VIDEO| ರಾಕಿಭಾಯ್​ಗೆ 34ನೇ ಹುಟ್ಟುಹಬ್ಬದ ಸಂಭ್ರಮ: ಯಶಸ್ಸಿನೆಡೆಗೆ ಯಶ್​ ನಡೆದ​ ಹಾದಿಯ ಕಿರುನೋಟ ನಿಮಗಾಗಿ

ಬೆಂಗಳೂರು: ಕೆ.ಜಿ.ಎಫ್​ ಚಿತ್ರದ ಮೂಲಕ ಸ್ಯಾಂಡಲ್​ವುಡ್​​ ಸಿನಿಮಾ ಮಾರುಕಟ್ಟೆಯನ್ನು ರಾಷ್ಟ್ರವ್ಯಾಪಿ ವಿಸ್ತರಿಸಿದಲ್ಲದೆ, ನ್ಯಾಷನಲ್​ ಸ್ಟಾರ್​ ಆಗಿ ಹೊಮ್ಮಿದ ನಟ ರಾಕಿಂಗ್​ ಸ್ಟಾರ್​ ಯಶ್​ ಜನವರಿ 8ರಂದು 34ನೇ ವಸಂತಕ್ಕೆ ಕಾಲಿಟ್ಟಿದ್ದಾರೆ. ಈ ಬಾರಿಯ ಯಶ್​ ಬರ್ತ್​ಡೇ ತುಂಬಾ ವಿಶೇಷವಾಗಿದ್ದಲ್ಲದೆ, ವಿಶ್ವದಾಖಲೆಯನ್ನು ಬರೆದಿದೆ. ಅದಕ್ಕೆ ಕಾರಣ ಯಶ್​ ಅಭಿಮಾನಿಗಳು ಮಾಡಿಕೊಂಡಿದ್ದ ಬರ್ತ್​ಡೆ ತಯಾರಿ.

ಬರೋಬ್ಬರಿ 5705 ಕೆ.ಜಿ. ತೂಕದ ಕೇಕ್​, 200 ಅಡಿ ಉದ್ದದ ಕಟೌಟ್​ ಮೂಲಕ ಯಶ್​ ಹುಟ್ಟುಹಬ್ಬವನ್ನು ಅದ್ಧೂರಿಯಾಗಿ ಆಚರಿಸಿ ವಿಶ್ವದಾಖಲೆ ಬರೆದಿದ್ದಾರೆ. ಇಂತಹ ಸಂದರ್ಭದಲ್ಲಿ ಯಶ್​ ಸಿನಿ ಜರ್ನಿಯ ಒಂದು ಹಿನ್ನೋಟವನ್ನು ನಿಮ್ಮ ಮುಂದಿಡುವ ಪ್ರಯತ್ನ ಮಾಡುತ್ತಿದ್ದೇವೆ.

ಯಶ್​ ಅವರ ಸಿನಿ ಪಯಾಣ ಅಷ್ಟು ಸುಲಭವಾಗಿರಲಿಲ್ಲ. ಸಿನಿಮಾ ರಂಗದಲ್ಲಿ ಬ್ಯಾಕ್​ಗ್ರೌಂಡ್​ ಇರುವವರೇ ಯಶಸ್ಸು ಸಿಗದೇ ಒಂದೇ ಒಂದು ಯಶಸ್ಸಿಗಾಗಿ ಇನ್ನೂ ಪ್ರಯತ್ನ ಪಡುತ್ತಿದ್ದಾರೆ. ಅಂತಹದರಲ್ಲಿ ಕಡಿಮೆ ಅವಧಿಯಲ್ಲಿ ಯಶ್​ ನ್ಯಾಷನಲ್​ ಸ್ಟಾರ್​ ಆಗಿ ಹೊರಹೊಮ್ಮಲು ಅವರಲ್ಲಿರುವ ಪ್ರತಿಭೆಯೇ ಕಾರಣ ಎಂದು ಖಚಿತವಾಗಿ ಹೇಳಬಹುದಾಗಿದೆ.

