‘ಯಾವುದೇ ತಪ್ಪು ಮಾಡಿಲ್ಲ, ಇದರಿಂದಾದರೂ ನನಗೆ ಬಾಕಿ ದುಡ್ಡು ಬಂದರೆ ಸಾಕು’: ಕಿಚ್ಚ ಸುದೀಪ

ಬೆಂಗಳೂರು: ನಾನು ಯಾವುದೇ ತಪ್ಪು ಮಾಡಿಲ್ಲ. ಹಾಗಾಗಿ ಯಾವುದೇ ಭಯ ಇಲ್ಲ. ಐಟಿ ದಾಳಿಯಿಂದ ನನಗೆ ಬಾಕಿ ಇರುವ ಹಣ ಬಂದರೆ ಸಾಕು ಎಂದು ಸ್ಯಾಂಡಲ್​ವುಡ್​ ನಟ ಕಿಚ್ಚ ಸುದೀಪ್​ ಆದಾಯ ತೆರಿಗೆ ಅಧಿಕಾರಿಗಳ ದಾಳಿ ಬಗ್ಗೆ ಪ್ರತಿಕ್ರಿಯಸಿದ್ದಾರೆ.

ಐಟಿ ದಾಳಿ ವಿಷಯ ತಿಳಿಯುತ್ತಿದ್ದಂತೆ ಮೈಸೂರಿನಲ್ಲಿ ಚಿತ್ರೀಕರಣದಲ್ಲಿ ತೊಡಗಿದ್ದ ಸುದೀಪ್​ ಗುರುವಾರ ಮಧ್ಯಾಹ್ನ ಜೆ.ಪಿ.ನಗರ ನಿವಾಸಕ್ಕೆ ಬಂದಿದ್ದಾರೆ. ಈ ವೇಳೆ ಸುದ್ದಿಗಾರರೊಂದಿಗೆ ಮಾತನಾಡಿ, “ಆದಾಯ ತೆರಿಗೆ ಅಧಿಕಾರಿಗಳಿಗೆ ಎಲ್ಲ ರೀತಿಯ ಸಹಕಾರ ನೀಡುತ್ತೇನೆ. ನನ್ನ ತಾಯಿ ಒಬ್ಬರೇ ಇದ್ದರು. ಹಾಗಾಗಿ ಮೈಸೂರಿನಿಂದ ಇಲ್ಲಿಗೆ ಬರಬೇಕಾಯಿತು” ಎಂದು ತಿಳಿಸಿದರು.

ಬಿಗ್​ ಬಜೆಟ್​ ಚಿತ್ರಗಳಾದ ವಿಲನ್​, ಕೆ.ಜಿ.ಎಫ್​ ಮತ್ತು ನಟ ಸಾರ್ವಭೌಮಕ್ಕೆ ಸಂಬಂಧಿಸಿದವರ ಮನೆಗಳ ಮೇಲೆ ಐಟಿ ದಾಳಿಯಾಗಿದೆ. ದಾಳಿಯಲ್ಲಿ ಯಾವುದೇ ವೈಯಕ್ತಿಕ ಮತ್ತು ರಾಜಕೀಯ ಉದ್ದೇಶ ಇಲ್ಲ ಎಂದರು.

ಕಾಂಪೌಂಡ್​ ಹಾರಿ ಬಂದಿಲ್ಲ
“ಯಾವುದೋ ಸುದ್ದಿ ವಾಹಿನಿ ಐಟಿ ಅಧಿಕಾರಿಗಳು ನಮ್ಮ ಮನೆಗೆ ಕಾಂಪೌಂಡ್​ ಹಾರಿ ದಾಳಿ ನಡೆಸಿದರು ಎಂದು ಬಿತ್ತರಿಸುತ್ತಿತ್ತು. ಆದರೆ ಅಧಿಕಾರಿಗಳು ಯಾವ ಕಾಂಪೌಂಡ್​ ಹಾರಿಯೂ ಮನೆಗೆ ಬಂದಿಲ್ಲ. ಮುಖ್ಯ ಗೇಟ್​ ಮೂಲಕವೇ ಬಂದಿದ್ದಾರೆ” ಎಂದರು.

ಗುರುವಾರ ಬೆಳಗ್ಗೆ ಏಳು ಗಂಟೆ ಸುಮಾರಿಗೆ ಐಟಿ ಅಧಿಕಾರಿಗಳು ಜೆ.ಪಿ.ನಗರದಲ್ಲಿರುವ ಸುದೀಪ್​ ನಿವಾಸದ ಮೇಲೆ ದಾಳಿ ನಡೆಸಿ ದಾಖಲೆಗಳನ್ನು ಪರಿಶೀಲಿಸುತ್ತಿದ್ದರು. (ದಿಗ್ವಿಜಯ ನ್ಯೂಸ್)

HeroIT RaidKichcha SudeepaSandalwoodಐಟಿ ದಾಳಿಕಿಚ್ಚ ಸುದೀಪಸುದೀಪ್​ಸ್ಯಾಂಡಲ್‌ವುಡ್‌