ವೈಜ್ಞಾನಿಕವಾಗಿ ಸಮಸ್ಯೆಗಳು ನಿರ್ವಹಣೆಯಾಗಲಿ

ಮೈಸೂರು: ಪ್ರಸ್ತುತ ವಿಶ್ವದಲ್ಲಿ ತಲೆದೋರಿರುವ ಸಮಸ್ಯೆಗಳನ್ನು ವೈಜ್ಞಾನಿಕ ಮತ್ತು ನೈತಿಕ ವಿಧಾನಗಳ ಮೂಲಕ ನಿರ್ವಹಿಸುವ ಕೆಲಸ ಆಗಬೇಕು ಎಂದು ಭಾರತೀಯ ವಿಜ್ಞಾನ ಸಂಸ್ಥೆಯ ಘನಸ್ಥಿತಿ ಮತ್ತು ರಚನಾತ್ಮಕ ರಸಾಯನವಿಜ್ಞಾನ ಘಟಕದ ಪ್ರಾಧ್ಯಾಪಕ ಕೆ.ಜೆ.ರಾವ್ ಹೇಳಿದರು.

ಮೈಸೂರು ವಿವಿಯ ಯುವರಾಜ ಕಾಲೇಜಿನ ಅಮೃತ ಮಹೋತ್ಸವ ಸಭಾಂಗಣದಲ್ಲಿ ಗುರುವಾರ ಆಯೋಜಿಸಿದ್ದ ಕಾಲೇಜಿನ 6ನೇ ಪದವಿ ಪ್ರದಾನ ಸಮಾರಂಭದಲ್ಲಿ ಪದವಿ ಪ್ರದಾನ ಭಾಷಣ ಮಾಡಿದರು.

ಭಾರತವು ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರದಲ್ಲಿ ವಿಶ್ವಮಟ್ಟದಲ್ಲಿ ಗುರುತಿಸಿಕೊಳ್ಳುವಂತೆ ಉತ್ತಮ ಸಾಧನೆ ಮಾಡುತ್ತಿದ್ದು, ಇತ್ತೀಚೆಗೆ ಬ್ಲಾೃಕ್ ಹೋಲ್ ಅಸ್ತಿತ್ವದ ಕುರಿತಂತೆ ಹೆಚ್ಚು ಸಂಶೋಧನೆಯಾಗುತ್ತಿದೆ. ಹಿಂದೆಯೇ ಭಾರತದ ಭೌತವಿಜ್ಞಾನಿ ಪ್ರೊ.ಚಂದ್ರಶೇಖರ್ ಈ ಕುರಿತ ವಿಚಾರಗಳನ್ನು ಮಂಡಿಸಿದ್ದರು ಎಂಬುದು ಹೆಮ್ಮೆಯ ಸಂಗತಿ. ಬಾಹ್ಯಾಕಾಶ ವಿಜ್ಞಾನ ಮತ್ತು ತಂತ್ರಜ್ಞಾನದಲ್ಲೂ ಭಾರತ ವಿಶ್ವಮಟ್ಟದಲ್ಲಿ ಜನಪ್ರಿಯಗೊಂಡಿದೆ. ಇಸ್ರೋ ಮಂಗಳಯಾನ, ಚಂದ್ರಯಾನ ಅಷ್ಟೇ ಅಲ್ಲದೆ, 104 ಉಪಗ್ರಹಗಳನ್ನು ಒಂದೇ ಬಾರಿಗೆ ಉಡಾಯಿಸಿ ದಾಖಲೆ ಬರೆದಿದೆ ಎಂದರು.

ಜೀವವಿಜ್ಞಾನ ಕ್ಷೇತ್ರದಲ್ಲಿ ಡಿಎನ್‌ಎ- ರೈಬೊಸೋಮ್ ರಚನೆ ಕುರಿತು ಥಾಮಸ್ ಎ.ಸ್ಟಿಟ್ಜ್, ಅಡ ಎ.ಯೋನತ್ ಅವರೊಂದಿಗೆ ಭಾರತದ ವಿಜ್ಞಾನಿ ಪ್ರೊ.ವೆಂಕಟರಾಮನ್ ರಾಮಕೃಷ್ಣನ್ ಸಂಶೋಧನೆ ನಡೆಸಿ ನೊಬೆಲ್ ಪ್ರಶಸ್ತಿ ಪಡೆದಿದ್ದಾರೆ. ವಿಜ್ಞಾನ ಕ್ಷೇತ್ರಕ್ಕೆ ಇದೂ ಒಂದು ಮಹತ್ವದ ಕೊಡುಗೆಯಾಗಿದೆ ಎಂದರು.

ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರದಲ್ಲಿ ಸಾಕಷ್ಟು ಪ್ರಗತಿಯಾಗಿದ್ದರೂ, ಭವಿಷ್ಯದಲ್ಲಿ ವಿಶ್ವ ಅನಿರೀಕ್ಷಿತ ಸವಾಲುಗಳನ್ನು ಎದುರಿಸಲಿದೆ. ಈಗಾಗಲೇ ಜಾಗತಿಕ ತಾಪಮಾನ ಸಮಸ್ಯೆ ದೊಡ್ಡ ಸವಾಲಾಗಿದೆ. ಹಿಮಾಲಯ ಪರ್ವತಗಳು ಕರಗುತ್ತಿವೆ. ಸಮುದ್ರದಲ್ಲಿ ನೀರಿನ ಮಟ್ಟ ಹೆಚ್ಚುತ್ತಿದ್ದು, ಅರಣ್ಯಗಳಲ್ಲಿ ಕಾಡ್ಗಿಚ್ಚು ಕಾಣಿಸಿಕೊಳ್ಳುತ್ತಿದೆ. ಸಮಸ್ಯೆ ನಿರ್ವಹಣೆಗೆ ವಿಜ್ಞಾನಿಗಳು ಮತ್ತು ತಂತ್ರಜ್ಞರು ಹೆಚ್ಚು ಕಾರ್ಯೋನ್ಮುಖರಾಗಬೇಕು ಎಂದು ಎಚ್ಚರಿಸಿದರು.

ಚಂದ್ರ, ಶುಕ್ರ ಗ್ರಹಗಳೆಡೆಗೆ ಸ್ಥಳಾಂತರವಾಗುತ್ತಿದೆ ಎಂದು ಚಿಂತಿಸುವ ಬದಲು ಜಾಣ್ಮೆಯಿಂದ ಭೂಸಂಪನ್ಮೂಲವನ್ನು ಬಳಸುವುದರ ಜತೆಗೆ ಜನಸಂಖ್ಯಾ ಸ್ಫೋಟವನ್ನು ತಡೆಗಟ್ಟುವ ಕೆಲಸ ಆಗಬೇಕು ಎಂದು ತಿಳಿಸಿದರು.

ಮೈಸೂರು ವಿ.ವಿ. ಕುಲಪತಿ ಪ್ರೊ.ಜಿ.ಹೇಮಂತಕುಮಾರ್ ಅಧ್ಯಕ್ಷತೆ ವಹಿಸಿದ್ದರು. ಡಾ.ಎಚ್.ಬಿ.ಮಹೇಶ ಪದವೀಧರರಿಗೆ ಪ್ರಮಾಣ ವಚನ ಬೋಧಿಸಿದರು. ಕಾಲೇಜು ಪ್ರಾಂಶುಪಾಲ ಡಾ.ಎಂ.ರುದ್ರಯ್ಯ ಇದ್ದರು.

ಸಮರ್ಪಣಾ ಮನೋಭಾವ ಇರಲಿ: ಪದವಿ ಪಡೆದು ಮತ್ತೆ ಶಿಕ್ಷಣ ಮುಂದುವರಿಸುವುದರ ಜತೆಗೆ ಸಂಶೋಧಕರು, ಉದ್ಯಮಿ ಹಾಗೂ ವಿಜ್ಞಾನಿಗಳ ಸಲಹೆಗಾರರಾಗಬೇಕೆಂಬ ಆಶಾಭಾವನೆಯಿಂದ ಹೊರಬರುತ್ತೀರಿ. ನೀವು ಯಾವುದೇ ಕ್ಷೇತ್ರದಲ್ಲಿ ಮುಂದುವರಿಯಿರಿ. ಆದರೆ, ನೀವು ಆಯ್ದುಕೊಳ್ಳುವ ವೃತ್ತಿಜೀವನದಲ್ಲಿ ಸಮರ್ಪಣಾ ಮನೋಭಾವದಿಂದ ತೊಡಗಿಸಿಕೊಳ್ಳಿ. ನಾನು ಏನು ಮಾಡಲು ಹೋಗುತ್ತಿದ್ದೇನೆ ಎಂಬ ಅರಿವು ನಿಮಗಿರಬೇಕು. ನಿಮ್ಮ ಗುರಿ ಯಶಸ್ಸು ಕಾಣಲಿ ಎಂದು ಕೆ.ಜೆ.ರಾವ್ ಹಾರೈಸಿದರು.