ಬಾಲ್ಯದಿಂದಲೇ ನಟನೆ ಮೇಲೆ ಆಸಕ್ತಿ
ಹಾಸನ ನಗರ ಸಮೀಪವಿರುವ ಸಣ್ಣ ಭುವನಹಳ್ಳಿಯೊಂದರಲ್ಲಿ ನವೀನ್​ ಕುಮಾರ್​ ಗೌಡನಾಗಿ ಹುಟ್ಟಿದ ಯಶ್​, ಬಾಲ್ಯದಿಂದಲೇ ನಟನೆಯ ಬಗ್ಗೆ ಆಸಕ್ತಿ ಹೊಂದಿದ್ದರು. ಶಾಲಾ ದಿನಗಳಲ್ಲೇ ಅಭಿನಯಿಸುತ್ತಿದ್ದರು. ಯಶ್​ ತಂದೆ ಬಿಎಂಟಿಸಿ ಚಾಲಕರಾಗಿದ್ದು, ತಾಯಿ ಪುಷ್ಪಾ ಮತ್ತು ಸಹೋದರಿ ನಂದಿನಿ ಕೂಡ ಯಶ್​ ನಟನೆಗೆ ಸಾಥ್​ ನೀಡುತ್ತಲೇ ಬಂದಿದ್ದಾರೆ. ಹೈಸ್ಕೂಲ್​ ದಿನಗಳನ್ನು ಮೈಸೂರಿನಲ್ಲಿ ಕಳೆದ ಯಶ್ ಮಹಾಜನ ಶಾಲೆಯಲ್ಲಿ ಓದಿದರು. ಅಲ್ಲದೆ, ನಟನೆಯ ಮೇಲೆ ಪ್ರಾವಿಣ್ಯ ಸಾಧಿಸಲು ಬಿ.ವಿ.ಕಾರಂತ್​ ಅವರ ಡ್ರಾಮಾ ಶಾಲೆಗೂ ಸೇರಿದರು.

ಮೊದಲು ಕಿರುತೆರೆ ಪ್ರವೇಶ
ನಂದ ಗೋಕುಲ ಧಾರವಾಹಿಯ ಮೂಲಕ ಯಶ್​ ಕಿರುತೆರೆಗೆ ಕಾಲಿಟ್ಟರು. ವಿಶೇಷವೆಂದರೆ ಇದೇ ಧಾರವಾಹಿಯಲ್ಲಿ ರಾಧಿಕಾ ಪಂಡಿತ್​ ಕೂಡ ನಟಿಸಿದ್ದಾರೆ. ಧಾರವಾಹಿಯಲ್ಲಿ ಯಶ್​, ರಾಧಿಕಾ ಸಹೋದರ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಮುಂದೊಂದು ದಿನ ನಾವಿಬ್ಬರೂ ದಂಪತಿಗಳಾಗುತ್ತೇವೆ ಎಂದು ಬಹುಶಃ ಇಬ್ಬರಿಗೂ ಗೊತ್ತಿರಲಿಲ್ಲ ಅನಿಸುತ್ತದೆ. ಧಾರಾವಾಹಿಗಳಲ್ಲಿ ಸಣ್ಣ ಪುಟ್ಟ ಪಾತ್ರ ಮಾಡುತ್ತಿದ್ದ ಯಶ್​ 2007ರಲ್ಲಿ ಮೊದಲ ಬಾರಿಗೆ ನಿರ್ದೇಶಕಿ ಪ್ರಿಯಾ ಹಾಸನ್​ ನಿರ್ದೇಶನದ “ಜಂಬದ ಹುಡುಗಿ” ಮೂಲಕ ಸಿನಿಜಗತ್ತಿಗೆ ಪ್ರವೇಶ ನೀಡಿದರು. ಈ ಸಿನಿಮಾದಲ್ಲಿ ಯಶ್​ ಅವರದ್ದು ಸಣ್ಣ ಪಾತ್ರವಾಗಿತ್ತು. ಒಳ್ಳೆಯ ಅಭಿನಯ ನೀಡಿದ್ದರೂ ಗಮನ ಸೆಳೆದಿರಲಿಲ್ಲ. ಬಳಿಕ ನಿರ್ದೇಶಕ ಶಶಾಂಕ್​ ನಿರ್ದೇಶನದ ಮೊಗ್ಗಿನ ಮನಸ್ಸು ಚಿತ್ರದಲ್ಲಿ ರಾಧಿಕ ಪಂಡಿತ್​ಗೆ ನಾಯಕನಾಗಿ ನಟಿಸಿದರು. ಈ ಚಿತ್ರ ಉತ್ತಮ ಯಶಸ್ಸು ಗಳಿಸಿತ್ತು. ಜತೆಗೆ ಯಶ್​ ಮತ್ತು ರಾಧಿಕಾ ಪಂಡಿತ್​ಗೆ ಒಳ್ಳೆಯ ಹೆಸರು ತಂದುಕೊಟ್ಟಿತು. ಈ ಚಿತ್ರಕ್ಕಾಗಿ ಉತ್ತಮ ಸಹಕಲಾವಿದ ಪ್ರಶಸ್ತಿಗೂ ಭಾಜನರಾದರು. ನಂತರ ಬಂದ ರಾಕಿ, ಕಳ್ಳರ ಸಂತೆ ಹಾಗೂ ಗೋಕುಲ ಹೇಳಿಕೊಳ್ಳುವಷ್ಟು ಯಶಸ್ಸು ತರಲಿಲ್ಲ. ಬಳಿಕ ಬಂದ ಮೊದಲಾಸಲ ಚಿತ್ರವು ಕೂಡ ಸಿನಿರಸಿಕರ ಗಮನ ಸೆಳೆದಿತ್ತು. ಆನಂತರ ಬಂದ ರಾಜಧಾನಿ ವಿಮರ್ಶಕರ ಗಮನ ಸೆಳೆಯಿತು.

