ನಾಲ್ವರು ಪೊಲೀಸರ ವಶಕ್ಕೆ

ರಬಕವಿ/ಬನಹಟ್ಟಿ: ಕೈಯಲ್ಲಿ ಕಲ್ಲು ನೀಡಿ ಮುಷ್ಠಿ ಮಾಡಿಸಿ ಅದನ್ನು ಲಿಂಗವನ್ನಾಗಿಸುವುದು ಸೇರಿ ಹಲವು ವಶೀಕರಣ ತಂತ್ರ ಅನುಸರಿಸಿ ಅಮಾಯಕ ಜನರನ್ನು ಪುಸಲಾಯಿಸಿ ಹಣ ಕೀಳುತ್ತಿದ್ದ ನಾಲ್ವರನ್ನು ಬನಹಟ್ಟಿ ಪೊಲೀಸರು ಬಂಧಿಸಿದ್ದಾರೆ.

ಬೆಳಗಾವಿ ಜಿಲ್ಲೆಯ ರಾಯಭಾಗ ಪಟ್ಟಣದ ಭೀಮಪ್ಪ ಕುಡಿ, ದುರ್ಗಪ್ಪ ಸಂಕನ್ನವರ, ಹನುಮಂತ ಕುಗಡಿ ಹಾಗೂ ಬಸವರಾಜ ಅವೇನೂರ ಬಂಧಿತರು.

ಘಟನೆ ವಿವರ: ತಾಲೂಕಿನ ನಾವಲಗಿ ಗ್ರಾಮದ ಹತ್ತಿರ ಬನಹಟ್ಟಿ-ಮುಧೋಳ ರಸ್ತೆ ಮಧ್ಯೆ ನಾಲ್ವರು ಸ್ವಾಮಿಗಳ ವೇಷ ಧರಿಸಿ ವಾಹನಗಳನ್ನು ಅಡ್ಡಗಟ್ಟುತ್ತಿದ್ದರು. ಬಬಲಾದಿ ಸದಾಶಿವ ಮಠದ ಅಜ್ಜನವರ ಹೆಸರು ಹೇಳುತ್ತ ಕಟ್ಟಡ ನಿರ್ಮಿಸಲಾಗುತ್ತಿದೆ. ಹಣ ನೀಡಬೇಕೆಂದು ಮನವೊಲಿಸುತ್ತಿದ್ದರು. ಅಂಗೈಯಲ್ಲಿ ಕಲ್ಲು ನೀಡಿ ಹಣೆಗೆ ವಿಭೂತಿ ಕುಂಕುಮ ಹಚ್ಚುವ ಸಂದರ್ಭ ನಾಲ್ವರು ಸೇರಿ ವ್ಯಕ್ತಿಯನ್ನು ಗಲಿಬಿಲಿಗೊಳಿಸಿ ಕೈಯಲ್ಲಿದ್ದ ಕಲ್ಲನ್ನು ಯಾಮಾರಿಸಿ ಲಿಂಗ ಇಟ್ಟು, ನಂತರ ಕಲ್ಲು ಇದ್ದದ್ದು ಲಿಂಗವಾಯಿತು ನೋಡಿ ಎಂದು ಹೇಳಿ ಜನರನ್ನು ಮರಳು ಮಾಡಿ ಹಣ ವಸೂಲಿ ಮಾಡುತ್ತಿದ್ದರು.

ಮುಧೋಳ ತಾಲೂಕಿನ ಹೆಬ್ಬಾಳ ಗ್ರಾಮದ ರಮೇಶ ಕುದರಿ ಶುಕ್ರವಾರ ಬೆಳಗ್ಗೆ ರಸ್ತೆ ಮಾರ್ಗವಾಗಿ ಕಾರು ಚಲಾಯಿಸುತ್ತಿರುವಾಗ ಮೋಸವೆಸಗಿದ್ದು, ಈ ಕುರಿತು ಬನಹಟ್ಟಿ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ ಹಿನ್ನೆಲೆ ಪೊಲೀಸರು ಪ್ರಕರಣದ ಬೆನ್ನತ್ತಿ ನಾಲ್ವರು ನಕಲಿ ಸ್ವಾಮಿ ವೇಷಧಾರಿಗಳನ್ನು ಬಂಧಿಸಿದ್ದಾರೆ. ಈ ಕುರಿತು ಪ್ರಕರಣ ದಾಖಲಾಗಿದ್ದು, ಪಿಎಸ್‌ಐ ಎಸ್.ಎಂ. ಅವಜಿ ತನಿಖೆ ಮುಂದುವರಿಸಿದ್ದಾರೆ.