ವಿಜಯವಾಣಿ ಸುದ್ದಿಜಾಲ ಬೆಂಗಳೂರು
“ಅಗ್ನಿಸಾ’, “ಅಣ್ಣ ತಂಗಿ’ ಧಾರಾವಾಹಿಗಳ ಖ್ಯಾತಿಯ ನಟ ರಾಜೇಶ್ ಧ್ರುವ ಚೊಚ್ಚಲ ಬಾರಿಗೆ ನಾಯಕನಾಗಿ ನಟಿಸಿ, ನಿರ್ದೇಶಿಸಿದ್ದ ಸಿನಿಮಾ “ಶ್ರೀ ಬಾಲಾಜಿ ಫೋಟೊ ಸ್ಟುಡಿಯೋ’ ಕಳೆದ ವರ್ಷ ತೆರೆಗೆ ಬಂದಿತ್ತು. ಹಾಗೇ 2023ರಲ್ಲೇ ಸುಕೇಶ್ ಶೆಟ್ಟಿ ನಿರ್ದೇಶನದಲ್ಲಿ “ದೂರದರ್ಶನ’ ಸಿನಿಮಾ ರಿಲೀಸ್ ಆಗಿತ್ತು. ಇದೀಗ ರಾಜೇಶ್ ಮತ್ತು ಧ್ರುವ ತಮ್ಮ ಎರಡನೇ ಪ್ರಾಜೆಕ್ಟ್ಗೆ ಒಂದಾಗಿದ್ದಾರೆ. ಚಿತ್ರದ ಹೆಸರು “ಪೀಟರ್’. ಇತ್ತೀಚೆಗಷ್ಟೆ ಡಾಲಿ ಧನಂಜಯ ಮತ್ತು ವಿಜಯ್ ಸೇತುಪತಿ ಟೈಟಲ್ ರಿಲೀಸ್ ಮಾಡಿ ಚಿತ್ರತಂಡಕ್ಕೆ ಶುಭಹಾರೈಸಿದ್ದಾರೆ. ಚಿತ್ರದ ಬಗ್ಗೆ ನಾಯಕ ರಾಜೇಶ್ ಧ್ರುವ, “ಜೆಸ್ಸಿ, ಹಳೆಯ ಮನೆ, ಅದರ ಮೇಲೆ ರಾಯಲ್ ಚಂಡೆ ಬಾಯ್ಸ್, ಮಲಯಾಳಂನಲ್ಲಿ ಕುಂಜೆತ್ತನ್, ಜೆಸ್ಸಿ ವಾಪಸ್ ಬಂದಿದಾಳೆ ಅನ್ನೋ ಬರಹಗಳು. ಗೋಡೆಗೆ ಒರಗಿದ ಆರ್ಎಕ್ಸ್ 100… ಹೀಗೆ ಪ್ರೇಕ್ಷಕರಿಗೆ ಪೋಸ್ಟರ್ ಮೂಲಕವೇ ಚಿತ್ರದ ಬಗ್ಗೆ ಕುತೂಹಲ ಮೂಡಿದೆ’ ಎಂದು ಸಂತಸ ಹಂಚಿಕೊಳ್ಳುತ್ತಾರೆ.
ಚಂಡೆ ಕುರಿತ ಚಿತ್ರ
“ಚಂಡೆಯ ಕುರಿತು ಇದುವರೆಗೂ ಯಾವ ಚಿತ್ರರಂಗದಲ್ಲೂ ಸಿನಿಮಾ ಬಂದಿಲ್ಲ’ ಎನ್ನುವ ರಾಜೇಶ್, “300ಕ್ಕೂ ಹೆಚ್ಚು ವರ್ಷಗಳ ಇತಿಹಾಸವಿರುವ ಕೇರಳ ಮೂಲದ ಚಂಡೆ, ಕರ್ನಾಟಕಕ್ಕೆ ಹೇಗೆ ಬಂತು? ಪೀಟರ್ಗೂ ಚಂಡೆಗೂ ಏನು ಸಂಬಂಧ? ಇಂತಹ ಹಲವು ಪ್ರಶ್ನೆಗಳು ಪ್ರೇಕ್ಷಕರಲ್ಲಿ ಮೂಡಿಬರಹುದು. ಅದಕ್ಕೆ ಚಿತ್ರದಲ್ಲಿ ಉತ್ತರ ನೀಡಿದ್ದೇವೆ’ ಎನ್ನುತ್ತಾರೆ.