ಯಶ್​ ಸಿನಿ ದಿಕ್ಕು ಬದಲಿಸಿದ ಅಣ್ತಮ್ಮ ಡೈಲಾಗ್​
ಕಿರಾತಕ ಚಿತ್ರದ ಯಶ್​ ಪಾಲಿಗೆ ಒದಗಿ ಬಂದ ಅದೃಷ್ಟವೆನ್ನಬಹುದು ಮಂಡ್ಯ ಸೊಗಡಿನಲ್ಲಿ ಮೂಡಿಬಂದ ಕಿರಾತಕ ತಮಿಳಿನ ರಿಮೇಕ್​ ಆದರೂ ಸಖತ್ ಸದ್ದು ಮಾಡಿತು. ಅಲ್ಲಿಂದಲೇ ಯಶ್​ ಅಣ್ತಮ್ಮ ಡೈಲಾಗ್​ ಫೇಮಸ್​ ಆಯಿತು. ಆನಂತರ ಬಂದ ಲಕ್ಕಿ ಮತ್ತು ಜಾನು ಚಿತ್ರ ಕೈಹಿಡಿಯಲಿಲ್ಲ. ಮತ್ತೆ ಯೋಗರಾಜ್​ ಭಟ್​ ನಿರ್ದೇಶನ ಡ್ರಾಮ್​ ಚಿತ್ರ ನೂರು ದಿನ ಓಡುವ ಮೂಲಕ ಗಲ್ಲಾಪೆಟ್ಟಿಗೆಯಲ್ಲಿ ಸದ್ದು ಮಾಡಿದ್ದಲ್ಲದೆ, ಯಶ್​ಗೆ ಯಶಸ್ಸು ತಂದುಕೊಟ್ಟಿತು.

