More

    ಅನಿಸಿಕೆ | ಸಮಸ್ಯೆಗಳ ಸುತ್ತ ಅಡಕೆ ಕೊಯ್ಲು

    ಅನಿಸಿಕೆ | ಸಮಸ್ಯೆಗಳ ಸುತ್ತ ಅಡಕೆ ಕೊಯ್ಲುಕಂಬಳಿ ಗುಡುರುಹಾಕಿ ಜಿಬಿರುಗಣ್ಣು ಬಿಡಿಸುತ್ತ ಎದ್ದ ಚಳಿಗಾಲದ ಸೂರ್ಯ, ಅಡಕೆ ಮರಗಳ ಚಂಡೆಯ ಮೇಲೆಲ್ಲ ಬೆಳಕು ಚಿಮುಕಿಸುತ್ತ ಮೇಲೆದ್ದು ಬರುತ್ತಿದ್ದಂತೆ, ಇಬ್ಬನಿಯಿಂದ ತೊಯ್ದ ಅಡಕೆ ಹೆಡೆಗಳು ಸಾಣೆ ಹಿಡಿದ ಕತ್ತಿಯಂತೆ ಫಳಫಳ ಹೊಳೆಯುತ್ತಿದ್ದವು. ಇಬ್ಬನಿಯ ಮಣಿಹೊತ್ತ ಸಾಲಿಂಗದ ಬಲೆಗಳು ತೋಟದ ತುಂಬ ಸಿಂಗಾರದ ತೋರಣ ಕಟ್ಟುತ್ತಿದ್ದವು. ತೋಟದ ತುಂಬೆಲ್ಲ ಬಿದ್ದ ಹಂಡ-ಹುಂಡ ಬಿಸಿಲು ಕೋಲುಗಳು, ಹಣ್ಣಾಗಿ ಬಿದ್ದ ಗೋಟುಗಳು, ಜೋಲುತ್ತಿ್ತುವ ಮೆಣಸಿನ ಕರೆಗಳು, ಇವೆಲ್ಲವುದರ ಜೊತೆಗೆ ಬಿಸಿಲಿನ ತುಣುಕುಗಳನ್ನು ತೇಲಿಸಿಕೊಂಡು ಹರಿಯುತ್ತಿರುವ ಜುಳುಜುಳು ತಲೇವಣಿ. ಒಟ್ಟಾರೆ ತೋಟದ ತುಂಬ ನೆರಳು-ಬಿಸಿಲಿನಾಟದ ಸುಂದರ ನೋಟ.

    ಹೌದು, ಮಲೆನಾಡಿನ ಮನೆಗಳಲ್ಲಿ ಈಗಾಗಲೇ ಅಡಕೆ ಕೊಯ್ಲು ಪ್ರಾರಂಭವಾಗಿದೆ. ಸುಮಾರು 25-30 ವರ್ಷಗಳ ಹಿಂದಿನ ಸ್ಥಿತಿ ಅವಲೋಕಿಸಿದಾಗ ಆಗ ಕೊನೆ ಕೊಯ್ಲು ಮತ್ತು ಅಡಕೆ ಸುಲಿಯುವುದು ಒಂದು ಸಮಸ್ಯೆಯಾಗಿರದೆ ಅದೊಂದು ಜನಪದ ಸಂಭ್ರಮವೇ ಆಗಿತ್ತು. ಹಬ್ಬದಷ್ಟೇ ಖುಷಿ, ಉತ್ಸಾಹ ಮನೆತುಂಬ ತುಂಬಿಕೊಳ್ಳುತ್ತಿತ್ತು. ಆದರೆ ಇಂದು ಹಾಗಿಲ್ಲ. ‘ಅಯ್ಯೋ, ಅಡಕೆ ಕೊಯ್ಲು ಬಂತಲಪ್ಪ’ ಎಂದು ಗೊಣಗುವ ಸ್ಥಿತಿ. ಲಾಗಾಯ್ತಿನಿಂದ ದುರ್ಗ, ನಾರಣಿ, ಗಣಪ ಮತ್ತು ಕೂರ ಇವರನ್ನೇ ನಂಬಿಕೊಂಡು ದಿನದೂಡಿದ ಅಡಕೆ ಬೆಳೆಗಾರರು ಈಗ ಸಮಸ್ಯೆಗೆ ಸಿಲುಕಿದ್ದಾರೆ. ಗೊನೆ ಹೊತ್ತ ಭಾರಕ್ಕೆ ಬಡಿವಾರದಿಂದ ತೊನೆಯುತ್ತಿರುವ ಅಡಕೆ ಮರಗಳ ಮೇಲೆ ಕಣ್ಣು ಹಾಯಿಸುತ್ತ, ರಸ್ತೆ ಬದಿಯ ಪಾಗಾರದ ಮೇಲೆ ಕುಕ್ಕುರು ಗಾಲಿನಲ್ಲಿ ಚಳಿ ಕಾಯಿಸುತ್ತ ಕುಳಿತ ಭಟ್ಟರು- ‘ಅಲ್ಲೋ ಮಾರಾಯ, ಅಡಕೆ ಎಲ್ಲಾ ಗೋಟಾಗಿ ಉದರಕ್ಕೆ ಹಿಡದ್ದು. ಕೊನೆ ಕೊಯ್ಸೋಣ ಅಂತ ಅಂದ್ರೆ ಒಬ್ಬಾನೊಬ್ರು ಸಿಕ್ತ್ವಲ್ಯಲಾ, ಎಂತ ಮಾಡಕ್ಕೇನಪ್ಪ’- ಎಂದು ಪ್ರಶ್ನಾರ್ಥಕ ದೃಷ್ಟಿ ಬೀರಿದರು.

