪ್ರವಾಸವೂ ನಡೆಯುವುದು ಅನುಮಾನವೆನಿಸಿದೆ. ಆದರೆ ಆಗಸ್ಟ್ 5ರಿಂದ 31ರವರೆಗೆ ಇಂಗ್ಲೆಂಡ್ನ “ದಿ ಹಂಡ್ರೆಡ್’ ಟೂರ್ನಿ ನಿಗದಿಯಾಗಿದ್ದು, ಐಪಿಎಲ್ನಲ್ಲಿ ಆಡುವ ಹೆಚ್ಚಿನ ವಿದೇಶಿ ಆಟಗಾರರು ಅದರಲ್ಲಿ ಆಡುವುದರಿಂದ ಆಗಸ್ಟ್ನಲ್ಲಿ ಐಪಿಎಲ್ ಮರುನಿಗದಿ ಕಷ್ಟವೆನಿಸಿದೆ. ಇದಲ್ಲದೆ ಆಗಸ್ಟ್ನಲ್ಲಿ ದ. ಆಫ್ರಿಕಾ-ಆಸ್ಟ್ರೆಲಿಯಾ ನಡುವೆ ವೈಟ್ಬಾಲ್ ಸರಣಿಯೂ ನಿಗದಿಯಾಗಿದೆ.
ಸೆಪ್ಟೆಂಬರ್ 2ರಿಂದ 14ರವರೆಗೆ ಇಂಗ್ಲೆಂಡ್-ದ. ಆಫ್ರಿಕಾ ಸರಣಿ ನಿಗದಿಯಾಗಿದ್ದರೂ, ಇವೆರಡು ರಾಷ್ಟ್ರಗಳ ಮಂಡಳಿ ಜತೆ ಬಿಸಿಸಿಐ ಉತ್ತಮ ಸಂಬಂಧ ಹೊಂದಿರುವುದರಿಂದ ಮತ್ತು ಇವೆರಡು ದೇಶಗಳ ಲೀಗ್ಗಳಲ್ಲಿ ಐಪಿಎಲ್ ಫ್ರಾಂಚೈಸಿಗಳ ಹೂಡಿಕೆ ಇರುವುದರಿಂದ, ಈ ದೇಶಗಳ ಆಟಗಾರರು ಐಪಿಎಲ್ಗೆ ಲಭ್ಯರಾಗುವುದನ್ನು ನಿರೀಕ್ಷಿಸಬಹುದು. ಕೆರಿಬಿಯನ್ ಪ್ರೀಮಿಯರ್ ಲೀಗ್ ಕೂಡ ಸೆಪ್ಟೆಂಬರ್ನಲ್ಲಿ ನಡೆಯಲಿದ್ದರೂ, ವೆಸ್ಟ್ ಇಂಡೀಸ್ನ ಆಯ್ದ ಕೆಲ ಆಟಗಾರರು ಐಪಿಎಲ್ಗೆ ಲಭ್ಯರಾಗುವುದು ಕಷ್ಟವಾಗದು.