ಸೆನ್ಸಿಟಿವ್ ಕ್ರೈಮ್ ಡ್ರಾಮಾ
“ಪೀಟರ್’ ಕನ್ನಡ, ಮಲಯಾಳಂ ಮತ್ತು ತಮಿಳು ಭಾಷೆಗಳಲ್ಲಿ ಮೂಡಿಬರಲಿದೆ. ಇದೊಂದು ಸೆನ್ಸಿಟಿವ್ ಕೆಮ್ ಡ್ರಾಮಾ ಜಾನರ್ ಚಿತ್ರವಾಗಿದ್ದು, ಜತೆಗೆ ಫ್ಯಾಮಿಲಿ ಎಮೋಷನ್ಸ್ ಕೂಡ ಇರಲಿವೆಯಂತೆ. ಚಿತ್ರದಲ್ಲಿ ರಾಜೇಶ್ ಧ್ರುವ ಜತೆ ರವೀಕ್ಷಾ ಶೆಟ್ಟಿ, ಜಾಹ್ನವಿ ರಾಯಲ, ಪ್ರತಿಮಾ ನಾಯಕ್, ರಘು ಪಾಂಡೇಶ್ವರ್, ರಾಮ ನಾಡಗೌಡ ತಾರಾಗಣದಲ್ಲಿದ್ದಾರೆ. ಈಗಾಗಲೇ ಮಡಿಕೇರಿಯ ಭಾಗಮಂಡಲದ ಸುಂದರ ಪರಿಸರದಲ್ಲಿ 29 ದಿನಗಳಲ್ಲಿ ಶೇಕಡಾ 80ರಷ್ಟು ಚಿತ್ರೀಕರಣ ಪೂರ್ಣಗೊಂಡಿದ್ದು, ಚಳಿಗಾಲದಲ್ಲಿ ಉಳಿದ ಶೂಟಿಂಗ್ ನಡೆಸಲು ಚಿತ್ರತಂಡ ಪ್ಲ್ಯಾನ್ ಮಾಡಿಕೊಂಡಿದೆ. ಅದಕ್ಕಾಗಿ ನಾಯಕ ಮತ್ತು ಇನ್ನೆರಡು ಪಾತ್ರಧಾರಿಗಳು ದೇಹದ ತೂಕ ಕಡಿಮೆ ಮಾಡಿಕೊಳ್ಳುವ ತಯಾರಿಯಲ್ಲಿದ್ದಾರೆ. ಹಲವಾರು ಸಿನಿಮಾಗಳ ಡಿಟಿಎಸ್ ಮತ್ತು ಎಸ್ಎಫ್ಎಕ್ಸ್ ಮಾಡಿರುವ ಸೌಂಡ್ ಇಂಜಿನಿಯರ್ ರವಿ ಹಿರೇಮಠ್ ಮತ್ತು ರಾಕೇಶ್ ಹೆಗಡೆ ವೃದ್ಧಿ ಸ್ಟುಡಿಯೋಸ್ ಬ್ಯಾನರ್ನಲ್ಲಿ “ಪೀಟರ್’ ನಿರ್ಮಿಸುತ್ತಿದ್ದಾರೆ.
“ಶ್ರೀ ಬಾಲಾಜಿ ಫೋಟೊ ಸ್ಟುಡಿಯೋ’ಗೂ “ಪೀಟರ್’ಗೂ ಅಜಗಜಾಂತರ ವ್ಯತ್ಯಾಸಗಳಿವೆ. ವಿಷಯ, ಪಾತ್ರ ಸಂಪೂರ್ಣ ವಿಭಿನ್ನವಾಗಿರಲಿದೆ. ಚಂಡೆ ಬಾರಿಸುವ ಹುಡುಗನೊಬ್ಬ, ತನ್ನದೇ ತಂಡ ಕಟ್ಟಿಕೊಂಡು ಅದನ್ನು ಬೆಳೆಸಲು ಯತ್ನಿಸುತ್ತಿರುವಾಗ ನಡೆಯುವ ಟನೆಯೊಂದರ ಸುತ್ತ ಕಥೆ ಸಾಗುತ್ತದೆ. ರಿವರ್ಸ್ ಸ್ಕ್ರೀನ್ಪ್ಲೇ ಶೈಲಿಯಲ್ಲಿ ಸಿನಿಮಾ ಮೂಡಿಬರಲಿದೆ.
– ರಾಜೇಶ್ ಧ್ರುವ, ನಾಯಕ