    ನಿಜ, ಒಂದು ಪಕ್ಷ ಗೊನೆ ಕೊಯ್ಯುವವನು ಸಿಕ್ಕರೆ ನೇಣು ಹಿಡಿಯುವವನು (ಹಗ್ಗದ ಮೇಲೆ ಇಳಿಬಿಡುವ ಅಡಕೆ ಗೊನೆಯನ್ನು ಕೆಳಗೆ ನಿಂತು ಹಿಡಿದುಕೊಳ್ಳುವವನು. ಇದು ಒಂದು ಕಲೆ. ಎಲ್ಲರಿಗೂ ಬರುವುದಿಲ್ಲ) ಸಿಗುವುದಿಲ್ಲ. ಇಬ್ಬರೂ ಸಿಕ್ಕರೆ ಉದುರು (ಕೊಯ್ಯುವಾಗ ನೆಲಕ್ಕೆ ಬೀಳುವ ರಾಶಿ ರಾಶಿ ಅಡಕೆ) ಹೆಕ್ಕುವವರು ಸಿಗುವುದಿಲ್ಲ. ಹಾಗಾಗಿ ಇತ್ತೀಚಿನ ದಿನಗಳಲ್ಲಿ ಅಡಕೆ ಕೊಯ್ಲು ಒಂದು ಮಹಾಯಜ್ಞವೇ ಆಗಿದೆ. ಮಲೆನಾಡಿನ ಎಲ್ಲ ಅಡಕೆ ಬೆಳೆಗಾರರ ಸಮಸ್ಯೆಯಿದು.

    ಕೊನೆ ಕೊಯ್ಲು ಬಂತೆಂದರೆ ಆಳುಕಾಳುಗಳಿಗಾಗಿ ಹುಡುಕುವುದೇ ಒಂದು ತಲೆನೋವು.

    ಇಂದು ನಮ್ಮೂರಿನ ಕಪು್ಪ ಹಸಿರಿನ ಕಾಡುಗಳ ಮಧ್ಯೆ ದಾರಿ ಮಾಡಿಕೊಂಡು ಹಸಿರು ಪತ್ತಲ ಉಟ್ಟ ಮೈಮೇಲೆಲ್ಲ ಕೆಂಪುಧೂಳನ್ನು ದಪ್ಪಗೆ ಹೊದೆಸುತ್ತ ಬರುವ ಕೆಂಪು ಬಸ್ಸುಗಳು, ದಿವಸವೂ ಎರಡು ಮೂರು ಸಾರಿ ಭರ್ರಂತೆ ಬಂದು ಹೋಗುತ್ತವೆ. ಗಣಪ ದುರ್ಗರ ಮನೆಯ ಮುಂದೆಯೇ ಬಸ್​ಸ್ಟಾಪ್ ಇದೆ. ಇವರ ಮಕ್ಕಳಿಗೆ ಈಗ ಹಾಳೆ ಟೋಪ್ಪಿ ಇಲ್ಲ ಬದಲಾಗಿ ಹ್ಯಾಟ್. ಮೊಣಕಾಲ ಮೇಲಿನ ಪಂಚೆಗೆ ಬದಲಾಗಿ ಪ್ಯಾಂಟು. ಪೇಟೆಯಲ್ಲಿ ತಿಂಗಳಿಗೆ 1000-2000 ರೂಪಾಯಿ ಸಂಬಳ ಪಡೆಯುವ ಸಾಮಾನ್ಯ ಕೆಲಸವೂ ಅವರಿಗೆ ಗತ್ತಿನದಾಗಿ ಕಾಣುತ್ತದೆ. ಆದರೆ ಅದೇ ಅಡಕೆ ಕೊಯ್ಲಿನ ಸೀಜನ್​ನಲ್ಲಿ ದಿನಕ್ಕೆ 2000-3000 ದುಡಿಯುವ ಕೊನೆ ಕೊಯ್ಲು ಅವರಿಗೆ ಅವಮಾನದ ವೃತ್ತಿಯಾಗಿದೆ.