​ಗೂಗ್ಲಿ, ರಾಜಾಹುಲಿ ಮೂಲಕ ಯಶ್​ ಮೋಡಿ
ಡ್ರಾಮ ನಂತರ ಬಂದ ಪವನ್​ ಒಡೆಯರ್​ ನಿರ್ದೇಶನದ ಗೂಗ್ಲಿ ಚಿತ್ರದ ಯುವ ಬಳಗವನ್ನು ಸೆಳೆಯಿತು. ಯಶ್​ ಲುಕ್​, ಡೈಲಾಗ್​ ಮತ್ತು ಡ್ಯಾನ್ಸ್​ಗೆ ಸಿನಿರಸಿಕರು ಫಿದಾ ಆದರು. ಈ ಚಿತ್ರದಿಂದ ಅಭಿಮಾನಿಗಳ ಸಂಖ್ಯೆ ಜಾಸ್ತಿಯಾಯಿತು. ನಂತರ ಬಂದ ರಾಜಾಹುಲಿ ಯಶ್​ಗೆ ಮಾಸ್​ ಹೀರೂ ಪಟ್ಟ ತಂದುಕೊಟ್ಟಿತು. ಇದು ಕೂಡ ತಮಿಳು ಚಿತ್ರದ ರಿಮೇಕ್​ ಆದರೂ ಚಿತ್ರ ಮಾತ್ರ ಗಲ್ಲಾಪೆಟ್ಟಿಗೆಯಲ್ಲಿ ದಾಖಲೆ ಬರೆಯಿತು. ನಂತರ ಬಂದ ಗಜಕೇಸರಿ ಅರ್ಧಶತಕ ಪೂರೈಸಿದರೂ ಯಶಸ್ಸು ತರಲಿಲ್ಲ.

ಸ್ಟಾರ್​ ಪಟ್ಟ ತಂದುಕೊಟ್ಟ ಮಿಸ್ಟರ್​ ಆ್ಯಂಡ್​ ಮಿಸೆಸ್​ ರಾಮಾಚಾರಿ
2014ರಲ್ಲಿ ಸಂತೋಷ್​ ಆನಂದ್​ ರಾಮ್​ ಮೊದಲ ನಿರ್ದೇಶನದ ಮಿಸ್ಟರ್​ ಆ್ಯಂಡ್​ ಮಿಸೆಸ್​ ರಾಮಾಚಾರಿ ಚಿತ್ರ ಯಶ್​ ಜೀವನದಲ್ಲಿ ಮಹತ್ವದ ತಿರುವು ನೀಡಿದ ಚಿತ್ರವೆಂದರೆ ತಪ್ಪಾಗಲಾರದು. ರಗಡ್​ ಪ್ರೇಮಕತೆ, ಯಶ್​ ಅಭಿನಯ ಹಾಗೂ ವಿಭಿನ್ನ ಮ್ಯಾನರಿಸಂ ಸಿನಿರಸಿಕರನ್ನು ಹುಚ್ಚೆಬ್ಬಿಸಿತು. ಯಶ್​ ಮತ್ತು ರಾಧಿಕ ಕೆಮೆಸ್ಟ್ರಿಗೆ ಶಿಳ್ಳೆ ಚಪ್ಪಾಳೆಗಳು ಬಿತ್ತು. ಇಲ್ಲಿಂದಲೇ ಯಶ್​ ಮತ್ತು ರಾಧಿಕ ನಡುವಿನ ಪ್ರೇಮ ಪುರಾಣಕ್ಕೂ ಜೀವಬಂತು. ಈ ಚಿತ್ರ ಬಾಕ್ಸ್​ಆಫೀಸ್​ನಲ್ಲಿ 50 ಕೋಟಿ. ರೂ ಬಾಚಿ ದಾಖಲೆ ಬರೆಯಿತು. ಇದರ ನಂತರ ಬಂದ ಮಾಸ್ಟರ್​ ಪೀಸ್​ ಹೇಳಿಕೊಳ್ಳುವಷ್ಟು ತರದಿದ್ದರೂ, ಸಂತು ಸ್ಟ್ರೈಟ್​ ಫಾರ್ವರ್ಡ್​ ಗಲ್ಲಾಪೆಟ್ಟಿಗೆಯಲ್ಲಿ ಸದ್ದು ಮಾಡಿತು.

