ನವದೆಹಲಿ: ಹೊಸ ವರ್ಷದಂದೇ ನಿಶ್ಚಿತಾರ್ಥ ಮಾಡಿಕೊಂಡು ಎಲ್ಲರಿಗೂ ಸರ್ಪ್ರೈಸ್ ನೀಡಿರುವ ಟೀಮ್ ಇಂಡಿಯಾದ ಆಲ್ರೌಂಡರ್ ಹಾರ್ದಿಕ್ ಪಾಂಡ್ಯಗೆ ನಾಯಕ ವಿರಾಟ್ ಕೊಹ್ಲಿ ಶುಭಕೋರಿ, ಅಚ್ಚರಿ ವ್ಯಕ್ತಪಡಿಸಿದ್ದಾರೆ.
ಹಾರ್ದಿಕ್ ಪಾಂಡ್ಯ ಮತ್ತು ಬಾಲಿವುಡ್ ನಟಿ ನತಾಶಾ ಸ್ಟಾಂಕೋವಿಕ್ ಅವರ ಫೋಟೋ ನೋಡಿ ಎಂತಹ ಆಹ್ಲಾದಕರ ಸರ್ಪ್ರೈಸ್ ಇದು. ಅಭಿನಂದನೆಗಳು ಹಾರ್ದಿಕ್, ಒಳ್ಳೆಯ ದಿನಗಳು ಎದುರಾಗಲಿ, ಹಾಗೆಯೇ ದೇವರು ಆಶೀರ್ವದಿಸಲಿ ಎಂದು ವಿರಾಟ್ ಕೊಹ್ಲಿ ಇನ್ಸ್ಟಾಗ್ರಾಂನಲ್ಲಿ ಹಾರ್ದಿಕ್ ಪಾಂಡ್ಯ ಪೋಸ್ಟ್ ಮಾಡಿರುವ ಫೋಟೋಗೆ ಪ್ರತಿಕ್ರಿಯಿಸಿದ್ದಾರೆ.
ವಿರಾಟ್ ಮಾತ್ರವಲ್ಲದೆ, ಮಾಜಿ ನಾಯಕ ಧೋನಿ ಅವರ ಪತ್ನಿ ಸಾಕ್ಷಿ ಧೋನಿ ಸೇರಿ ಟೀಮ್ ಇಂಡಿಯಾ ಇತರೆ ಆಟಗಾರರು ಸಹ ಹಾರ್ದಿಕ್ಗೆ ಶುಭ ಕೋರಿದ್ದಾರೆ.
ಸೆರ್ಬಿಯಾ ಮೂಲದ ಬಾಲಿವುಡ್ ನಟಿ ನತಾಶಾ ಸ್ಟಾಂಕೋವಿಕ್ ಜತೆಗೆ ಜನವರಿ 1 ಹೊಸ ವರ್ಷದಂದು ಹಾರ್ದಿಕ್ ಪಾಂಡ್ಯ ದುಬೈನಲ್ಲಿ ನಿಶ್ಚಿತಾರ್ಥ ನೇರವೇರಿಸಿಕೊಂಡಿದ್ದಾರೆ. ‘ಮೈ ತೆರಾ, ತು ಮೇರಿ, ಜಾನೇ ಸಾರಾ ಹಿಂದುಸ್ತಾನ್. 01.01.2020,ಎಂಗೇಜ್ಡ್’ ಎಂದು ಹಾರ್ದಿಕ್ ಪಾಂಡ್ಯ ಬುಧವಾರ ಸಂಜೆ ಇನ್ಸ್ಟಾಗ್ರಾಂ ಪೋಸ್ಟ್ನಲ್ಲಿ ನಿಶ್ಚಿತಾರ್ಥವನ್ನು ಪ್ರಕಟಿಸಿದ್ದಾರೆ. ಹಾರ್ದಿಕ್ ಸಾಕಷ್ಟು ಶುಭಾಶಯಗಳು ಹರಿದುಬರುತ್ತಿವೆ. (ಏಜೆನ್ಸೀಸ್)