    ಎಲ್ಲ ರಂಗದಲ್ಲೂ ಸಮಸ್ಯೆಗಳು ಇದ್ದೇ ಇವೆ. ಅದಕ್ಕೆ ಸೂಕ್ತ ಪರಿಹಾರ ಕಂಡುಕೊಳ್ಳುವಲ್ಲಿ ನಮ್ಮ ಪ್ರಾಮಾಣಿಕ ಪ್ರಯತ್ನವಿದೆಯಾ? ಎಂದು ಆತ್ಮಾವಲೋಕನ ಮಾಡಿಕೊಳ್ಳಬೇಕಾಗಿದೆ. ಸಾಕಷ್ಟು ಸಂಘ-ಸಂಸ್ಥೆಗಳು ಈ ದಿಕ್ಕಿನಲ್ಲಿ ಸಂಶೋಧನೆ ಮಾಡುತ್ತಿದ್ದರೂ ಸರಿಯಾದ ಫಲಿತಾಂಶ ಬಂದಿಲ್ಲ. ಇನ್ನು ಮುಂದೆ ದುರ್ಗ-ಗಣಪರ ಮಕ್ಕಳು ಕೊನೆ ಕೊಯ್ಯಲು ಖಂಡಿತ ಸಿಗುವುದಿಲ್ಲ ಎಂಬ ಸತ್ಯ ಗೊತ್ತಾಗಬೇಕಿದೆ.

    ಅಲ್ಲೊಬ್ಬ ಇಲ್ಲೊಬ್ಬ ಅಪ್ಪನ ವೃತ್ತಿಯನ್ನು ಅವಲಂಬಿಸಿದರೂ, ವೃತ್ತಿಶ್ರದ್ಧೆ ಕಂಡುಬರುವುದಿಲ್ಲ. ಜೀವನ ಮಾಡಬೇಕಲ್ಲ ಎನ್ನುವ ಅನಿವಾರ್ಯಕ್ಕೆ ವಾರದಲ್ಲಿ 1-2 ಕೆಲಸ ಅಷ್ಟೆ. ಆದರೂ ತಿಂಗಳ ಮೊದಲೇ ಅವರನ್ನು ಬುಕ್ ಮಾಡಿಕೊಳ್ಳಬೇಕಾಗುತ್ತದೆ. ಬಂದರೆ ಬಂದ್ರು ಬಿಟ್ಟರೆ ಬಿಟ್ರು. ಒಟ್ಟಿನಲ್ಲಿ ಬೆಳೆಗಾರರು ಅವರಿಗೆ ಅಡ್ಜಸ್ಟ್ ಆಗದೆ ಬೇರೆ ಗತಿ ಇಲ್ಲದಂತಾಗಿದೆ. ಸುಲಭವಾದ ಪರಿಹಾರವೆಂದರೆ ನಾವೇ ದುರ್ಗ-ಗಣಪರಾದರೆ ಕೊಯ್ಲಿನ ಸಮಸ್ಯೆಗೆ ಉತ್ತರ ಹುಡುಕಲು ಸಾಧ್ಯ. ನಮ್ಮ ಮನೆಯ ಕೆಲಸವನ್ನು ನಾವೇ ಮಾಡಿಕೊಳ್ಳುವುದು ಅವಮಾನವೇನೂ ಅಲ್ಲ. ಊರಿಗೆ 3-4 ಜನ ಇಂಥವರು ತಯಾರಾದರೆ ಸಮಸ್ಯೆಗೆ ಜಾಗವೇ ಇರುವುದಿಲ್ಲ. ನಾವು ಮಾಡುವ ಈ ಕೆಲಸವನ್ನು ನೋಡಿ ಗಣಪ ದುರ್ಗರ ಮಕ್ಕಳ ಮನಸ್ಸು ಪರಿವರ್ತನೆಯಾದರೂ ಆಶ್ಚರ್ಯ ಪಡಬೇಕಾಗಿಲ್ಲ. ನಮ್ಮ ಮನೆಯ ತೋಟದ ಗೊನೆಗಳನ್ನು ನಾವೇ ಕೊಯ್ಯುವಂತಾದರೆ ಆರ್ಥಿಕವಾಗಿಯೂ ಸುಧಾರಿಸಿಕೊಳ್ಳಲು ಸಾಧ್ಯ.