ನ್ಯಾಷನಲ್​ ಸ್ಟಾರ್​ ಪಟ್ಟ ತಂದುಕೊಟ್ಟ ಕೆಜಿಎಫ್​
ಡಿಸೆಂಬರ್​ 2018ರಲ್ಲಿ ಬಿಡುಗಡೆಯಾದ ಪ್ರಶಾಂತ್​ ನೀಲ್​ ನಿರ್ದೇಶನದ ಕೆ.ಜಿ.ಎಫ್​ ಚಿತ್ರ ಪ್ಯಾನ್​ ಇಂಡಿಯಾ ಬಿಡುಗಡೆಯಾಗಿ ಎಲ್ಲೆಡೆ ಧೂಳೆಬ್ಬಿಸಿತ್ತು. ಬರೋಬ್ಬರಿ 250 ಕೋಟಿ ರೂ. ಸಂಗ್ರಹಿಸಿ ಕನ್ನಡ ಇಂಡಸ್ಟ್ರಿ ಇತಿಹಾಸದಲ್ಲಿ ಹೊಸ ದಾಖಲೆ ಬರೆಯಿತು. ಅಲ್ಲದೆ, ಸ್ಯಾಂಡಲ್​​ವುಡ್​ ಮಾರುಕಟ್ಟೆಯನ್ನು ವಿಸ್ತರಿಸಿದ ಕೀರ್ತಿ ಕೆ.ಜಿ.ಎಫ್​ಗೆ ಸಲ್ಲುತ್ತದೆ.

ರಾಧಿಕ-ಯಶ್​ ಕಲ್ಯಾಣ
ಪ್ರೀತಿಯ ಬಗ್ಗೆ ಸಾಕಷ್ಟು ಪುಕಾರು ಕೇಳಿಬರುತ್ತಲೆ ಇಬ್ಬರ ನಡುವೆ ಪ್ರೇಮಾಂಕುರವಾಗಿರುವುದನ್ನು ಬಹಿರಂಗಡಿಸಿದ ಸ್ಯಾಂಡಲ್​ವುಡ್​ ಸ್ಟಾರ್​ ಜೋಡಿ, 2016 ಆಗಸ್ಟ್​ 12ರಂದು ಗೋವಾದಲ್ಲಿ ನಿಶ್ಚಿತಾರ್ಥ ನೆರವೇರಿಸಿಕೊಂಡರು. ಅದೇ ವರ್ಷ ಡಿಸೆಂಬರ್ 9 ರಂದು ಯಶ್​ ಮತ್ತು ರಾಧಿಕ ವೈವಾಹಿಕ ಜೀವನಕ್ಕೆ ಕಾಲಿಟ್ಟರು. ಇಬ್ಬರ ದಾಂಪತ್ಯ ಜೀವನದ ಖುಷಿಯನ್ನು ಇಮ್ಮಡಿಗೊಳಿಸಲು 2018 ಡಿಸೆಂಬರ್​ 2 ರಂದು ಐರಾ ಹೆಸರಿನ ಮುದ್ದಾದ ಹೆಣ್ಣು ಮಗು ಹಾಗೂ ಅಕ್ಟೋಬರ್​ 30, 2019ರಂದು ಗಂಡು ಮಗು ಕುಟುಂಬದ ಜತೆಯಾಗಿದೆ.

ಯಶೋಮಾರ್ಗದ ಮೂಲಕ ಸಾಮಾಜಿಕ ಕಾರ್ಯ
ಯಶ್​ ಅವರು ಯಶೋಮಾರ್ಗ ಹೆಸರಿನಲ್ಲಿ ಸಂಘಟನೆಯೊಂದನ್ನು ನಡೆಸುತ್ತಿದ್ದಾರೆ. ಈ ಮೂಲಕ ತಮ್ಮ ಕೈಲಾದಷ್ಟು ನೆರವಿನ ಹಸ್ತ ಚಾಚುತ್ತಿದ್ದಾರೆ. ಸಂಘಟನೆಯ ಮೊದಲನೇ ಹಂತವಾಗಿ ಕೊಪ್ಪಳ ಜಿಲ್ಲೆಯ ಹಳ್ಳಿಯೊಂದರ ಕೆರೆಗೆ ನೀರು ತುಂಬಿಸುವ ಮೂಲಕ ಯಶ್​ ಮೆಚ್ಚುಗೆಗೆ ಪಾತ್ರವಾಗಿದ್ದರು.

