ಟಿಎಂಸಿ ಪರ ಬಾಂಗ್ಲಾ ನಟನ ಪ್ರಚಾರ: ವರದಿ ಕೇಳಿದ ಕೇಂದ್ರ ಗೃಹ ಸಚಿವಾಲಯ

ಕೋಲ್ಕತ: ಪಶ್ಚಿಮ ಬಂಗಾಳದಲ್ಲಿ ಆಡಳಿತಾರೂಢ ತೃಣಮೂಲ ಕಾಂಗ್ರೆಸ್​ ಪಕ್ಷದ ಅಭ್ಯರ್ಥಿ ಪರ ಬಾಂಗ್ಲಾ ದೇಶದ ಖ್ಯಾತ ನಟ ಫಿರ್ದೋಸ್​ ಅಹಮದ್​ ಪ್ರಚಾರ ನಡೆಸಿದ್ದಾರೆ. ಈ ಕುರಿತು ಕೇಂದ್ರ ಗೃಹ ಸಚಿವಾಲಯ ವರದಿ ನೀಡುವಂತೆ ಸೂಚಿಸಿದೆ.

ರಾಯ್​ಗಂಜ್​ ಲೋಕಸಭೆ ಕ್ಷೇತ್ರದ ತೃಣಮೂಲ ಕಾಂಗ್ರೆಸ್​ ಅಭ್ಯರ್ಥಿ ಕನ್ಹಯ್ಯಾಲಾಲ್​ ಅಗರ್ವಾಲ್​ ಪರ ಬಾಂಗ್ಲಾ ನಟ ಫಿದ್ಯಸ್​ ಅಹಮದ್​, ಬೆಂಗಾಳಿ ನಟರಾದ ಅಂಕುಶ್​ ಮತ್ತು ಪಾಯಲ್​ ಭಾನುವಾರ ಪ್ರಚಾರದಲ್ಲಿ ಭಾಗವಹಿಸಿದ್ದರು. ಇವರು ಪ್ರಚಾರ ನಡೆಸಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗಿದೆ.

ಟಿಎಂಸಿ ಅಭ್ಯರ್ಥಿ ಪರ ಬಾಂಗ್ಲಾ ನಟ ಪ್ರಚಾರ ನಡೆಸಿದ ಕುರಿತು ಬಿಜೆಪಿ ನಾಯಕರಾದ ಜಯ್​ ಪ್ರಕಾಶ್​ ಮುಜಮ್ದಾರ್​ ಮತ್ತು ಸಿಸಿರ್​ ಬಜೋರಿಯಾ ಅವರು ರಾಜ್ಯ ಚುನಾವಣಾ ಆಯೋಗಕ್ಕೆ ದೂರು ನೀಡಿದ್ದಾರೆ. ಈ ಕುರಿತು ಪ್ರತಿಕ್ರಿಯೆ ನೀಡಿರುವ ಬಿಜೆಪಿ ರಾಜ್ಯ ಉಪಾಧ್ಯಕ್ಷ ಮಜುಮ್ದಾರ್​ ಅವರು ಇದು ಕಾನೂನು ಬಾಹಿರ ಕ್ರಮವಾಗಿದ್ದು, ಟಿಎಂಸಿಯ ಸಿದ್ಧಾಂತದ ಕುರಿತು ಸಾಕ್ಷ್ಯ ಒದಗಿಸುತ್ತಿದೆ ಎಂದು ತಿಳಿಸಿದ್ದಾರೆ.

ಈ ಘಟನೆ ಕುರಿತು ಕೇಂದ್ರ ಗೃಹ ಸಚಿವಾಲಯ ವಿದೇಶಿಯರ ಪ್ರಾದೇಶಿಕ ನೋಂದಣೆ ಕಚೇರಿಗೆ ವರದಿ ನೀಡುವಂತೆ ಸೂಚಿಸಿದೆ. (ಏಜೆನ್ಸೀಸ್​)

Leave a Reply

Your email address will not be published. Required fields are marked *