    ಅಡಕೆ ಸುಲಿಯುವುದು ಇತ್ತೀಚಿನ ದಿನಗಳಲ್ಲಿ ಸಮಸ್ಯೆಯಾಗಿರುವುದು ಹೌದು. ಈ ಹಿಂದೆ ಮೈಯಾಳು (ಪರಸ್ಪರ ಸುಲಿಯುವುದು) ಮಾಡಿಕೊಂಡು ಸುಲಿಯುವಾಗ ಸಮಸ್ಯೆ ಇರಲಿಲ್ಲ. ಮಹಿಳೆಯರು ಸುಲಿಯುವ ಕಾಯಕದಲ್ಲಿ ವಿಶೇಷವಾಗಿ ಭಾಗವಹಿಸುತ್ತಿದ್ದರಿಂದ ಆರ್ಥಿಕ ಸ್ವಾವಲಂಬನೆ ಹೊಂದಲು ಉತ್ತಮ ದಾರಿಯಾಗಿತ್ತು. ಸಮಾಧಾನದ ಸಂಗತಿ ಎಂದರೆ ಉತ್ತಮ ತಂತ್ರಜ್ಞಾನವನ್ನು ಅಳವಡಿಸಿಕೊಂಡ ಶೇಕಡ 80 ಗುಣಮಟ್ಟದ ಅಡಕೆ ಸುಲಿಯುವ ಯಂತ್ರ ಬಂದಿರುವುದು. ಈ ನಿಟ್ಟಿನಲ್ಲಿ ಇನ್ನಷ್ಟು ಸುಧಾರಣೆಗಳು ಆಗಬೇಕಿವೆ. ಅದಕ್ಕಾಗಿ, ಅಡಕೆ ಬೆಳೆಗಾರರ ಅನುಕೂಲಕ್ಕೆ ಹುಟ್ಟಿಕೊಂಡ ಅನೇಕ ಸಂಘ-ಸಂಸ್ಥೆಗಳು, ಸಂಶೋಧನಾ ಕೇಂದ್ರಗಳು ಅಡಕೆ ಬೆಳೆಗಾರರ ದೃಷ್ಟಿಯಿಂದ ಉತ್ತಮ ಸಂಶೋಧಕರನ್ನು ನೇಮಿಸಿ, ಗುಣಮಟ್ಟದ ಯಂತ್ರಗಳನ್ನು ಕಂಡುಹಿಡಿಯುವಲ್ಲಿ ಮುತುವರ್ಜಿ ವಹಿಸಿದಾಗ ಮಾತ್ರ ಬೆಳೆಗಾರರ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳುವುದು ಸಾಧ್ಯ.

    ಅಡಕೆ ಬೆಳೆಗಾರರು ಕೇವಲ ಕವಳದ ತಬಕಿನೆದುರು ದುಂಡು ಕಟ್ಟೆಯ ಪರಿಷತ್ತು ಮಾಡಿಕೊಂಡು ತಮ್ಮೆಲ್ಲ ಸಮಸ್ಯೆಗಳನ್ನು ಜಗಿಯುತ್ತ ಕೂರದೆ, ಬೆಳೆಗಾರರ ಅನೂಕೂಲಕ್ಕೆ ಇರುವ ಸಂಘ-ಸಂಸ್ಥೆಗಳ ಹಾಗೂ ಸಂಶೋಧನಾ ಕೇಂದ್ರಗಳ ಮೇಲೆ ಸಮಸ್ಯೆಗಳ ಪರಿಹಾರಕ್ಕಾಗಿ ಒತ್ತಡ ಹೇರಿದಾಗ ಮಾತ್ರ ಭವಿಷ್ಯ ಆಶಾದಾಯಕವಾಗಬಹುದು.

    (ಲೇಖಕರು ನಿವೃತ್ತ ಉಪನ್ಯಾಸಕರು, ಹವ್ಯಾಸಿ ಬರಹಗಾರರು)

    ಸಿನಿಮಾ

    ಲೈಫ್‌ಸ್ಟೈಲ್

    ಟೆಕ್ನಾಲಜಿ

    Latest Posts