ಕೆ.ಜಿ.ಎಫ್​. ಚಾಪ್ಟರ್​ 2ಗೆ ಬೆಟ್ಟದಷ್ಟು ನಿರೀಕ್ಷೆ
ಮುಂಬರುವ ಕೆ.ಜಿ.ಎಫ್​. ಚಾಪ್ಟರ್​ 2 ಸಾಕಷ್ಟು ನಿರೀಕ್ಷೆ ಹುಟ್ಟುಹಾಕಿದೆ. ಈ ಚಿತ್ರವು ದೇಶಾದ್ಯಂತ ಮತ್ತೊಂದು ಸುತ್ತಿನ ಅಲೆ ಸೃಷ್ಟಿಸುವ ಲಕ್ಷಣಗಳು ಕಾಣುತ್ತಿವೆ. ಈಗಾಗಲೇ ಚಿತ್ರದ ಫಸ್ಟ್​ಲುಕ್​ ಬಿಡುಗಡೆಯಾಗಿದ್ದು, ಸಾಕಷ್ಟು ವೈರಲ್​ ಆಗಿದೆ. ಕೆ.ಜಿ.ಎಫ್​. ಚಾಪ್ಟರ್​ 2 ಬಿಟ್ಟರೆ ಮೈ ನೇಮ್​ ಇಸ್​ ಕಿರಾತಕ, ರಾಣಾ ಚಿತ್ರಗಳ ಬಗ್ಗೆ ಈಗಾಗಲೇ ಮಾತುಕತೆ ನೆಡೆದಿದ್ದು, ಮುಂದಿನ ಚಿತ್ರ ಯಾವುದಿರಬಹುದು ಎಂಬ ಕುತೂಹಲ ಎಲ್ಲರಲ್ಲೂ ಮನೆಮಾಡಿದೆ.

ಉಳಿದಂತೆ ಹಲವು ಜಾಹಿರಾತುಗಳಲ್ಲಿಯು ಯಶ್​ ತೊಡಗಿಸಿಕೊಂಡಿದ್ದಾರೆ. ಅಲ್ಲದೆ, ಸಿನಿಮಾ ಸೇವೆಗಾಗಿ ಫಿಲ್ಮಫೇರ್​ ಅವಾರ್ಡ್​, ಸೈಮಾ, ಐಫಾ ಉತ್ಸವ ಹಾಗೂ ದಾದಾ ಸಾಹೇಬ್​ ದಕ್ಷಿಣ ಪ್ರಶಸ್ತಿ ಸೇರಿದಂತೆ ಹಲವಾರು ಪ್ರಶಸ್ತಿಗೆ ಯಶ್​ ಭಾಜನರಾಗಿದ್ದಾರೆ. ಇದನ್ನು ಹೊರತುಪಡಿಸಿದರೆ, ವಿವಾದವು ಯಶ್​ ಅವರಿಗೆ ಹೊರಾತಾಗಿಲ್ಲ ಬಾಡಿಗೆ ಮನೆ ವಿವಾದ, ಐಟಿ ರೈಡ್​ ಸೇರಿದಂತೆ ಕೆಲ ಕಹಿಘಟನೆಗಳನ್ನು ಯಶ್​ ಅನುಭವಿಸಿದ್ದು, ಒಟ್ಟಾರೆ ಇಂದು ನ್ಯಾಷನಲ್​ ಸ್ಟಾರ್​ ಆಗಿ ಹೊರಹೊಮ್ಮಿದ್ದಾರೆ.