706 ವಿದ್ಯಾರ್ಥಿಗಳಿಗೆ ಪದವಿ ಪ್ರದಾನ: 706 ವಿದ್ಯಾರ್ಥಿಗಳಿಗೆ ಪದವಿ ಪ್ರದಾನ ಮಾಡಲಾಯಿತು. 12 ಚಿನ್ನದ ಪದಕ ಹಾಗೂ 50 ದತ್ತಿ ಬಹುಮಾನಗಳೊಂದಿಗೆ ಪದವಿ ಪ್ರಮಾಣ ಪತ್ರ ನೀಡಲಾಯಿತು. ಬಿಎಸ್‌ಸಿ- 415, ಬಿಬಿಎ- 4, ಬಿಸಿಎ- 46, ಎಂಎಸ್‌ಸಿ ಸಸ್ಯಶಾಸ್ತ್ರ-27, ರಸಾಯನಶಾಸ್ತ್ರ- 36, ಎಂಎಸ್‌ಸಿ ಭೌತಶಾಸ್ತ್ರ- 30, ಎಂಎಸ್‌ಸಿ ಗಣಿತಶಾಸ್ತ್ರ- 55, ಎಂಎಸ್‌ಸಿ ಅಣುಜೀವಶಾಸ್ತ್ರ- 17, ಎಂಎಸ್‌ಸಿ ಆಹಾರ ವಿಜ್ಞಾನ ಮತ್ತು ಪೌಷ್ಟಿಕಾಂಶ- 24, ಎಂಬಿಎಂ- 39 ಹಾಗೂ ಎಂಎ ಇಂಗ್ಲಿಷ್‌ನಲ್ಲಿ 13 ವಿದ್ಯಾರ್ಥಿಗಳು ಪದವಿ ಸ್ವೀಕರಿಸಿದರು.

ಚಿನ್ನದ ಪದಕ ಪಡೆದವರು: ವಿ.ರಮ್ಯಾ- (ಎಂಎಸ್ಸಿ-ಭೌತವಿಜ್ಞಾನ), ಸಯ್ಯದ್ ನೆಮತ್- (ಎಂಎಸ್ಸಿ-ರಸಾಯನವಿಜ್ಞಾನ), ಎಂ.ಪ್ರೇರಣಾ- (ಎಂಎಸ್ಸಿ-ಅಣುಜೀವವಿಜ್ಞಾನ), ಆರ್.ಎಸ್.ಬಬಿತಾ- (ಎಂಎ-ಇಂಗ್ಲಿಷ್), ಬಿ.ಎನ್.ರಶ್ಮಿತಾ- (ಎಂಎಸ್ಸಿ-ಗಣಿತವಿಜ್ಞಾನ), ವಿಜಯಾನಂದ ಎಸ್.ಮೆಣಸಿನಕಾಯಿ- (ಎಂಎಸ್ಸಿ-ಸಸ್ಯವಿಜ್ಞಾನ), ರಕ್ಷಿತಾ- (ಎಂಬಿಎ), ನೂರುಲ್ ಆಯಿನ್ ಹಫ್ಸಾ- (ಎಂಎಸ್ಸಿ-ಆಹಾರ ವಿಜ್ಞಾನ ಮತ್ತು ಪೌಷ್ಠಿಕಾಂಶ), ಚೈತ್ರಾ ನಾರಾಯಣ್ ಹೆಗ್ಡೆ- (ಬಿಎಸ್ಸಿ-ನೈಸರ್ಗಿಕ ವಿಜ್ಞಾನ), ಎಲ್.ಆರ್.ವಿದ್ಯಾಶ್ರೀ- (ಭೌತ ವಿಜ್ಞಾನ), ಪ್ರವೀಣ್ ಕುಮಾರ್- (ಭೌತ ವಿಜ್ಞಾನ), ಎಚ್.ಎ.ಅಪೂರ್ವ- (ಬಿಸಿಎ), ಎಂ.ಎಸ್.ಸಂಪ್ರಿತಾ ರಾವ್ (ಬಿಬಿಎ).

Leave a Reply

Your email address will not be published. Required fields are marked *